Ala o mambo mena me

Ala o ebambu a mongo

 JOKWA  5

Njika Mwano Loba a Be̱nno̱ Ońola Wase e?

Njika Mwano Loba a Be̱nno̱ Ońola Wase e?

1. Ońola nje Loba a wekino̱ wase e?

Yehova a weki nde wase ońola bato ba benama. Ńe nde wum’asu a boja. Mom’a boso na mut’a boso ba si wekabe̱ so̱ ná ba londise̱ mo̱ń. Loba a ta a máweka ange̱l ná i be̱ longe̱ o mo̱ń. (Hiob 38:4, 7) O diwengisan na nika, Loba a no̱ngi mom’a boso, a jese̱ mo̱ o mudo̱led’a paradisi ni belabe̱ ná mōnda ma Ede̱n. (Bebotedi 2:15-17) Yehova a boli mo̱ na mbot’ao epolo o bwane̱ longe̱ di si be̱n su muńe̱nge̱ o wase.​—Langa Myenge 37: 29; 115:16.

O bebotedi, mōnda ma Ede̱n bukate̱ nde mu ta paradisi. Mom’a boso na mut’a boso ba ta bangame̱ne̱ o londise̱ wase na mbot’abu. Ba ta so̱ bangame̱ne̱ o tata mo̱ na timbise̱le̱ wase ńe̱se̱ paradisi. (Bebotedi 1:28) Wase e si me̱nde̱ o bulabe̱le̱ to̱ buńa. E me̱nde̱ nde tika be̱ wum’a boja ya mbel’a moto.​—Langa Myenge 104:5.

Ombwa sinima Ońola nje Loba a wekino̱ wase e?

2. Ońola nje wase e titino̱ paradisi we̱nge̱ e?

Adam na Eva ba si sengane̱ Loba, ońola nika nde Loba a pangino̱ babo̱ o mōnda ma Ede̱n. Moto to̱ mō̱ a si tongwe̱le̱ o timbise̱le̱ pe̱te̱ Paradisi ba bo̱lo̱ne̱no̱. Bibe̱l e makwala ná: “Wase e bakabe̱ o dia la babobe.”—Hiob 9:24.​—Langa Bebotedi 3:23, 24.

Mo̱, Yehova a dimbedi so̱ mwano mao ma bebaedi ońola mbel’a moto e? Ke̱m! E nde ńangum. A titina a wo̱ndo̱. (Yesaya 45:18) A me̱nde̱ timbise̱le̱ bato ba benama o epolo a pulino̱ ná ba be̱.​—Langa Myenge 37:11, 34.

3. Ne̱ni wase e me̱nde̱no̱ pe̱te̱ timba Paradisi e?

Wase e me̱nde̱ pe̱te̱ nde timba Paradisi ni ponda Yesu a me̱nde̱no̱ o janea ka Kiṅe̱ Loba a te̱se̱no̱. Yesu, mudied’a ange̱l ya Loba, a me̱nde̱ ńamse̱ be̱se̱ ba mate̱nge̱ne̱ Loba, o bila  bo belabe̱ ná Armagedon. Ombusa nika, Yesu a me̱nde̱ pimba Satan o beboa ońola 1 000 mbu. Tumba la Loba di me̱nde̱ o jonga o di dibumbe ońolana Yesu a me̱nde̱ o die̱le̱ na tata pe̱ babo̱. Ba me̱nde̱ bwane̱ longe̱ la bwindea muńe̱nge̱ o Paradisi o wase.​—Langa Bebīsedi 20:1-3; 21:3, 4.

4. Njika ponda take e me̱nde̱no̱ o bo̱ e?

Njika ponda Loba a me̱nde̱no̱ o bo̱le̱ bobe o wase e? Yesu a boli “eyemban” e malee̱le̱ ná su le be̱be̱. Mambo ma mábolane̱ we̱nge̱ ma malee̱le̱ ná “su” la yen ebe̱yed’a mambo lā be̱be̱.​—Langa Mateo 24:3, 7-14, 21, 22.

Janea la Yesu lena di boki o mo̱ń di me̱nde̱ janea wase o pambo a ponda ńa 1 000 mbu, na bo̱le̱ ndutu ye̱se̱ ye oten. (Yesaya 9:5,6; 11:9) O sumo te̱ be̱ lao la Kiṅe̱, Yesu a me̱nde̱ pe̱ o bolane̱ eto̱t’ao a Prisi Ninde̱ne̱ o bo̱le̱ myobe ma ba ba to̱ndi Loba. Tongwea na Yesu, Loba a me̱nde̱ o bo̱le̱ maboa, bodun na kwedi.​—Langa Yesaya 25:8; 33:24.

5. Nja nu me̱nde̱ be̱ longe̱ o paradisi ni maye̱ e?

O Ndabo a Janea, o me̱nde̱ o bomane̱ bato ba to̱ndi Loba bena ba mapule̱ pe̱ o jokwa ne̱ni bwese̱ mo̱ muńe̱nge̱

Bato bena ba masengane̱ Loba nde ba me̱nde̱ be̱ longe̱ o Paradisi. (1 Yohane 2:17) Yesu a lom bokwedi bao ná ba wase bato be sibise̱ la ńolo, bokwe̱le̱ pe̱ babo̱ ne̱ni beno̱ ná ba kusa musebea ma Loba. Yehova e o boṅsane̱ o nin we̱nge̱ lodun la bato lo me̱nde̱ be̱ longe̱ o Paradisi ni maye̱ o wase. (Sefańa 2:3) O Mandabo ma Janea ma Mboṅ a Yehova, bato ba mokwa ne̱ni o be̱ bome ba bai na basango ba mbia ba bwam, nikame̱ne̱ pe̱ na bito ba babe̱ na bańango ba mbia ba bwam. Bana na bayedi ba mowe̱ Loba mwemba na jokwa pe̱ njika muse̱ṅ myango ma bwam mi maleneano̱ babo̱.​—Langa Mika 4:1-4.