“19 la mbu din na tano̱ nenge̱le̱ mo̱!” Nje nu munasango asu a tano̱ enge̱le̱ e? Les Écritures grecques chrétiennes. Traduction du monde nouveau n’eyem’ao ya yabane̱, Be̱ngali. Mulemlem ma besengedi nde bato jita ba be̱nno̱, ponda Bibe̱l Traduction du monde nouveau e mabusano̱ n’eyem’abu. Nde, mo̱ buńa bō̱ o mábaise̱ wame̱ne̱ nje e mapule̱ ná yi Bibe̱l i tukwabe̱ i busisabe̱ pe̱ e?

 Ka laboso, ekip a batukwedi e mate̱se̱be̱, owas’a bediedi ba Epep’a betiledi ya Dibe̱le̱ di Madie̱le̱. Ponda ininga nik’e mano̱ngo̱no̱ ná ekip ewo̱ e tukwe Bibe̱l e? Nicholas Ahladis ńa o̱fis a betukwedi o Warwick o Ńu Yo̱rk a tele̱ye̱ ná: “Mambo jita nde ma madie̱le̱ ponda nik’e mano̱ngo̱no̱: k’eyembilan muso̱ngi ma batukwedi, eyeme̱ beno̱ tukwa, dime̱ne̱ la so̱ṅtane̱ la Bibe̱l lena balangedi ba y’eyeme̱ ba be̱nno̱, na mawengisan me o mbadi y’eyeme̱ e mato̱po̱be̱no̱ o bepolo be diwengisan. Nde o jita la ngedi, ekip ye ná e tombise̱ oteten a mbu mō̱ na milalo o tukwa Betiledi ba Grikia, na mbu mine̱i to̱ buka nika o tukwa Bibe̱l ńe̱se̱. Betukwedi na bwambo ba mbuke mo̱ be mano̱ngo̱ ponda buka nika.”

 O sumo te̱ batukwedi, e mapula pe̱ jongwane̱ la dibo̱to̱ la balangedi bena ba titi o betukwedi. Ba balangedi be ná ba wa o bepolo, to̱ mo̱me̱ne̱ o bekombo be diwengisan; ba mawana pe̱ nde jongwane̱ labu esibe̱ baise̱ musawedi. Nje ba makwalano̱ ombusa babo̱ langa nje e tukwabe̱ e mongwane̱ batukwedi o busise̱ Bibe̱l ńe ná te̱ite̱i, ni wam o so̱ṅtane̱ na ńena ni be̱n bwambo bo nangedi. Munasango mō̱ ńena nu malonge̱ batukwedi ońola betukwedi ba Bibe̱l o Afrika ńa Mikondo a kwali ná: “Batukwedi ba me̱ne̱ nde tukwa la Bibe̱l ka m’bē̱ munde̱ne̱ ba be̱nno̱ oboso ba Yehova na ba bato ba malange̱ Eyal’ao.”

 Ponda betukwedi be mabo̱no̱, Bibe̱l yangame̱n busisabe̱ o mapapa. Ná nik’e we̱le̱ bolabe̱, mandabo ma druk ma mabolane̱ o bosadi bwe̱se̱ dom la mambo: pepa, tinte, pepa ońola ngutu, ebatan, dibato la teten a ngutu, muso̱no̱ ma silba, misinga, bekakan, pepa ńembam, na ekuduman ya ngutu. O mbu 2019, di busise̱ buka na 20 ma lodun la do̱lar o janda be belongisan. Mu mbu me̱ne̱, bonasango na bonańango ba maboleye̱ o mandabo masu ma druk ba tombise̱ buka 300 000 ba hawa o busise Bibe̱l o mapapa na loma pe̱ mo̱ o ńai na ńai a bepolo.

 Ońola nje di matombise̱no̱ ni ponda ńe̱se̱ di mabusise̱no̱ pe̱ ninka jita la mo̱ni ońola be bebolo e? Joel Blue ńena nu maboleye̱ o o̱fis ni mombweye̱ mandabo ma druk ma wase ńe̱se̱ mo̱ ná: “Bibe̱l nde ńe kalati ńe mweńa buka ye̱se̱ di mabusise̱no̱. Di mapula so̱ ná je̱ne̱ne̱ lao di bole ná Loba di mowe̱no̱ a kuse edube, name̱ne̱ pe̱ na mwe̱ndi di malangwano̱.”

 Di mabusise̱ pe̱ Bibe̱l Traduction du monde nouveau ońola pat’a bato yena ye o bete̱medi ba tobotobo. K’eyembilan, Bibe̱l Traduction du monde nouveau e mábusisabe̱ na braille ńena ńe nde matila ma bato ba ndima, na dom la leme̱. Ná ba busise̱ Bibe̱l po̱ na braille, nik’e mano̱ngo̱ hawa lo̱mbi; o lati pe̱ te̱ mongo mao me̱se̱, me ná ma be̱ bwaba ba lambo ka 2,3 meta. Di mabusise̱ pe̱ pat’a Bibe̱l ńe tobotobo ońola bato be o beboa, wuma yena ba makasano̱ nde kalati i be̱n ngutu ni bo̱bi buka te̱.

 Bibe̱l Traduction du monde nouveau e mongwane̱ bato jita. Jombweye k’eyembilan nje e bolane̱ o mwemba ma eyem’a Kiluba o mundi mu mabelabe̱ ná Tombe o Republik Demokratik ńa Kongo. Tombe ńe etum a buka 1 700 kilometa na mundi maboso ma y’ekombo. O ta nde o be̱ne̱ Bibe̱l po̱ na mune n’eyem’a Kiluba ońola bonasango be̱se̱ ba mu mwemba; o sumo te̱ nika, ni Bibe̱l e ta pe̱ e be̱ne̱ byala bena be mátombe̱ ponda. Ponda bonasango ba tano̱ ba be̱ne̱ bekwali o ndongame̱n, mō̱ te̱ a ta nde a se̱le̱ no̱ngo̱ ni Bibe̱l ná a boṅsane̱ ekwal’ao, denge̱ a matombise̱ mo̱ nupe̱pe̱. Nde botea Dingindi 2018, moto te̱ o mu mwemba e ná a be̱ne̱ ńao Bibe̱l Traduction du monde nouveau n’eyem’a Kiluba, ńena ni tukwabe̱ o mbadi ni wam o so̱ṅtane̱.

 Munańango mō̱ ńena nu mato̱pe̱ Jaman a kwali jombwea betukwedi ba Bibe̱l Traduction du monde nouveau ba batino̱ jombwea ná: “Na si me̱ne̱ pe̱ bolanga ba Bibe̱l ka lambo nangame̱nno̱ bola, nde ne musunga o walane̱ bolanga oboso ponda ye̱se̱.” Moto mō̱ ńe o beboa a tili ná: “Ba boli mba Bibe̱l Traduction du monde nouveau, e tuko pe̱ longe̱ lam. Na si ta na máso̱ṅtane̱ Eyal’a Loba ka nje te̱ neno̱ so̱ṅtane̱ mo̱ botea ná na malangano̱ nin Bibe̱l. Ńo̱ng’am ńe nde ná nokwe mambo mape̱pe̱ jombwea Mboṅ a Yehova, na timbe pe̱ Mboṅ a Yehova.”

 Balangedi be̱se̱ ba Traduction du monde nouveau ba matimbise̱le̱ ba bena ba mabole̱ mabea o busise̱ mo̱ masoma. O mapula te̱ sue̱le̱ ebol’a dikalo o wase ńe̱se̱, donate.jw.org e malee̱ ńai na ńai a mbadi ya bola mabea. Di matimbise̱le̱ bińo̱ masoma jita ońola sanga lańu la mulema.