Taga a kɔnɔkow lajɛ

Taga a kɔnɔnakow lajɛ

Maana 53nan: Zɛfite ka dajuru

Maana 53nan: Zɛfite ka dajuru
Zɛfite denmuso

YALA i ma deli ka dajuru dɔ ta ani k’a ye kɔfɛ ko a ka gwɛlɛ k’a dafa wa? O ɲɔgɔn lo ye cɛɛ nin sɔrɔ min be jaa nin kan. O lo y’a to a dusu tiɲɛnin lo ten. Israɛl ka kititigɛla jaa gwɛlɛ dɔ lo, a tɔgɔ ko Zɛfite.

Zɛfite tile la, Israɛldenw tun ye Jehova bila. U tun y’a daminɛ ka kojugu kɛ tugun. O kama, Jehova y’a to Amoniw k’u tɔɔrɔ. O la, Israɛldenw kasira Jehova nɔfɛ ko: ‘An y’i hakɛ ta. Sabari, an kisi!’

Zɛfite n’a ka cɛɛw

Jama ye kojugu minw kɛ, u nimisara o la. U ye Jehova bato kokura k’a yira ko u nimisara. O la, Jehova y’u dɛmɛ tugun.

Jama ye Zɛfite lo sugandi walisa k’u juguw, Amoniw kɛlɛ. Zɛfite tun b’a fɛ kosɔbɛ Jehova k’ale dɛmɛ o kɛlɛ la. O kama, a ye dajuru ta Jehova ye ko: ‘N’i ye Amoniw don ne bolo, ne kɔsegitɔ, mɔgɔ fɔlɔ min bena bɔ ne ka soo kɔnɔ ka ne kunbɛn, ne bena o tigi di i ma.’

Jehova ye Zɛfite ka dajuru lamɛn ani a y’a dɛmɛ ka see sɔrɔ a juguw kan. Zɛfite kɔsegitɔ, i b’a lɔn mɔgɔ fɔlɔ min bɔra a ka soo kɔnɔ k’a kunbɛn wa? A denmuso lo, o min ye a deen kelenpe ye. Zɛfite kulera ko: ‘N denmuso, i ye ne bila dusukasi la ka ne niin tɔɔrɔ. Ne ye n daa di Jehova ma, n tɛ se k’a yɛlɛma tugun.’

Tuma min na Zɛfite denmuso y’a faa ka dajuru koo mɛn, a dusu tiɲɛna fɔlɔ. O dajuru kɔrɔ tun ko a ka kan k’a faa n’a teriw bila ani ka taga a sii tɔɔ bɛɛ kɛ ka baara kɛ Jehova ye a ka fanibugu kɔnɔ Silo. Nka, a y’a fɔ a faa ye ko: ‘N’i ye i daa di Jehova ma, i ka o koo kɛ.’

O cogo la, Zɛfite denmuso tagara Silo ka baara kɛ Jehova ye a ka fanibugu kɔnɔ a sii tɔɔ bɛɛ la. Saan o saan, Israɛlmusow tun be taga bɔ a fɛ ka tile naani kɛ n’a ye k’a ɲɛnagwɛ. Zɛfite denmuso koo tun ka di jama ye sabu a tun ye Jehova ka baaraden ɲuman ye.

Kiritigɛlaw 10:6-18; 11:1-40.



Ɲiningaliw

  • Zɛfite tun ye jɔn lo ye, ani Israɛldenw tun be mun lo kɛ ale ka tile la?
  • Zɛfite tun ye dajuru juman ta Jehova ye?
  • Zɛfite ye see sɔrɔ Amoniw kan, nka mun lo y’a dusu tiɲɛ a setɔ a ka soo?
  • Zɛfite denmuso y’a faa ka dajuru koo mɛn tuma min na, a ye mun lo fɔ?
  • Mun na Zɛfite denmuso koo tun ka di jama ye?

Ɲiningali wɛrɛw

  • Kiritigɛlaw 10:6-18 kalan.

    Israɛldenw ye Jehova kaan bila ka bɔnɛ minw sɔrɔ, an be lasɔmini juman sɔrɔ o koo la? (Kirit. 10:6, 15, 16; Ɔrɔm. 15:4; Yir. 2:10)

  • Kiritigɛlaw 11:1-11, 29-40 kalan.

    Zɛfite ko ale bena a denmuso kɛ “saraka jɛnita” ye. An b’a lɔn cogo di ko o kɔrɔ tun tɛ k’a faga yɛrɛyɛrɛ la ani k’a jɛni tasuma na? (Kirit. 11:31; Lev. 16:24; Det. 18:10, 12)

    Kɔrɔ juman na Zɛfite y’a denmuso di ka kɛ saraka ye?

    Zɛfite ye dajuru ta Jehova ye. A ye o koo jati cogo min na, an be kalan juman sɔrɔ o la? (Kirit. 11:35, 39; Waaj. 5:4, 5; Mat. 16:24)

    Cogo juman na Zɛfite denmuso ka ɲɛyirali ɲuman be kerecɛn denmisɛnw jija u k’u yɛrɛ di kudayi cidenya baara kama? (Kirit. 11:36; Mat. 6:33; Fil. 3:8)