Taga a kɔnɔkow lajɛ

Taga a kɔnɔnakow lajɛ

Maana 63nan: Masacɛ hakilitigi Solomani

Maana 63nan: Masacɛ hakilitigi Solomani

SOLOMANI tun ye kanbele ye tuma min na a kɛra masacɛ ye. Jehova koo tun ka di a ye, ani a tun be a faa Dawuda ka ladili ɲumanw sira tagama. A koo tun ka di Jehova ye. O kama, loon dɔ sufɛ a y’a ɲininga siko la ko: ‘Solomani, i b’a fɛ ne ka mun lo di i ma?’

Solomani y’a jaabi ko: ‘Jehova, ne ka Ala, ne ye denmisɛn ye ani ne tɛ masaya ɲɛɛ lɔn. O la, i ka hakilitigiya di ne ma walisa ne ka se k’i ka jama nin mara koɲuman.’

Solomani ka kuma diyara Jehova ye. O kama, a ko: ‘I ma sijan walima nafolo deli, nka i ye hakilitigiya le deli. O la, ne bena hakilitigiya di i ma, mɔgɔ ma min ɲɔgɔn sɔrɔ ka ye. Ani i ma fɛɛn min deli ne b’o fana di i ma: nafolo ni bonya.’

Wagati dɔɔni o kɔ, muso fila nana ni koo gwɛlɛ dɔ ye Solomani fɛ. Muso kelen y’a fɔ ko: ‘Ne ni muso nin, an be boon kelen kɔnɔ. Ne ye cɛden dɔ wolo ani tile fila o kɔ muso nin fana ye cɛden dɔ wolo. Nka loon dɔ sufɛ, a deen sara. Ka ne to sinɔgɔ la, a y’a deen suu ta ka na a la ne gɛrɛfɛ ani ka ne deen ta. Ne kununa tuma min na, ne ye deen suu ye, ani n y’a filɛ ka ɲɛ k’a ye ko ne deen tɛ.’

Muso dɔ nin ko: “Tiɲɛ tɛ! Ne deen le be nii na, i ta le sara!” Nka muso fɔlɔ ko: ‘Tiɲɛ tɛ! E deen le sara, ne ta le be nii na!’ U tora ka ɲɔgɔn sɔsɔ ten. Solomani ye mun lo kɛ do?

Solomani ko u ka na ni murujan ye ani a y’a fɔ ko: ‘Deen min be nii na, a’ y’o cɛtigɛ fila ka tilan kelen di muso nunu kelen kelen bɛɛ ma.’

Muso min tun ye deen baa yɛrɛyɛrɛ ye, ale kulera ko: ‘Ayi, sabari kana deen nin faga. A di muso nin ma!’ Nka, muso dɔ nin ko: ‘Kana a di an si ma, a tigɛ fila.’

Masacɛ Solomani be koo gwɛlɛ dɔ ɲɛnabɔra

Solomani labanna k’a fɔ ko: ‘Kana deen nin faga! A di muso fɔlɔ nin ma. Ale lo ye deen nin bamuso yɛrɛyɛrɛ ye.’ Solomani y’o lɔn sabu deen wolobaga tun b’a deen kanu hali fɔɔ a tun sɔnna u k’a di muso dɔ nin ma sanni u k’a faga. Jama ye Solomani ka kitiko mɛn tuma min na, a diyara u ye ka o masacɛ hakilitigi ɲɔgɔn sɔrɔ.

Solomani ka masaya wagati la, Ala ye Israɛldenw duga. A y’a kɛ sumanw be ɲɛ ani yiriw be den kosɔbɛ. Mɔgɔw tun be fani ɲumanw don ani u tun be si boon ɲɛnamanw kɔnɔ. Bɛɛ tun be jiidi.

1 Masacɛw 3:3-28; 4:29-34.



Ɲiningaliw

  • Jehova ye Solomani ɲininga mun lo la, ani ale y’a jaabi cogo di?
  • Solomani ye min ɲini Jehova fɛ, komi o diyara a ye, Jehova ko a bena mun lo di a ma?
  • Muso fila dɔw nana ni koo gwɛlɛ juman lo ye Solomani fɛ?
  • I ko i ɲɛɛ b’a la jaa kan, Solomani y’o koo ɲɛnabɔ cogo di?
  • Koow tun be cogo di Solomani ka masaya wagati la, ani mun na do?

Ɲiningali wɛrɛw

  • An ka 1 Masacɛw 3:3-28 kalan.

    Baara kalifara cɛɛ minw ma Ala ka jɛnkulu kɔnɔ bi, olu be se ka kalan juman sɔrɔ Solomani ka kumaw na a y’a kɔnɔ gwɛ ka minw fɔ 1 Masacɛw 3:7 kɔnɔ? (Zab. 119:105; Tal. 3:5, 6)

    A bɛnnin lo an ka delili kɛ fɛɛn minw koo la, Solomani y’o ɲɛyira an na cogo di a ka delili kɔnɔ? (1 Mas. 3:9, 11; Tal. 30:8, 9; 1 Zan 5:14)

    Solomani ye muso fila nunu ka sɔsɔliko ɲɛnabɔ cogo min na, n’an be miiri o la o b’an jigi sigi ko Solomaniba Yezu Krista bena a ka kuntigiya kɛ cogo di? (1 Mas. 3:28; Ezayi 9:5, 6; 11:2-4)

  • An ka 1 Masacɛw 5:9-14 kalan.

    Solomani ye Jehova deli a ka dusukun kolonin di ale ma, Jehova y’o delili jaabi cogo di? (1 Mas. 5:9)

    Mɔgɔw tun be jijali kɛ ka na Solomani ka hakilitigiya kumaw lamɛn. N’an miirila o la, an ka kan ka Ala ka Kuma kalan jati cogo di? (1 Mas. 5:9, 14; Zan 17:3; 2 Tim. 3:16)