Ala o mambo mena me

Ala o ebambu a mongo

JOKWA 2

Nja Ńe Loba e?

Nja Ńe Loba e?

1. Ońola nje jangame̱ne̱no̱ o jowe̱ Loba e?

Loba la mbale̱ nde le Muweked’a me̱se̱. A si be̱n bebotedi a si me̱nde̱ pe̱ to̱ be̱ne̱ su. (Myenge 90:2) E nde Tongo a myango ma bwam mi maso̱be̱ o Bibe̱l. (1 Timoteo 1:11) Jangame̱ne̱ nde o jowe̱ mo̱me̱ne̱ mō̱, ońolana mo̱ nde a boli biso̱ longe̱.​—Langa Bebīsedi 4:11.

2. Ne̱ni Loba eno̱ e?

Mot’a benama to̱ mō̱ a se̱n Loba, ebanja ná e nde Mudī. Nika ná, e nde ebe̱yed’a longe̱ yāsame̱ jita buka ya bewekedi be o wase. (Yohane 1:18; 4:24) To̱ na nika di si me̱ne̱no̱ Loba, bede̱mo bao be me̱ne̱ne̱ o mambo a wekino̱. K’eyembilan, ńai na ńai ya bepuma na ya mbonji i malee̱le̱ biso̱ ná Loba e ndolo, e pe̱ dibie̱. Bonde̱ne̱ ba misipo, nika ná mo̱ń na wase, bo malee̱le̱ biso̱ ngiń’ao.​—Langa Roma 1:20.

Jena di bata jokwa bia nja Loba eno̱ tongwea na bolanga ba Bibe̱l. K’eyembilan, e malangwea biso̱ nje Loba a to̱ndino̱ na nje a si to̱ndino̱, ne̱ni a mombweano̱ bato nikame̱ne̱ pe̱ na beboledi bao.​—Langa Myenge 103:7-10.

3. Mo̱ Loba a be̱n dina e?

Yesu a kwali ná: “A Tete̱ ńasu ńe o mo̱ń dina lo̱ngo̱ di dubabe̱ [“sangisabe̱,” NW].” (Mateo 6:9) To̱ná Loba a be̱nno̱ beto̱ti jita, a be̱n nde dina diwo̱ na mune. Eyeme̱ te̱ e be̱n ńao mbad’a bele̱ la di dina. O eyem’a Duala di mabele̱ nde mo̱ ná “Yehova.” Nde bō̱ ba mabele̱ mo̱ na “Yahweh.”​—Langa Myenge 83:19.

Dina la Loba di sumwabe̱ o jita la Bibe̱l, na beto̱ti ka Sango to̱so̱ Loba be we̱le̱be̱ o epol’ao. Nde ponda Bibe̱l e tilabe̱no̱, dina la Loba di ta di so̱be̱ oten lambo ka 7 000 la ngedi. Yesu a bīse̱ dina la Loba ponda okwe̱le̱no̱ bato jombwea Loba​—Langa Yohane 17:26.

Ombwa sinima Mo̱ Loba a be̱n dina e?

4. Mo̱ Yehova a mombwea biso̱ e?

Ka nun sango a muna ńe ndolo, Loba a mese̱le̱ yin ndutu ye̱se̱ ońola bwam basu ba bwindea

Mo̱, kana take e lańno̱, nika e mapula nde o kwala ná Yehova Loba a si mombwea biso̱ e? Bato bō̱ ba makwala ná Loba a makekise̱ nde biso̱ na take, nde nika e titi mbale̱.​—Langa Yakobo 1:13.

Loba a londe̱ mot’a benama na edube ońolana a boli mo̱ wonja o po̱so̱. E te̱nge̱ne̱ so̱ ná di timbise̱le̱ Loba masoma ońola ni wonja di be̱nno̱ o po̱so̱ o bolea mo̱. (Yosua 24:15) Nde, jita ba mapo̱so̱ o bolane̱ bane̱ bobe, ońola nika nde take e lańno̱. Yehova a mabwa ndutu ke̱ a me̱ne̱ si te̱me̱ la sim.​—Langa Bebotedi 6:5,6.

Yehova Loba a mombwea biso̱. A mapula ná di bwane̱ longe̱ muńe̱nge̱. Son a ponda a me̱nde̱ bo̱le̱ take na ńamse̱ ba bena ba mawane̱ mo̱. Nde a be̱n njo̱m a bwam o jese̱le̱ ná take e be̱ ońola son a ponda. O Jokwa 8 di me̱nde̱ o bia ni njo̱m.​—Langa 2 Petro 2:9; 3:7, 13.

5. Ne̱ni jeno̱ ná di bata sisea Loba be̱be̱ e?

Yehova a mapula ná di siseye mo̱ be̱be̱ tongwea na muka. A mombwea mō̱ na mō̱ ńasu te̱. (Myenge 65:3; 145:18) A le̱le̱me̱ o lakise̱. To̱ di wusane̱ nde mo̱ ponda iwo̱, a memba miwe̱n di mabolano̱ o do̱lisane̱ mo̱. To̱ na si be̱ lasu la ke̱nge̱nge̱ so̱, jena di be̱ne̱ mulatako ma bo̱ibo̱i na Loba.​—Langa Myenge 103:12-14; Yakobo 4:8.

Nika Yehova a bolino̱ biso̱ longe̱, jangame̱ne̱ o to̱ndo̱ mo̱ buka bato be̱se̱. (Marko 12:30) Ná o lee̱le̱ Loba ndol’ango̱, bata o jokwa bia nja eno̱ na bola pe̱ nje a mabaise̱no̱ wa. Na nika o me̱nde̱ o bata sisea mo̱ be̱be̱.​—Langa 1 Timoteo 2:4; 1 Yohane 5:3.