Taga a kɔnɔkow lajɛ

Taga a kɔnɔnakow lajɛ

Maana 23nan: Farahuna ka sikow

Maana 23nan: Farahuna ka sikow

SAAN fila tɛmɛna, nka Yusufu bele be kaso la. Masacɛ ka dɔlɔ dibaga m’a hakili to a la. Loon dɔ sufɛ, Farahuna ye siko kabakoman fila dɔw kɛ nka a m’u kɔrɔ lɔn. I ɲɛɛ be a sinɔgɔtɔ la wa? O dugusagwɛ sɔgɔma, Farahuna y’a ka hakilitigiw weele k’a ka sikow lakali u ye. Nka u ma se k’u kɔrɔ fɔ a ye.

O la sa, dɔlɔ dibaga hakili jigira Yusufu koo la. A y’a fɔ Farahuna ye ko: ‘Ne ni cɛɛ dɔ tun be kaso la ɲɔgɔn fɛ, a tun be se ka sikow kɔrɔ fɔ.’ Farahuna sinna k’a fɔ k’u ka Yusufu labɔ kaso la.

Farahuna y’a fɔ Yusufu ye ko: ‘Siko la, ne ye misi wolonfila ye, u tun ka bonbon, u fana ka ɲi. O kɔ, ne ye misi wolonfila wɛrɛ ye, olu fasanin tun lo kosɔbɛ. Misi fasaninw ye misi belebelebaw kunu.

Farahuna be sikora

‘Ne ka siko filanan na, a filɛ suman tinsan ɲuman wolonfila bɔra kala kelen na, u fanin tun be kisɛw la. O kɔ, suman tinsan wolonfila wɛrɛ bɔra, u janin tun lo ani u fɔsɔnfɔsɔnnin lo. Tinsan fɔsɔnfɔsɔnninw ye tinsan ɲuman wolonfila kunu.’

Yusufu y’a fɔ Farahuna ye ko: ‘I ka sikow be fɛɛn kelen le fɔ. Misi belebeleba wolonfila ani suman tinsan ɲuman wolonfila ye saan wolonfila lo ye, ani misi fasanin wolonfila ni suman tinsan fɔsɔnfɔsɔnnin wolonfila ye saan wolonfila wɛrɛ ye. Saan wolonfila kɔnɔ, suman bena sɔrɔ kosɔbɛ Misira jamana na. O kɔ, kɔngɔ bena don ka saan wolonfila kɛ.’

Yusufu y’a fɔ Farahuna ye ko: ‘I ka cɛɛ hakilitigi dɔ sugandi walisa a ka sumanw lajɛn ka mara o saan ɲuman wolonfila nunu kɔnɔ. O la, jama tɛna sa kɔngɔ bolo saan wolonfila nɔfɛtaw kɔnɔ.’

O ladili diyara Farahuna ye ani a ye Yusufu sugandi a ka sumanw lajɛn ka mara. Yusufu kɛra Farahuna ka lasigidenw bɛɛ la mɔgɔba ye Misira.

Saan seegi tɛmɛnin kɔ, kɔngɔ wagati la, Yusufu ye mɔgɔ dɔw natɔ ye Misira. I b’a lɔn mɔgɔ minw lo wa? A kɔrɔcɛ 10 nunu tun lo! U facɛ Yakuba tun y’u ci Misira sabu dumunifɛnw tun y’a daminɛ ka dɛsɛ Kanaan jamana na. Yusufu y’a kɔrɔcɛw lɔn, nka olu m’ale lɔn. I b’a lɔn fɛɛn min kama wa? Yusufu bonyana ani fani sifa wɛrɛ tun b’a kaan na.

I hakili b’a la ko Yusufu fitinin tuma na, a sikora ko a balimaw nana u kunbiri gwan ale kɔrɔ wa? Sisan a hakili jigira o la ani a y’a faamu ko Ala lo y’a ci Misira koo dɔ kama. Yusufu bena a balimaw minɛ cogo di? An k’o filɛ.

Zɛnɛzi 41:1-57; 42:1-8; 50:20.



Ɲiningaliw

  • Mun lo ye Farahuna sɔrɔ loon dɔ sufɛ?
  • Mun na dɔlɔ dibaga hakili labanna ka jigi Yusufu koo la?
  • I ko i ɲɛɛ b’a la jaa nin kan, Farahuna ye siko fila jumanw lo kɛ?
  • Yusufu ye o sikow kɔrɔ fɔ cogo di?
  • Cogo juman na Yusufu kɛra Farahuna ka lasigidenw bɛɛ la mɔgɔba ye Misira?
  • Mun lo y’a to Yusufu balimacɛw nana Misira, ani mun na u ma Yusufu lɔn?
  • Yusufu hakili jigira siko juman lo la, ani o y’a dɛmɛ ka mun lo faamu?

Ɲiningali wɛrɛw

  • Zɛnɛzi 41:1-57 kalan.

    Yusufu ye mɔgɔw hakili sama ka taga Jehova kan cogo di, ani kerecɛnw be se k’a ladegi cogo di bi? (Zɛnɛzi 41:16, 25, 28; Mat. 5:16; 1 Piyɛri 2:12)

    Saan dɔw la suman sɔrɔla kosɔbɛ Misira jamana na. O kɔ, kɔngɔ donna. O b’a yira ka gwɛ cogo di ko Jehova ka mɔgɔw cogoya tɛ kelen ye ni kerecɛn tɔgɔtigiw ta ye Alako ta fan fɛ? (Zɛnɛzi 41:29, 30; Amɔsi 8:11, 12)

  • Zɛnɛzi 42:1-8 ani 50:20 kalan.

    Ni mɔgɔ dɔ lɔyɔrɔ kosɔn a kan ka ni bonya ye, yala koo jugu lo Jehova batobagaw k’u biri a tigi ɲɛɛ kɔrɔ walisa ka bonya la a kan n’o ye dugu landa ye wa? (Zɛnɛzi 42:6)