Ala o mambo mena me

Ala o ebambu a mongo

JOKWA 13

Njika Myango ma Bwam Mena me Jombwea Bebasi e?

Njika Myango ma Bwam Mena me Jombwea Bebasi e?

1. Mo̱ bebasi be̱se̱ be bwam e?

Bato bena ba be̱n ńo̱ngi o bolea Loba na mbale̱ ba maso̱be̱ o bebasi be̱se̱. Myango ma bwam me nde ná Loba a me̱ne̱ babo̱, a mombwea pe̱ babo̱ be̱se̱. Nde nje ye ndutu ye nde ná, bato ba bebasi ba mabolane̱ dina la ebasi o bola jita la mambo ma bobe. (2 Korinto 4:3, 4; 11:13-15) Bupisane̱ nje di masengano̱ na nje di me̱ne̱no̱ pe̱, bebasi bō̱ be so̱lise̱ babo̱me̱ne̱ o mambo ma njo, ebwan na bila. Omo̱ń a nika, o be̱n pe̱ mitakisan, matusan na nangane̱ la bana. I ńai a mambo i mabwese̱ bowe̱ Loba ba mbale̱ ndutu jita.​—Langa Mateo 24:3-5, 11, 12.

Jowe̱ la mbale̱ di mabwe̱le̱ Loba. O diwengisan, ebasi e kwedi ye mo̱ ńakaka o miso̱. E mokwe̱le̱ belēdi bena be si se̱medi o Bibe̱l, nikame̱ne̱ pe̱ na belēdi ba mpoṅ jombwea Loba na nje e mapo̱ye̱ moto ombusa kwedi. Nde Yehova a mapula ná bato ba bie mbale̱ jombwea njika pat’a Loba eno̱.​—Langa Hesekiel 18:4; 1 Timoteo 2:3-5.

2. Njika myango ma bwam mena me jombwea bebasi e?

A se̱ muńe̱nge̱ o bia ná, bebasi be makwale̱ ná be to̱ndi Loba nde o mbale̱ ńe̱se̱ be to̱ndo̱ nde was’a Satan, be si malemse̱ Loba! (Yakobo 4:4) Eyal’a Loba e mabele̱ mowe̱ ma lobango me̱se̱ mena ma longi ebasi e kwedi ná “Babilon Ninde̱ne̱.” O mundi ma Babilon ńa kwaṅ nde ebas’a mpoṅ e botedino̱, ombusa Mpupe ma Dibumbe, o mińa ma Noa. Son a ponda, Loba a mawana dibumbe l’epańpań o bo̱le̱ bebasi ba lobango be mabande̱ mbel’a moto.​—Langa Bebīsedi 17:1, 2, 5, 16, 17; 18:8.

Nde, myango ma bwam mipe̱pe̱ me so̱ nde ná: Yehova a si dimbedi be̱se̱ ba be̱n ńo̱ngi o bolea mo̱ na mbale̱, bena ba camane̱ o bebasi o wase ńe̱se̱. A mako̱te̱le̱ ba bato be̱se̱ o dube̱ diwo̱ tongwea na jokwe̱le̱ babo̱ mbal’Eyal’ao.​—Langa Mika 4:2, 5.

3. Nje bato ba be̱n ńo̱ngi o bolea Loba na mbale̱ bangame̱ne̱no̱ o bola e?

Ebas’a mbale̱ e ma lata bato

Yehova a mombwea bato bena ba to̱ndi nje ye mbale̱ na bwam. A mome̱le̱ babo̱ ná ba pomane̱ o busa o ebasi e kwedi ná pe̱mpe̱m. Bato ba to̱ndi Loba, be be̱be̱ o songwa mudun a moto na bo̱to̱ mot’a peńa o bwam ba do̱lisane̱ mo̱.​—Langa Bebīsedi 18:4.

O mińa ma bokwedi ba Yesu, ponda bamuloloma ba langwedino̱ bato ba ta ba be̱ne̱ ńo̱ngi o bolea Loba na mbale̱ myango ma bwam, milema mabu mi pukume̱ye̱ ońola muńe̱nge̱. Boko bia mbad’a longe̱ ńa bwam ni do̱lisane̱ Yehova, ńena ni be̱n janda na dipita. Be nde biso̱ eyembilan a bwam, ońolana ba kasi myango ma bwam, ba bola jowe̱ la Loba epol’a boso o longe̱ labu.​—Langa 1 Tesalonika 1:8, 9; 2:13.

Yehova a makasa oteten a mbia ma ba ba mowe̱ mo̱, bato bena ba bangi bebasi ba lobango. Wemedi te̱ bebeledi ba ndolo ba Yehova, o me̱nde̱ tombwane̱ be̱ diko̱m na mo̱, mbia ma peńa na ma ndolo ma bowe̱ Loba, na longe̱ la bwindea.​—Langa Marko 10:29, 30; 2 Korinto 6:17, 18.

4. Ne̱ni Loba a me̱nde̱no̱ wana muńe̱nge̱ o wase ńe̱se̱ e?

Beńamsedi be mapo̱ye̱ ebasi e kwedi son a ponda be nde myango ma bwam. Be me̱nde̱ wanea mbel’a moto ńe owas’a mabandan lo̱ko̱mea. Ebasi e kwedi e si me̱nde̱ pe̱ o lo̱ndo̱ mbel’a moto to wana jabane̱. O ni ponda, bato be̱se̱ ba me̱nde̱ o be̱ mulatako o dube̱ la Loba la mbale̱ diwo̱ bukate̱.​—Langa Bebīsedi 18:20, 21; 21:3, 4.