Ala o mambo mena me

Ala o ebambu a mongo

 DONGO 4

Loba a mańo̱ male na Abraham

Loba a mańo̱ male na Abraham

Abraham a masengane̱ Loba ońol’a dube̱, Yehova pe̱ a makakane̱ o namse̱ mo̱ na to̱nde̱le̱ mbot’ao

LAMBO ka 350 ba mbu be ta be matomba ombus’a Mpupe ma mińa ma Noa. Mot’a kwaṅ Abraham a ta a ja o mundi ma m’bwaṅ ma Ur mu mabelabe̱ we̱nge̱ ná Iraq. Abraham a ta nde moto nu be̱n dube̱ dinde̱ne̱. Nde dube̱ lao di ta di we̱le̱be̱ o kekise̱.

Yehova a ta a langwea Abraham ná asumwe̱ o mundi a yabe̱no̱ āle o mwe̱n ekombo e timbi bē̱ Kanaan. Abraham a bola nika o dibokime̱ne̱. Ālane̱ mbo’ao ńe̱se̱, lata na munj’ao Sara na mulal’ao Lot. Ombus’a lo̱ndo̱ la bwaba a timba be̱ muje̱ o muno̱ko̱ o Kanaan. Yehova a ńo̱ male na Abraham ná, a me̱nde̱ timbise̱le̱ mo̱ tumba dinde̱ne̱, ná tongwea na mo̱ nde mbia ma wase me̱se̱ mi me̱nde̱no̱ náma, mbot’ao pe̱ e me̱nde̱ sangwa mundi ma Kanaan.

Abraham na Lot ba ta m’bwaṅ ma mabemba ma mbodi na ńaka. Esibe̱ se̱le̱ sebea mo̱me̱ne̱, Abraham ese̱le̱ ná Lot a po̱se to̱ njik’a su la mōnda a to̱ndino̱. Lot a po̱so̱ mindi ma diwō̱ngi ma Sanj’a Yordan, a boka be̱be̱ na mundi ma Sodom. Nde bato ba Sodom ba ta mbamba, ba bole̱ bobe bwambi te̱nge̱ne̱ Yehova.

Ombus’a póndá Yehova Loba a ta a bata bola Abraham mbaki ná mbot’ao e me̱nde̱ be̱ jita ka ngengeti. Abraham a dube̱ di dikaki. Nde munj’ao ńa ndolo Sara a tika be̱ ewombe̱. Póndá Abraham a po̱ino̱ bodun ba 99 ma mbu Sara pe̱ lambo ka 90, Loba a langwea mo̱ ná bā na Sara ba me̱nde̱ ya muna mome. Na Sara a ya Isak kana Loba a kwalino̱. Abraham a ta a be̱ne̱ bana bape̱pe̱, nde Musungedi Yehova a kakane̱no̱ o Eden a ta nde ángame̱ne̱ po̱ tongwea na Isak.

O mulemlem ma póndá Lot na mbia mao ba ta ba ja be̱be̱ na Sodom, nde nu mot’a te̱me̱ la sim Lot a si timbi be̱ ka bato ba mbamba ba mu mundi. Póndá Yehova a no̱ngino̱ bedomsedi o ko̱kise̱ Sodom, a se̱le̱ loma ange̱l oboso ba póndá o bīse̱ Lot ońol’a beńamsedi be ta bángame̱ne̱ po̱. Yi ange̱l yome̱le̱ Lot na mbia mao ná ba buse o Sodom na mīla ba sombwa pe̱ to̱ mbusa. Na Loba a yo̱lise̱ wea na solfa o Sodom na o mundi ma bobe ma Gomora mu ta mo̱ be̱be̱, a bumbise̱ bajē̱ oten be̱se̱. Lot na bana bao ba bito babā bonga. Nde munj’a Lot ombwa ombusa ońol’a ńo̱ngi ninde̱ne̱ ńa sango a tano̱ a dia ombusa yen ebe. Na mo̱ a bo̱lo̱ne̱ longe̱ ońol’a si sengane̱.

—Nika e se̱medi o Bebotedi 11:10–19:38.