Taga a kɔnɔkow lajɛ

Taga a kɔnɔnakow lajɛ

Maana 16nan: Isiyaka ka furuko

Maana 16nan: Isiyaka ka furuko

MUSO min be jaa nin kan, jɔn lo? A tɔgɔ ko Erebɛka. A be nana cɛɛ min kunbɛn o ye Isiyaka ye. A bena na kɛ a muso ye. I b’a lɔn o koo kɛra cogo min na wa?

Ayiwa, Isiyaka facɛ Ibrayima tun b’a fɛ ka muso ɲuman ɲini a dencɛ ye. A tun t’a fɛ Isiyaka ka Kanaan sunguru dɔ furu sabu o mɔgɔw tun be ngalon alaw lo bato. O kama, Ibrayima y’a ka baaraden weele k’a fɔ a ye ko: ‘Ne b’a fɛ i ka kɔsegi ne faso la Aran ka muso ɲini ne dencɛ Isiyaka ye.’

Ibrayima ka baaraden sinna ka ɲɔgɔmɛ tan ta ka tagama jan kɛ. A surunyana Ibrayima ka faso la tuma min na, a tagara lɔ kɔlɔn dɔ daa la. O kɛra wulada fɛ, tuma min na dugu kɔnɔ musow tun be na jii bɔ o kɔlɔn kɔnɔ. O lo y’a to Ibrayima ka baaraden ye Jehova deli k’a fɔ ko: ‘Muso min mana jii di ne ni n ka ɲɔgɔmɛw ma, a to ale ka kɛ i sagolamuso ye Isiyaka fɛ.’

Erebɛka be Isiyaka kunbɛnna

Dɔɔni o kɔ, Erebɛka nana jii bɔ yɔrɔ la. Baaraden ye minji deli a fɛ tuma min na, a ye dɔ di a ma. O kɔ a ye jii bɔ, ɲɔgɔmɛw bɛɛ y’a min ka fa. O tun kɛra baaraba ye sabu ɲɔgɔmɛw be jii caaman caaman min.

Erebɛka tilara o baara la tuma min na, Ibrayima ka baaraden y’a ɲininga a facɛ tɔgɔ la. A y’a ɲininga fana n’a be se ka si u fɛ. Erebɛka y’a fɔ ko: ‘Ne faa tɔgɔ ko Betuwɛli ani siyɔrɔ be yen an ka soo.’ Ibrayima ka baaraden tun b’a lɔn ko Betuwɛli ye Ibrayima balimacɛ Nawɔri ka dencɛ ye. O la, a y’a kunbiri gwan duguma ka Jehova fo sabu a y’ale ɲɛminɛ fɔɔ ka na se Ibrayima ka somɔgɔw fɛ.

O loon sufɛ, Ibrayima ka baaraden y’a nakun fɔ Betuwɛli ni Erebɛka balimacɛ Laban ye. U fila bɛɛ sɔnna ko Erebɛka be se ka taga n’a ye ani ka furu Isiyaka ma. U ye Erebɛka ɲininga tuma min na, a ye mun lo fɔ do? A y’a fɔ ‘Ɔnhɔn,’ ko a b’a fɛ ka taga. O la, o dugusagwɛ bɛɛ, u yɛlɛla ɲɔgɔmɛw kan ka tagama jan daminɛ ka segi Kanaan jamana na.

U tagara se wulada fɛ. Erebɛka ye cɛɛ dɔ tagamatɔ ye foro la. Isiyaka tun lo. A ye Erebɛka ye, a ninsɔndiyara. A bamuso Sara tun sara a saan saba ye nin ye ani o dusukasi tun b’a kan hali bi. Nka sisan, Isiyaka ye Erebɛka kanu kosɔbɛ ani a ninsɔn diyara tugun.

Zɛnɛzi 24:1-67.



Ɲiningaliw

  • Cɛɛ ni muso minw be jaa nin kan, jɔn lo?
  • Ibrayima ye mun lo kɛ walisa ka muso sɔrɔ a dencɛ ye, ani mun na?
  • Ala ye Ibrayima ka baaraden ka delili jaabi cogo di?
  • Tuma min na u ye Erebɛka ɲininga n’a b’a fɛ ka furu Isiyaka ma, a ye mun lo fɔ?
  • Mun lo y’a to Isiyaka ninsɔn diyara tugun?

Ɲiningali wɛrɛw

  • Zɛnɛzi 24:1-67 kalan.

    Erebɛka ye jogo ɲuman jumanw lo yira tuma min na a ye Ibrayima ka baaraden sɔrɔ kɔlɔnda la? (Zɛnɛzi 24:17-20; Tal. 31:17, 31)

    Ibrayima ye labɛn minw kɛ walisa ka muso ɲini Isiyaka ye, o be ɲɛyirali ɲuman juman di kerecɛnw ma bi? (Zɛnɛzi 24:37, 38; 1 Kor. 7:39; 2 Kor. 6:14)

    Mun na an ka kan ka wagati kunmabɔ walisa ka miiri i ko Isiyaka y’a kɛ cogo min na? (Zɛnɛzi 24:63; Zab. 77:13; Fil. 4:8)