Taga a kɔnɔkow lajɛ

Taga a kɔnɔnakow lajɛ

Maana 30nan: Ala be Musa ci

Maana 30nan: Ala be Musa ci

LOON dɔ la, Musa y’a ka sagaw dɛndɛ fɔɔ ka se Orɛbu kulu gɛrɛfɛ. O yɔrɔ la, a ye tasuma manatɔ ye yiritunin dɔ la nka a tun tɛ jɛnina!

Musa ni yiritunin manatɔ

Musa y’a fɔ ko: ‘Nin ye kabako ye. Ne bena gwɛrɛ ka kabako nin filɛ ka ɲɛ.’ A gwɛrɛla tuma min na, kumakan dɔ bɔra yiritunin na k’a fɔ ko: ‘I kana gwɛrɛ kojugu. I ka sanbara bɔ bari i lɔnin be yɔrɔ min na, o ye yɔrɔ senuman ye.’ Ala lo tun be kumana a fɛ mɛlɛkɛ dɔ daa la. O kama, Musa y’a ɲɛda biri.

Ala y’a fɔ a ye ko: ‘Ne ye n ka mɔgɔw ka sɛgɛn ye Misira. O kama ne bena u hɔɔrɔnya. Ne bena e lo ci ka taga u labɔ Misira jamana na.’ Jehova tun labɛnnin lo k’u ladon Kanaan jamana ɲuman kɔnɔ.

Nka Musa y’a fɔ ko: ‘Ne tɛ foyi ye. Ne be se k’o kɛ cogo di? Ayiwa, ni ne tagara, Israɛldenw mana a fɔ ne ye ko “Jɔn lo ye i ci?” Ne bena mun lo fɔ u ye?’

Ala y’a jaabi ko ‘I k’a fɔ u ye ko: “JEHOVA, Ibrayima ka Ala, Isiyaka ka Ala, ani Yakuba ka Ala lo ye ne ci aw ma.” ’ Jehova y’a fara a kan ko: ‘O lo ye ne tɔgɔ ye fɔɔ abada.’

Musa y’a jaabi ko: ‘Nka n’u ma la a la ko e lo ye ne ci do?’

Ala y’a ɲininga ko: ‘Mun lo b’i bolo?’

Musa y’a jaabi ko: ‘Bere lo.’

Ala ko: ‘A fili dugu ma.’ Musa ye bere fili minkɛ, a kɛra saa ye. O kɔ, Jehova ye kabako wɛrɛ kɛ k’a yira Musa la. A y’a fɔ a ye ko: ‘I bolo don i ka dereke kɔrɔ.’ Musa y’a bolo don a ka dereke kɔrɔ. A y’a bolo bɔ tuma min na, a gwɛra parapara! A bolo kɛra i ko kunatɔ bolo. O kɔ, Jehova ye see di Musa ma a ka kabako sabanan dɔ kɛ. A laban, a y’a fɔ a ye ko: ‘I mana na o kabakow kɛ, Israɛldenw bena la a la ko ne lo ye i ci.’

O kɔ, Musa tagara soo k’a fɔ Zetoro ye ko: ‘I k’a to ne ka kɔsegi ka taga n ka mɔgɔw cogoya filɛ Misira jamana na.’ O la, Zetoro ye sira di Musa ma, ani Musa ye Misira sira minɛ.

Ɛkizɔdi 3:1-22; 4:1-20.



Ɲiningaliw

  • I ɲɛɛ be kulu min na jaa nin kan, a tɔgɔ ko di?
  • Musa y’a ka sagaw dɛndɛ ka se kulu gɛrɛfɛ tuma min na, a ɲɛɛ lara kabako juman lo kan?
  • Kumakan dɔ bɔra yiritunin manatɔ la ka mun lo fɔ, ani jɔn kumakan tun lo?
  • Tuma min na Ala y’a fɔ Musa ye ko ale lo bena a ka mɔgɔw labɔ Misira, Musa y’a jaabi cogo di?
  • Ala ko Musa ka mun lo fɔ ni mɔgɔw y’a ɲininga ko jɔn lo y’a ci?
  • Musa tun bena a yira cogo di ko Ala lo y’a ci?

Ɲiningali wɛrɛw

  • Ɛkizɔdi 3:1-22 kalan.

    Musa ka koo b’an jigi sigi cogo di ko Jehova bena an dɛmɛ n’a b’an ɲɛɛ na ko see t’an ye ka Alako baara dɔ kɛ? (Ɛkiz. 3:11, 13; 2 Kor. 3:5, 6)

  • Ɛkizɔdi 4:1-20 kalan.

    Musa ye saan 40 minw kɛ Madiyan, o y’a ka miiriya yɛlɛmana cogo di, ani mɔgɔ minw b’a fɛ ka kunkanbaara sɔrɔ kafo kɔnɔ olu be se ka kalan juman sɔrɔ o la? (Ɛkiz. 2:11, 12; 4:10, 13; Mise 6:8; 1 Tim. 3:1, 6, 10)

    Hali ni Jehova tɛmɛna a ka ɔriganisasiyɔn fɛ k’an kolo, Musa ka koo b’an jigi sigi mun lo la? (Ɛkiz. 4:12-14; Zab. 103:14; Eburuw 12:4-11)