Taga a kɔnɔkow lajɛ

Taga a kɔnɔnakow lajɛ

Maana 60nan: Abigayɛli ni Dawuda

Maana 60nan: Abigayɛli ni Dawuda

MUSO cɛɲuman min be nana Dawuda kunbɛn, i b’a lɔn wa? A tɔgɔ ko Abigayɛli. Muso hakilitigi lo, a ye Dawuda bali ka koo jugu kɛ. Nka sanni an ka kuma o koo la, an k’a filɛ fɔlɔ koo min ye Dawuda sɔrɔ.

Dawuda bolila Sayuli ɲɛ ka taga dogo kuluwo dɔ kɔnɔ. A balimaw n’a somɔgɔ tɔɔw tagara a fɛ yen. Cɛɛ 400 ɲɔgɔn nana a fɛ ani Dawuda kɛra u kuntigi ye. Dawuda tagara Mowabu masacɛ fɛ k’a fɔ a ye ko: “N b’i dali ko i ka sabali ka sɔn n facɛ ni n bamuso ka sigi i ka yɔrɔ la, yanni n k’a lɔn Ala bena min kɛ n ye.” Kɔfɛ, Dawuda n’a ka nɔfɛcɛw tora ka dogo tintinw kan.

O kɔ le Abigayɛli nana Dawuda kunbɛn. A cɛɛ Nabali ye nafolotigi ye, saga 3 000 ni baa 1 000 ani forow tun b’a fɛ. A tun ka jugu nka a muso Abigayɛli tun cɛ ka ɲi kosɔbɛ ani hakilitigi tun lo. Loon dɔ la, a yɛrɛ y’a somɔgɔw niin kisi. An k’a filɛ a y’o kɛ cogo min na.

Dawuda n’a ka nɔfɛcɛw ye koo ɲuman kɛ Nabali ye. U y’a ka sagaw tanga farati ma. Loon dɔ la, Dawuda ye mɔgɔw ci ka taga dumunifɛnw deli Nabali fɛ. U sera Nabali fɛ, mɔgɔw tun be n’a ye k’a dɛmɛ k’a ka sagaw sii tigɛ. Fɛti loon tun lo ani dumunifɛn diiman caaman tun be Nabali fɛ. O lo kama, Dawuda ka cidenw y’a fɔ a ye ko: ‘An ye koo ɲuman kɛ i ye. An ma i ka saga si soɲɛ, nka an yɛrɛ ye u tanga farati ma. I ka dumuni dɔ di an ma sisan.’

Nabali ko: ‘Ne tɛna n ka dumunifɛnw di aw ɲɔgɔn ma.’ A ye kuma jugu fɔ Dawuda koo la. Dawuda ka cidenw kɔsegira ka na o kumaw fɔ a ye tuma min na, a dimina kosɔbɛ. A y’a fɔ u ye ko: ‘ A’ ye aw ka murujanjanw ta!’ U ye sira ta ko u be taga Nabali n’a ka nɔfɛcɛw faga.

Nabali ka baaraden dɔ ye Nabali ka kuma juguw mɛn ani a tagara o fɔ Abigayɛli ye. Abigayɛli teliyara ka dumunifɛn dɔw labɛn. A ye u la faliw kan ka sira minɛ. A ye Dawuda kunbɛn tuma min na, a jigira a ka fali kan k’a kunbiri gwan ani k’a fɔ ko: ‘Ne matigi, kana ne cɛɛ Nabali filɛ. Mɔgɔ kolon lo ani a be koo kolonw dɔrɔn lo kɛ. Bonyafɛn dɔ filɛ nin ye. I ka a minɛ, ani i ka yafa an ma.’

Abigayɛli be nana dumunifɛnw di Dawuda ma

Dawuda y’a jaabi ko: ‘I ye muso hakilitigi ye. I ye ne bali ka Nabali faga walisa ka n yɛrɛ mɔnɛ bɔ a la a ka juguya kosɔn. I ka taga i ka soo hɛɛrɛ la.’ Kɔfɛ, Nabali sara ani Abigayɛli kɛra Dawuda ka muso dɔ ye.

1 Samuyɛli 22:1-4; 25:1-43.



Ɲiningaliw

  • Jaa nin kan, muso min be nana Dawuda kunbɛn, a tɔgɔ ko di, ani mɔgɔ sifa juman lo?
  • Nabali ye jɔn lo ye?
  • Mun na Dawuda ye a nɔfɛcɛ dɔw ci ka taga dumunifɛnw deli Nabali fɛ?
  • Nabali ye mun lo fɔ Dawuda ka cidenw ye, ani o kosɔn Dawuda ye mun lo kɛ?
  • Abigayɛli y’a yira cogo di ko ale ye muso hakilitigi ye?

Ɲiningali wɛrɛw

  • An ka 1 Samuyɛli 22: 1-4 kalan.

    Kerecɛn balimaw ka ɲi ka ɲɔgɔn dɛmɛ cogo min na, Dawuda somɔgɔw ye o ɲɛyira an na ka ɲɛ cogo juman na? (Tal. 17:17; 1 Tes. 5:14)

  • An ka 1 Samuyɛli 25: 1-43 kalan.

    Mun na u ye Nabali cogo lakali ka cɛjuguya? (1 Sam. 25:2-5, 10, 14, 21, 25)

    Kerecɛn furumusow be kalan juman sɔrɔ Abigayɛli ka koo la bi? (1 Sam. 25:32, 33; Tal. 31:26; Efɛz. 5:24)

    Abigayɛli ye Dawuda bali ka kojugu fila juman kɛ? (1 Sam. 25:31, 33; Ɔrɔm. 12:19; Efɛz. 4:26)

    Dawuda ye Abigayɛli ka kuma jati cogo min na, o be bi cɛɛw dɛmɛ cogo di ka kɛ ni Jehova ka miiriya ye musow koo la? (Kɛw. 21:8, 9; Ɔrɔm. 2:11; 1 Piyɛri 3:7)