Taga a kɔnɔkow lajɛ

Taga a kɔnɔnakow lajɛ

Maana 61nan: Dawuda kɛra masacɛ ye

Maana 61nan: Dawuda kɛra masacɛ ye

SAYULI b’a ɲinina ka Dawuda minɛ tugun. A ye kɛlɛden ŋana 3 000 minɛ ka Dawuda nɔgwɛn. Dawuda y’o mɛn minkɛ, a ye kolajɛbaga dɔw ci walisa u k’a ɲini k’a lɔn Sayuli n’a ka kɛlɛdenw be si yɔrɔ min na. O kɔ, Dawuda ye a nɔfɛcɛ fila ɲininga ko: ‘Aw la juman bena taga ni ne ye Sayuli sigiyɔrɔ la?’

Dawuda be masacɛ Sayuli weelela

Abisayi y’a jaabi ko: ‘Ne.’ Abisayi ye Dawuda balimamuso Seruya dencɛ ye. Ka Sayuli n’a ka mɔgɔw to sinɔgɔ la, Dawuda ni Abisayi donna dɔɔni dɔɔni u cɛma. U ye Sayuli ka taman n’a ka jiforoko ta a kuun gɛrɛfɛ. Mɔgɔ si m’u ye, mɔgɔ si ma bɔ u kala ma sabu bɛɛ tun be sinɔgɔra kosɔbɛ.

Dawuda ni Abisayi filɛ sisan. U sera ka bɔ yen hɛɛrɛ la ka taga tintin dɔ kan. Dawuda pɛrɛnna Israɛl ka kɛlɛdenw kuntigi Abinɛri kun na ko: ‘Mun na i ma masacɛ, i matigi kɔrɔsi? A filɛ! Masacɛ ka taman n’a ka jiforoko be min?’

Sayuli kununa. A ye Dawuda kaan lɔn ani a y’a ɲininga ko: “Ne dencɛ Dawuda, ele lo wa?” I ɲɛɛ be Sayuli ni Abinɛri la jaa kan i kinibolo fan fɛ wa?

Dawuda y’a jaabi ko: “Ne lo, n matigi, masacɛ.” Dawuda y’a fɔ ko: ‘Mun na i b’a ɲinina ka ne minɛ? Ne ye koo jugu juman lo kɛ? Masacɛ, i ka taman filɛ. A to i ka kanbele dɔ ka na a minɛ.’

Masacɛ Sayuli ni Abinɛri

Sayuli sɔnna a ma ko: ‘Ne ye hakɛ kɛ. Ne ye nalomanya baara le kɛ.’ Dawuda tɛmɛna ka taga n’a ka sira ye, ani Sayuli kɔsegira a ka soo. Nka, Dawuda y’a miiri a yɛrɛ kɔnɔ ko: ‘Loon dɔ, Sayuli bena ne sɔrɔ ka n faga. Ne ka kan ka taga Filisitikaw ka mara la.’ A y’o lo kɛ. Dawuda sera ka Filisitikaw lafili, u y’a miiri ko a kɛra olu dɔ ye sisan.

Loon dɔ, Filisitikaw y’u ka kɛlɛdenw lajɛn ko u be taga Israɛldenw kɛlɛ. Sayuli ni Zonatan fagara o kɛlɛ la. O koo ye Dawuda dusu kasi kosɔbɛ. A ye dɔnkili ɲuman dɔ la ko: “Ne nii tɔɔrɔnin be e kosɔn Zonatan, ne balimacɛ, e koo tun ka di ne ye kosɔbɛ.”

O koow kɔ, Dawuda kɔsegira Israɛl, ka taga sigi Eburɔn dugu kɔnɔ. Cɛɛ dɔw ye Sayuli dencɛ Isibosɛti sugandi k’a kɛ masacɛ ye. Nka, dɔ wɛrɛw tun b’a fɛ Dawuda lo ka kɛ masacɛ ye. O la, u wulila ɲɔgɔn kama kɛlɛ la. A laban, Dawuda ka mɔgɔw lo ye see sɔrɔ. Dawuda kɛra masacɛ ye tuma min na, a sii tun ye saan 30 ye. A ye saan 7 ni kalo 6 kɛ masaya la Eburɔn. A dencɛ minw wolola yen, u dɔw tɔgɔ ko Amunɔn, Abisalɔn ani Adoniya.

Loon dɔ, Dawuda n’a nɔfɛcɛw wulila Zeruzalɛmu dugu cɛɲumanba kama ko u b’a minɛ. Dawuda balimamuso Seruya dencɛ wɛrɛ lo ye o kɛlɛ ɲɛminɛ. A tɔgɔ ko Zowabu. Dawuda ye Zowabu sara o la, a y’a kɛ a ka kɛlɛdenw kuntigi ye. O la, Dawuda y’a daminɛ ka masaya kɛ Zeruzalɛmu.

1 Samuyɛli 26:1-25; 27:1-7; 31:1-6; 2 Samuyɛli 1:26; 3:1-21; 5:1-10; 1 Tilew Kibaru 11:1-9.



Ɲiningaliw

  • Ka Sayuli n’a ka mɔgɔw to sinɔgɔ la, Dawuda ni Abisayi ye mun lo kɛ?
  • Dawuda ye Sayuli ɲininga mun lo la?
  • Dawuda faranin kɔ Sayuli la, a tagara min?
  • Koo juman lo ye Dawuda dusu kasi kosɔbɛ ani o y’a to a ye dɔnkili ɲuman dɔ la?
  • Tuma min na Dawuda kɛra masacɛ ye Eburɔn, a sanda tun ye saan joli ye, ani a dencɛ dɔw tɔgɔ ko di?
  • Kɔfɛ, Dawuda nana to yɔrɔ juman ka masaya kɛ?

Ɲiningali wɛrɛw

  • An ka 1 Samuyɛli 26: 1-25 kalan.

    Dawuda ka kuma minw be 1 Samuyɛli 26:11 kɔnɔ, u b’a yira ko a be Alako labɛnw jati cogo di? (Zab. 37:7; Ɔrɔm. 13:2)

    N’an y’an jija sɔbɛ la ka ɲuman kɛ mɔgɔ dɔ ye nka a tigi m’o lɔn, Dawuda ka kuma minw be 1 Samuyɛli 26:23 kɔnɔ, u be se k’an dɛmɛ cogo di an fari kana faga? (1 Mas. 8:32; Zab. 18:21)

  • An ka 2 Samuyɛli 1: 26 kalan.

    Bi, cogo juman na kerecɛnw be se ka “ɲɔgɔn kanu kosɔbɛ” i ko Dawuda ni Zonatan y’a kɛ cogo min na? (1 Piyɛri 4:8; Kɔl. 3:14; 1 Zan 4:12)

  • An ka 2 Samuyɛli 5:1-10 kalan.

    Dawuda ye saan joli kɛ masaya la, ani o wagati be se ka tilan cogo di? (2 Sam. 5:4, 5)

    Mun lo tun y’a to Dawuda be barika sɔrɔla, ani o be an hakili jigi mun lo la bi? (2 Sam. 5:10; 1 Sam. 16:13; 1 Kor. 1:31; Fil. 4:13)