Buka 60% ma bekip basu ba betukwedi ba pond’a mususu be si mabola ebol’abu o Bete̱l, nde o o̱fis ya betukwedi (RTO). Njika tombwane̱ nik’e mawanano̱ e? Njika belongisan be mapule̱ batukwedi ná ba bole ebolo o mbad’a bwam o o̱fis ya betukwedi e? Ne̱ni pe̱ epolo owe̱ni o̱fis a betukwedi e maso̱be̱no̱ e be̱nno̱ ngińa omo̱ń a mbadi batukwedi ba matukwano̱ e?

 O̱fis a betukwedi e mabola batukwedi epolo o ja owe̱ni jita la bato ba mato̱po̱no̱ eyem’abu. Karin, munańango mō̱ nu matukwe̱ na pat’a eyem’a Jaman po̱ a matele̱ye̱ ná: “Botea na ponda RTO e timbino̱ o mundi ma Cuauhtémoc mwe o epas’a Chihuahua o Meksiko, di mato̱po̱ nde eyem’asu ponda ye̱se̱: e be̱ na bane̱ batukwedi, ke̱ je o dikalo to̱ ke̱ je o po̱ngo̱ don. Di dingabe̱le̱ nde na bato ba mato̱pe̱ eyem’asu. Di masenga byala bō̱ di tano̱ jā kandane̱ senga, nik’e mongwane̱ pe̱ biso̱ o bolane̱ mbad’a to̱po̱ bato jita ba ko̱lo̱ngo̱nno̱.”

 James nu matukwe̱ n’eyem’a Frafra o Gana, a memba ná ponda iwo̱ a yo̱ki jo̱nge̱le̱ pond’a bwam a tombise̱no̱ o Bete̱l na bonasango na bonańango. Nde a kwali pe̱ ná: “Nā boa nde to̱ndo̱ bola ebola o o̱fis a betukwedi. Ne muńe̱nge̱ jita ke̱ na mate̱ye̱ bato dikalo n’eyem’abu na ke̱ na me̱ne̱ ne̱ni nik’e matapano̱ babo̱.”

 Nje e madie̱le̱ bonasango ke̱ ba mapula po̱so̱ epolo owe̱ni o̱fis a betukwedi e me̱nde̱no̱ be̱ e? Joseph ńe o o̱fis ni mombweye̱ ebol’a longa o wase ńe̱se̱ (WDC) o Warwick, Ńu Yo̱rk o Amerika, mo̱ ná: “Mitakisan mō̱ di be̱nno̱ me nde ná o bepolo bō̱, ba make̱ mwaye na madiba jita; ponda iwo̱ pe̱, inte̱rne̱t nde e si matombe̱ bwam kańena ye ndutu ná batukwedi ba kuse mambo bangame̱nno̱ tukwa. Ponda jeno̱ so̱ dutea ońola epolo o̱fis a betukwedi po̱ e me̱nde̱no̱ be̱, di mapo̱ngo̱ muwaso o bepolo jita y’eyeme̱ e mato̱po̱be̱no̱.”

 O jita la ngedi, mwano mwe pe̱m mu si mako̱s pe̱ to̱ mo̱ni jita mwe nde ná di bolane̱ ndabo a Janea to̱ bolongi ba bamuloloma ka o̱fis a betukwedi, owe̱ni batukwedi ba mapo̱no̱ bola ebolo. Yete̱na nik’e titi ná e bolane̱, bonasango be ná ba baise̱ wonja o janda milongi na o̱fis owe̱ni batukwedi ba me̱nde̱no̱ ja ba bola pe̱ ebolo. Na nika, yete̱na mawengisan me̱ne̱ne̱ o y’ekip ombusa ponda, bebokedi be ná bandise̱ be bepolo na bo̱bise̱ la ńolo, be bolane̱ pe̱ mu mo̱ni o londise̱ ńo̱ngi ipe̱pe̱.

 O mbu m’ebolo ma 2020, di busise̱ lambo ka 13 la lodun la do̱lar ya Amerika ońola o̱fis ya betukwedi. Bekip ba batukwedi be o RTO be be̱n ńo̱ng’a ordinate̱r, logiciel ya tobotobo, belongisan ba jinge̱le̱ la madoi, inte̱rne̱t na mambo ma mweńa mape̱pe̱. Mususedi ma ordinate̱r po̱ ńena ńe be̱be̱ ońola ebolo mwe nde lambo ka 750 ba do̱lar. Ordinate̱r i be̱n logiciel i po̱ngo̱be̱ na miyo ma ńunga name̱ne̱ pe̱ na Watchtower Translation System, ńena ńe nde elongisan e lulabe̱ na bebokedi yena e mongwane̱ batukwedi o te̱se̱ ebol’abu na o bolane̱ belongisan ba muwaso na bo̱bise̱ la ńolo.

 Batukwedi ba be̱n pe̱ ńo̱ng’a belongisan ba jinge̱le̱ la doi ná ba we̱le̱ jinge̱le̱ madoi o o̱fis abu. Be belongisan bongwane̱ jita ponda diboa la Corona di botedino̱, ebanja batukwedi ba timbane̱ mo̱ o mamboa mabu na babo̱ balane̱ ebol’a jinge̱le̱ la sinima na kalat’a bosenga oboso.

 Bonasango na bonańango ba maje̱ o mbasan pe̱ ba mapo̱ o o̱fis a betukwedi o jongwane̱ o langa kalati i tukwabe̱ na o sabangane̱ epolo. Munasango Kirstin ńe o RTO ńa eyem’a Afrikaans o Cap o Afrika ńa Mikondo mo̱ ná: “Bate̱ dikalo jita na paonia ya pond’a mususu ba be̱n epolo o wanea biso̱ jongwane̱ owan.”

 Ba bonasango be pe̱ muńe̱nge̱ jita o po̱ jongwane̱. Munańango mō̱ a kwali ná po̱ lao o jongwane̱ o RTO “di mabatea mo̱ ngudi.” Bonasango na bonańango bō̱ ba myemba ma mbasan pe̱ ba mapo̱ jinge̱le̱ madoi ońola kalat’a bosenga to̱ sinima. Munańango Juana ńe mutukwedi o RTO ńa eyem’a Totonak o mundi ma Veracruz o Meksiko mo̱ ná: “Tatan jeno̱ be̱be̱ na mindi eyem’asu e mato̱po̱be̱no̱, ye lambo di wam ná jita la bonasango na bonańango ba ye jinge̱le̱ madoi ońola kalat’a bosenga na sinima.”

 Nde myuedi mō̱ min: Mo̱ o̱fis ya betukwedi yongwane̱ o bata do̱lise̱ betukwedi ba kalati na sinima e? Ońola bato jita oteten a lodun lo malange̱ kalat’asu, jalabe̱ le nde ná e. Cedric ńe mutukwedi o epep’a betukwedi y’eyem’a Kongo yena e mato̱po̱be̱ o Republik Demokratik ńa Kongo, a kwali ná: “Bonasango bō̱ ba ta nde ba bele̱ mbad’asu ńa tukwa ná “eyem’a Kongo ya kalat’a bebokedi,” ońolana e si ta e bupe̱ mbadi bato ba ko̱lo̱ngo̱nno̱ to̱po̱ y’eyeme̱. Nde tatan, ba makwala ná kalat’asu i matukwabe̱ nde na “eyem’a Kongo ya nin we̱nge̱,” nika ńe nde mbad’a to̱po̱ ńa bato ńa buńa te̱.”

 Munasango Andile ńe o epep’a betukwedi y’eyem’a Xhosa o Afrika ńa Mikondo, a maki mulemlem ma lambo. Mo̱ ná: “Bato jita ba malangwea biso̱ ná ba maki ná di po̱ngulane̱ mbad’asu ńa tukwa. Nate̱na bana basadi bena ba ta ba nde ba bolane̱ Njongo a Betatedi ńa Inglisi ba nilanga nde mo̱ n’eyem’a Xhosa. Ba to̱ndi tobotobo bwambo bo nangedi ba Bibe̱l Traduction du monde nouveau ba batino̱ jombwea.”

 Mo̱ni mwe̱se̱ mu mapule̱ ońola bokise̱ na sabangane̱ la o̱fis ya betukwedi, name̱ne̱ pe̱ na ońola dibongo la bato ba maboleye̱ oten, mu mawa nde o mabea ma wonja ma mabolabe̱ o sue̱le̱ ebolo o wase ńe̱se̱; oten o be̱n pe̱ ma mena ma mabolabe̱ tongwea na donate.jw.org.