Taga a kɔnɔkow lajɛ

Taga a kɔnɔnakow lajɛ

Maana 33nan: Kɔgɔji wulen tigɛko

Maana 33nan: Kɔgɔji wulen tigɛko

A FILƐ koo min be kɛra! Cɛɛ min y’a ka bere kɔrɔta kɔgɔji sanfɛ, o ye Musa ye. Minw lɔnin b’a gɛrɛfɛ baji faan wɛrɛ la, olu ye Israɛldenw ye minw kisira ka bɔ jii la. Nka, jii ye Farahuna n’a ka kɛlɛbolo bɛɛ dumu. An k’a filɛ o koo kɛra cogo min na.

Misirakaw ka kɛlɛbolo be tununa baji kɔnɔ

An y’a ye ka tɛmɛ ko tɔɔrɔ tannan kɔ, Farahuna ye sira di Israɛldenw ma u ka taga. U tun ye cɛɛ 600 000 ɲɔgɔn ye, ka fara musow ni denmisɛnw kan. Siya wɛrɛ caaman bɔra n’u ye sabu u lara Jehova la. U bɛɛ y’u ka bɛgɛnw minɛ ka taga n’u ye, a misɛnmanw n’a kunbabaw.

Sanni u ka taga, Israɛldenw ye faniw, sanufɛnw ni warigwɛfɛnw deli Misirakaw fɛ. Tɔɔrɔ laban tun ye siranyaba bila Misirakaw la. O kama Israɛldenw ye fɛɛn o fɛɛn deli u fɛ, u y’o di u ma.

Tile damanin kɔ, Israɛldenw sera Kɔgɔji Wulen daa la. U sigira yen ka lafiɲɛ. O wagati kelen na, Farahuna n’a ka mɔgɔw y’a daminɛ ka nimisa ko mun na u y’a to Israɛldenw tagara. U tun b’a fɔ ko ‘Mun na an yɛrɛ ye sira di an ka jɔɔnw ma!’

O kama, Farahuna y’a ka miiriya yɛlɛma tugun. A y’a ka kɛlɛkɛwotorow labɛn ka wuli n’a ka kɛlɛdenw ye. A ye Kɛlɛkɛwotoro ɲuman kɛmɛ wɔɔrɔ ani Misira wotoro tɔɔw bɛɛ ta ka Israɛldenw nɔgwɛn.

Israɛldenw ye Farahuna n’a ka kɛlɛbolow natɔ ye u kɔfɛ minkɛ, u siranna kosɔbɛ. Tagayɔrɔ si tun tɛ yen: Kɔgɔji Wulen tun be u ɲɛfɛ, ani Misirakaw tun be nana u kɔfɛ. Nka, Jehova ye sankaba dɔ bila a ka mɔgɔw ni Misirakaw cɛ. O la, Misirakaw tun tɛ se ka Israɛldenw ye walisa k’u kɛlɛ.

Jehova y’a fɔ Musa ye ko a k’a ka bere kɔrɔta Kɔgɔji Wulen sanfɛ. A y’a ka bere kɔrɔta minkɛ, Jehova y’a kɛ fɔɲɔba dɔ wulila kɔrɔn fɛ. Kɔgɔji cɛɛ tigɛra fila ye, a kɛra i n’a fɔ kogo u kinibolo la ani u numanbolo la.

Israɛldenw tɛmɛna kɔdingɛ janin fɛ. Sanni o mɔgɔ miliyɔn caaman n’u ka bɛgɛnw bɛɛ ka se ka baji cɛɛ tigɛ hɛɛrɛ la, o ye lɛri caaman kɛ. A laban, Misirakaw ɲɛɛ lara Israɛldenw kan tugun. U ka jɔɔnw tun bɔra u bolo! O kama, u girinna ka don kɔdingɛ kɔnɔ u nɔfɛ.

U donna tuma min na, Ala y’a kɛ u ka wotorow seenw bɔra. Misirakaw siranna kosɔbɛ, ani u y’a daminɛ ka kule ko: ‘An ka bɔ yan, Jehova be an kɛlɛla Israɛldenw kosɔn!’ Nka, u tun tɛ se ka bɔ yen tugun.

O tuma lo la, Jehova y’a fɔ Musa ye ko a k’a ka bere kɔrɔta Kɔgɔji Wulen sanfɛ (a filɛ jaa kan). Musa y’o lo kɛ, ani jii min tun wulila i ko kogow, o segira Misirakaw n’u ka wotorow kan k’u datugu. Farahuna ka kɛlɛbolo bɛɛ lo tun donna Israɛldenw nɔfɛ kɔdingɛ kɔnɔ. O kɛlɛbolo mɔgɔ si ma kisi!

Ala ka mɔgɔw ɲagalila kosɔbɛ sabu olu kisira. Cɛɛw ye dɔnkili la walisa ka Jehova tando. U ko: ‘Jehova ye see sɔrɔ a juguw kan cogo kabakoman na. A ye soow ni sotigiw fili kɔgɔji kɔnɔ.’ Musa kɔrɔmuso Miriyama y’a ka dundun ta, ani musow bɛɛ bɔra ka tugu a kɔ n’u ka dundunw ye. U tun be dɔɔn kɛ ni ɲagali ye ani ka cɛɛw laminɛ ko: ‘Jehova ye see sɔrɔ a juguw kan cogo kabakoman na. A ye soow ni sotigiw fili kɔgɔji kɔnɔ.’

Ɛkizɔdi sapitiri 12-15.



Ɲiningaliw

  • Ka musow ni denmisɛnw niin bɔ a la, Israɛldenw cɛɛ joli lo bɔra Misira, ani jɔn lo farala u kan fana?
  • Sira dili kɔ Israɛldenw ma, Farahuna ye mun lo miiri, ani a ye mun lo kɛ do?
  • Jehova ye mun lo kɛ ka Misirakaw bali u ka ale ka mɔgɔw kɛlɛ?
  • Mun lo kɛra tuma min na Musa y’a ka bere kɔrɔta Kɔgɔji Wulen sanfɛ, ani Israɛldenw ye mun lo kɛ?
  • Mun lo kɛra tuma min na Misirakaw girinna ka don kɔdingɛ kɔnɔ Israɛldenw nɔfɛ?
  • Israɛldenw ye mun lo kɛ k’a yira ko u ninsɔndiyara ani k’u be Jehova waleɲuman lɔn sabu a y’u kisi?

Ɲiningali wɛrɛw

  • Ɛkizɔdi 12:33-36 kalan.

    Israɛldenw ye saan caaman minw kɛ jɔnya la Misirakaw bolo, Jehova ye mun lo kɛ walisa k’o sara di u ma? (Ɛkiz. 3:21, 22; 12:35, 36)

  • Ɛkizɔdi 14:1-31 kalan.

    Yanni dɔɔni Arimagedɔn kɛlɛ bena kɛ Jehova sagokɛlaw seen kɔrɔ. O la do, Musa ye kuma minw fɔ Ɛkizɔdi 14:13, 14 kɔnɔ, u be nɔɔ juman to u kan? (2 Til. Kib. 20:17; Zab. 91:8)

  • Ɛkizɔdi 15:1-8, 20, 21 kalan.

    Mun na Jehova sagokɛlaw ka kan ka dɔnkiliw la k’a tando? (Ɛkiz. 15:1, 2; Zab. 105:2, 3; Yir. 15:3, 4)

    Miriyama ni muso tɔɔw kɛtɔ ka Jehova tando Kɔgɔji Wulen daa la, u ye ɲɛyirali juman di bi kerecɛn musow ma? (Ɛkiz. 15:20, 21; Zab. 68:12)