Ala o mambo mena me

Ala o ebambu a mongo

JOKWA 1

Njika Myango ma Bwam Mena me e?

Njika Myango ma Bwam Mena me e?

1. Njika myango mi mawe̱ na Loba e?

Loba a mapula ná bato ba bwane̱ longe̱ muńe̱nge̱ o wase. A to̱ndi mbel’a moto, ońola nika nde a wekino̱ wase na me̱se̱ me oten. Son a ponda a me̱nde̱ wanea bato ba bekombo be̱se̱ kie̱le̱ ni maye̱ ńa bwam. A me̱nde̱ sunga mbel’a moto tongwea na bo̱le̱ njo̱m ye̱se̱ i mawane̱ take.​—Langa Yeremia 29:11.

Janea to̱ diwo̱ di si we̱li o bo̱le̱ njo, maboa to̱ kwedi. Nde myango ma bwam me nde ná, son a ponda Loba a mabola ná janea lao di ńo̱se na timbane̱ manea ma bato me̱se̱. Be̱se̱ be owas’a di janea ba me̱nde̱ bwane̱ musango na ja la bwam muńe̱nge̱.​—Langa Yesaya 25:8; 33:24; Daniel 2:44.

2. Ońola nje myango ma bwam meno̱ mweńa jita we̱nge̱ e?

Take e me̱nde̱ nde o bo̱ o wase ponda ńena Loba a me̱nde̱no̱ o ńamse̱ bato ba bobe. (Sefańa 2:3) Njika ponda nika e me̱nde̱no̱ o bolane̱ e? Eyal’a Loba e se̱le̱ bīse̱ o boso ba ponda ndutu ye̱se̱ yena i mako̱ye̱ mbel’a moto we̱nge̱. Mambo ma bobe me̱se̱ ma mabolane̱ o wase ma malee̱le̱ ná ponda Loba ńā be̱be̱.​—Langa 2 Timoteo 3:1-5.

3. Nje jangame̱ne̱no̱ o bola e?

Jangame̱ne̱ jokwa bia nja ńe Loba tongwea n’Eyal’ao, Bibe̱l. Ńe nde ka kalati sango ńe ndolo a lomedino̱ biso̱. E malangwea biso̱ ne̱ni bwane̱ longe̱ muńe̱nge̱ o mbad’a bwam we̱nge̱, na ne̱ni bwane̱ longe̱ la bwindea muńe̱nge̱ o was’a peńa. Ye mbale̱ ná bato bō̱ ba si me̱nde̱ bwa muńe̱nge̱ ná we o kusa jongwane̱ o so̱ṅtane̱ Bibe̱l. Nde, kana Loba a kakane̱no̱ biso̱ kie̱le̱ ni maye̱ ni peti do̱lo̱, di s’ese̱le̱ ná to̱ moto a súbise̱ biso̱ mo̱.​—Langa Minia 29:25; Bebīsedi 14:6, 7.