Taga a kɔnɔkow lajɛ

Taga a kɔnɔnakow lajɛ

Maana 51nan: Ruti ni Nawomi

Maana 51nan: Ruti ni Nawomi

BIBULU kɔnɔ, i bena kitabu dɔ sɔrɔ min tɔgɔ ko Ruti. Denbaya dɔ ka maana lo, tuma min na kititigɛlaw lo tun be Israɛldenw kun na. Ruti tun ye musomisɛn ye ka bɔ Mowabu jamana na. A tun tɛ Ala ka jama Israɛl mɔgɔ dɔ ye. Nka a nana tiɲɛn Ala Jehova lɔn tuma min na, a y’a kanu kosɔbɛ. Nawomi ye musokɔrɔba ye min ye Ruti kalan Jehova koo la.

Nawomi ye Israɛl mɔgɔ dɔ ye. Tuma min na dumuni dɛsɛra Israɛl, Nawomi ni a cɛɛ ni u dencɛ fila tagara sigi Mowabu jamana na. Loon dɔ la, Nawomi cɛɛ sara. O kɔ, Nawomi dencɛw ye Mowabu sunguru fila furu. U tɔgɔw ko Ruti ani Ɔripa. Nka saan 10 ɲɔgɔn o kɔ, Nawomi ka dencɛ fila sara. Nawomi n’a buranmuso fila dusu kasira kosɔbɛ! Nawomi bena mun lo kɛ sisan?

Loon dɔ la, Nawomi y’a latigɛ ko a bena tagama jan kɛ ka kɔsegi a faso la. Ruti ni Ɔripa tun b’a fɛ ka to n’a ye, o kama u tugura a kɔ. Nka u tagamana dɔɔni, o kɔ Nawomi yɛlɛmana k’a fɔ a buranmusow ye ko: ‘Aw ye segi ka taga to ni aw baaw ye.’

Nawomi y’a buranmusow daa susu ka sira di u ma. O la, u y’a daminɛ ka kasi, sabu Nawomi koo tun ka di u ye kosɔbɛ. U y’a fɔ ko: ‘Ayi! Anw bena taga n’i ye i ka mɔgɔw fɛ.’ Nka Nawomi y’u jaabi ko: ‘Aw ka kan ka kɔsegi ne denmusow. A ka fisa aw ka taga aw ka soo.’ O la, Ɔripa ye a ka soo sira ta. Nka, Ruti ma sɔn ka kɔsegi.

Nawomi yɛlɛmana k’a fɔ a ye ko: ‘Ɔripa filɛ, ale kɔsegira ka taga. I fana ka tugu a kɔ.’ Nka Ruti y’a jaabi ko: ‘E kana ne waajibiya ka faran i la! A to ne ka taga n’i ye. E bena taga yɔrɔ o yɔrɔ ne fana bena taga yen, e sigiyɔrɔ bena kɛ ne sigiyɔrɔ ye, e ka mɔgɔw bena kɛ ne ka mɔgɔw ye, e ka Ala bena kɛ ne ka Ala ye. E sayɔrɔ, o ye ne fana sayɔrɔ ye, ani ne suu fana be don yen.’ Ruti y’o fɔ minkɛ, Nawomi m’a ɲini k’a waajibiya tugun ko a ka kɔsegi.

A laban, o muso fila sera Israɛl. U sigira o yɔrɔ la. Ruti sinna ka baara daminɛ forow la sabu ɔrizi sumantigɛ tuma tun lo. Cɛɛ dɔ y’a to a ka ɔrizi fɛfɛ a ka foro kɔnɔ, a tɔgɔ ko Bowazi (Boozi). Yala i b’a lɔn jɔn lo ye Bowazi bamuso ye wa? Rahab lo, ka bɔ Zeriko dugu kɔnɔ.

Loon dɔ la, Bowazi y’a fɔ Ruti ye ko: ‘I ye ɲuman min bɛɛ kɛ Nawomi ye, ne ye o mɛn. I sɔnna k’i faa n’i baa n’i faso to yen ka na sigi siya wɛrɛ fɛ i tun tɛ min lɔn. Jehova k’i sara ni ɲuman ye!’

Ruti y’a jaabi ko: ‘I ye ne minɛ ka ɲɛ. I ye kuma ɲuman min fɔ, o ye ne jigi tugu.’ Ruti koo ka di Bowazi ye hali ani a ma mɛɛn, u furula ɲɔgɔn ma. O koo diyara Nawomi ye dɛ! Nka, tuma min na Ruti ni Bowazi ye u ka dencɛ fɔlɔ sɔrɔ min tɔgɔ ko Obɛdi, dɔ farala Nawomi ka ninsɔndiya kan tugun. Obɛdi nana kɛ Dawuda mamacɛ ye. Kɔfɛ an bena koo caaman kalan Dawuda koo la.

Ruti ni Nawomi

Ruti kitabu



Ɲiningaliw

  • Cogo di Nawomi nana a yɛrɛ sɔrɔ Mowabu jamana na?
  • Ruti ni Ɔripa ye jɔn ye?
  • Tuma min na Nawomi y’a fɔ Ruti ni Ɔripa ye ko u ka kɔsegi ka taga u ka mɔgɔw fɛ, olu y’a jaabi cogo di?
  • Bowazi ye jɔn ye, ani a ye Ruti ni Nawomi dɛmɛ cogo di?
  • Bowazi ni Ruti ye deen min bange, a tɔgɔ ko di ani mun na an ka kan k’an hakili to a la?

Ɲiningali wɛrɛw

  • Uruti 1:1-17 kalan.

    Ruti y’a ka kanuya kantigiman yira cogo ɲuman juman na? (Uruti 1:16, 17)

    Saga wɛrɛw be koow kɛ ni kerecɛn mɔlenw ye cogo min na dugukolo kan bi, Ruti ka miiricogo ɲuman be o yira cogo di? (Zan 10:16; Zakari 8:23)

  • Uruti 2:1-23 kalan.

    Ruti ye ɲɛyirali ɲuman juman to bi musomisɛnw ye? (Uruti 2:17, 18; Tal. 23:22; 31:15)

  • Uruti 3:5-13 kalan.

    Ruti sɔnna ka furu Bowazi ma sanni a ka furu kanbele dɔ ma. Bowazi y’o koo jati cogo di?

    Ruti ka koo kɛcogo b’an kalan mun lo la kanuya kantigiman koo la? (Uruti 3:10; 1 Kor. 13:4, 5)

  • Uruti 4:7-17 kalan.

    Bi, kerecɛncɛw be se ka Bowazi ladegi cogo di? (Uruti 4:9, 10; 1 Tim. 3:1, 12, 13; 5:8)