Taga a kɔnɔkow lajɛ

Taga a kɔnɔnakow lajɛ

Maana 29nan: Mun na Musa be bolila?

Maana 29nan: Mun na Musa be bolila?

A FILƐ Musa be bolila ka bɔ Misira. Cɛɛ minw b’a gwɛnna, i ɲɛɛ b’u la wa? I b’a lɔn mun na u b’a fɛ ka Musa faga wa? An k’o filɛ ɲɔgɔn fɛ.

Musa be bolila ka bɔ Misira

Musa kɔrɔbayara Misira masacɛ Farahuna ka soo kɔnɔ. A kɛra mɔgɔba hakilitigi ye. Musa tun b’a lɔn ko ale tɛ Misiraka ye, ko a wolobaga tigitigiw ye Israɛldenw lo ye, u minw ye jɔɔnw ye.

Loon dɔ la, Musa saan 40nan na, a y’a latigɛ ka taga a balimaw cogoya filɛ. A y’a ye ko tɔɔrɔ jugu be lara u kan. A ye Misiraka dɔ ye min be Israɛlden jɔncɛ dɔ bugɔra. Musa y’a ye ko mɔgɔ si ɲɛɛ t’a la minkɛ, a ye Misiraka bugɔ k’a faga ani k’a suu datugu cɛncɛn kɔnɔ.

O dugusagwɛ, Musa kɔsegira ka na a balimaw filɛ tugun. A tun b’a miiri ko a be se k’u dɛmɛ ka bɔ jɔnya la. Nka a ye Israɛlden fila kɛlɛkɛtɔ ye minkɛ, joo tun tɛ min fɛ, a y’a fɔ ale ye ko: ‘Mun na i be i balima bugɔra?’

O cɛɛ y’a jaabi ko: ‘Jɔn ye i bila an kun na k’i kɛ an kitibaga ye? A b’i kɔnɔ ka ne faga i n’a fɔ i ye Misiraka nin faga cogo min na wa?’

Musa siranna. A y’a ye ko a ye min kɛ Misiraka nin na, mɔgɔw bɔra o kala ma. Hali Farahuna y’o mɛn, ani a ye mɔgɔw bila ka Musa faga. Musa waajibiyara ka boli ka bɔ Misira.

A tagara yɔrɔ jan, Madiyan jamana na. O yɔrɔ la, a jigira Zetoro ka soo, ani a y’ale denmuso dɔ furu min tɔgɔ ko Sipora. Musa kɛra Zetoro ka sagadɛndɛna ye. A tora Madiyan jamana na ka saan 40 kɛ. A ye saan 80 sɔrɔ sisan. Loon dɔ la, k’a to a be Zetoro ka sagaw dɛndɛna, a ye kabako dɔ ye min ye a ka ɲɛnamaya kɛcogo yɛlɛma pewu. An k’a filɛ o kabako ye min ye.

Ɛkizɔdi 2:11-25; Kɛwaliw 7:22-29.



Ɲiningaliw

  • Musa bonyana yɔrɔ juman na, nka a tun be mun lo lɔn a bangebagaw koo la?
  • Musa ye saan 40 sɔrɔ tuma min na, a ye mun lo kɛ?
  • Israɛlden min tun be kɛlɛ kɛra, Musa ye mun lo fɔ a ye, ani o cɛɛ y’a jaabi cogo di?
  • Mun na Musa bolila ka bɔ Misira?
  • Musa bolila ka taga min, ani a ye jɔn lo kunbɛn o yɔrɔ la?
  • Musa ye mun lo kɛ saan 40 kɔnɔ a bɔnin kɔ Misira?

Ɲiningali wɛrɛw

  • Ɛkizɔdi 2:11-25 kalan.

    Hali k’a to Musa kalanna Misirakaw ka hakilitigiya la saan caaman kɔnɔ, cogo di a y’a ka kantigiya yira Jehova n’a ka mɔgɔw ta fan fɛ? (Ɛkiz. 2:11, 12; Eburuw 11:24)

  • Kɛwaliw 7:22-29 kalan.

    Musa y’a ɲini ka Israɛldenw kisi ka bɔ jɔnya la Misirakaw bolo a yɛrɛ ma. An be kalan juman lo sɔrɔ o la? (Kɛw. 7:23-25; 1 Piyɛri 5:6, 10)