Taga a kɔnɔkow lajɛ

Taga a kɔnɔnakow lajɛ

Walisa ka ɲinan ka dramu kɛ, u nana ni wɔyɔgɔ kilo 27 500 lo ye Mt. Ebo ka studio la.

BAARA JUMAN LO BE KƐ N’I KA NILIW YE

Videwo minw labɛnna saan 2020 ka tile saba lajɛnba kama, o min barokun ko: “Aw ka nisɔndiya tuma bɛɛ”!

Videwo minw labɛnna saan 2020 ka tile saba lajɛnba kama, o min barokun ko: “Aw ka nisɔndiya tuma bɛɛ”!

Saan 2020, UTI TILE 10

Tile saba lajɛnbaw ka videwow b’an dusukun sɔrɔ yɛrɛ le ani u b’an dɛmɛ ka Bibulu ka kalanw faamu koɲuman. Saan 2020 ka tile saba lajɛnba barokun tun ko: “Aw ka nisɔndiya tuma bɛɛ”! Videwo 114 lo yirala, ani Koow Ɲɛnabɔla Jɛnkulu mɔgɔw n’u dɛmɛbagaw ye kalan 43 lo kɛ o tile saba lajɛnba la. N’a sɔrɔ i b’a fɔra i yɛrɛ ye ko jaa baaraba lo kɛra ani wariba lo bɔra walisa ka se k’o videwow labɛn dɛ!

Duniɲa kuru bɛɛ kɔnɔ, balima 900 ɲɔgɔn lo y’u yɛrɛ di, k’u ka wagati n’u ka setigiya fana kɛ ka dɛmɛ don k’o tile saba lajɛnba labɛn. U ye lɛri 100 000 ni kɔ bɛɛ le kɛ o baara la saan fila ni kɔ ɲɔgɔn kɔnɔ. U ye lɛri 70 000 lo kɛ fana baara la walisa ka miniti 76 dramu nin labɛn: Neemi: “Nisɔndiya min be bɔ Masaba [Jehova] fɛ, o le bena kɛ aw ka barika sɔrɔyɔrɔ ye.”

Minw bɛɛ y’u yɛrɛ di o baara kama, wari caaman lo kɛra k’u ladon. Ani u mako tun be baarakɛminanw, dɛmɛ ani fɛɛn wɛrɛ minw bɛɛ la ka se k’o baara kɛ, wari caaman lo donna o la fana.

Balimacɛ Jared Gossman be baara kɛ Audio-Video jɛnkulu kɔnɔ ani a y’a fɔ ko: “Kalanko ɲɛnabɔbagaw ka kɔmite ani Koow Ɲɛnabɔla Jɛnkulu b’a fɛ an ka videwow ka mɔgɔw ka kokɛcogow yira ka bɔ duniɲa yɔrɔ caaman na. Mun na do? Sabu an be denbaya min kɔnɔ, a mɔgɔw be duniɲa yɔrɔ bɛɛ la ani an ka videwow ka ɲi k’o yira. Ka se k’o laɲinita dafa, jɛnkulu 24 ye baara kɛ ɲɔgɔn fɛ. O jɛnkuluw sigira jamana 11 kɔnɔ. An mako tun be wari caaman na ani ka koow labɛn ka ɲɛ walisa balima minw be baara kɛ duniɲa kuru bɛɛ kɔnɔ, olu ka se ka baara kɛ ɲɔgɔn fɛ.”

Walisa ka se k’an ka videwo caaman labɛn, an mako tun be baarakɛminan tigitigi dɔw la. Ɲɛyirali fɛ, ka se ka Neemi ka dramu kɛ, an ye minan dɔw kɛ ka yɔrɔ dɔ labɛn Mt. Ebo ka studio kɔnɔ, o min yɔrɔ man jan ni Patterson ye (Etazini jamana na). Walisa ka baara kɛ ni niliw ye cogo fisaman na ani o wagati kelen na ka dramu dɔ labɛn min b’a yira koow tun be cogo min na tigitigi fɔlɔfɔlɔ la, balimaw ye kogo fɛgɛman dɔ dilan min bɔnin be Zeruzalɛmu kogow ma Biblu sɛbɛ wagati la. O kogo faanw bɛɛ kɛra ni lɔgɔ lo ye min janya tun ye mɛtɛrɛ wɔɔrɔ ye, ani pɛntiri lara a kan k’a kɛ i n’a fɔ kogo yɛrɛ yɛrɛ. O kama, a tun ka nɔgɔ k’o kogow ta ka bila yɔrɔ wɛrɛ la ani k’u labɛn ka kɛɲɛ ni dramu yɔrɔ dɔw ye. O cogo la, an mako ma kɛ minan caamanba la ten. O bɛɛ n’a ta, an ye miliyɔn 55 ni tilan ɲɔgɔn lo kɛ ka yɔrɔw dɔrɔn labɛn o dramu kama. *

K’a lɔn min bɛɛ kɛra walisa ka tile saba lajɛnba nin labɛn, o b’an lasun ka Jehova waleɲuman lɔn kosɔbɛ ɲinan ka tile saba lajɛnba kosɔn. A lanin b’a la ko baara min bɛɛ kɛra walisa k’o porogramu labɛn, o bena mɔgɔw lasun duniɲa yɔrɔ bɛɛ kɔnɔ k’u kaan fara ɲɔgɔn kan ka Jehova tando. An b’aw bɛɛ fo sabu aw y’aw tɛgɛ labila ka niliw kɛ donate.jw.org kan ani fɛɛrɛ wɛrɛw sababu fɛ.

^ dakun 5 Tuma min na yɔrɔw tun be labɛnna Neemi ka dramu kama, o y’a sɔrɔ Covid-19 fɔɲɔbana ma daminɛ fɔlɔ. O tuma na, a tun ma ɲini mɔgɔw fɛ u ka furancɛ dɔ to u ni ɲɔgɔn cɛ.