Ala o mambo mena me

Ala o ebambu a mongo

 DONGO 24

Paulo a matilea myemba

Paulo a matilea myemba

Kalat’a Paulo i membe̱ myemba ma Kriste̱n a ńo̱ṅo̱n aboso

MWEMBA ma Kriste̱n mena mu wu bokisabe̱ mu ta mu be̱ne̱ ebol’a mweńa o belondisedi ba mwano ma Yehova. Nde ba pomane̱ te̱nge̱ne̱ yi Kriste̱n a ńo̱ṅo̱n aboso. I wusa so̱ tika be̱ jemea na Loba o was’a mitakisan mi ta mi welea babo̱ o eboko na mitakisan m’eso̱njisan oteten a mwemba e? Betiledi ba eyem’a Grikia be be̱n 21 ma kalati yena i mabole̱ malea ma mapulē̱ na mena ma membisē̱.

Ńamuloloma Paulo a tili dom la kalati na ine̱i, botea kalat’a Roma nate̱na kalat’a Bonahebe̱r. Yin kalati i be̱n nde mina ma ba bena a tiledino̱ mo̱, ebe̱ mpe̱nge̱le̱ ma moto to̱ belongi ba mwemba ma tobotobo. Jombweye mato̱ti mō̱ mena kalat’a Paulo i makwaleano̱.

Jome̱le̱ ońol’a bede̱mo na bedangwedi. Bato ba titi ko̱nji, bambamba, na ba bole̱ myobe minde̱ne̱ “ba si me̱nde̱ sangwa janea la Loba.” (Galatia 5:19-21; 1 Korinto 6:9-11) Bato bena ba mowē̱ Loba bángame̱ne̱ be̱ mulatako esibe̱ jombwea bekombo babu. (Roma 2:11; Efeso 4:1-6) Bángame̱ne̱ bola babo̱me̱ne̱ na mulema mwe̱se̱ o jóngwane̱ bonasango abu bena ba be̱n ńo̱ng’a jóngwane̱. (2 Korinto 9:7) Paulo ome̱le̱ ná: “Kane̱ esibe̱ wo̱lo̱.” Nje ye mbale̱ ye nde ná, ba bena ba mowē̱ Loba bángame̱ne̱ teleye̱ Yehova mulema mabu o muka (1 Tesalonika 5:17; 2 Tesalonika 3:1; Filipi 4:6, 7) Ná Loba a senge mika, jángame̱ne̱ kane̱ na dube̱.​—Bonahebe̱r 11:6.

Nje e me̱nde̱ jóngwane̱ mbia o tongwe̱le̱ e? Bome ba bai bángame̱ne̱ to̱ndo̱ bito babu ka babo̱me̱ne̱. Bito ba babe̱ bángame̱ne̱ be̱ne̱ne̱ bome babu edub’a ńo̱ṅgo̱ńo̱ṅgo̱. Bana bángame̱ne̱ sengane̱ bayēdi babu ońolana nik’e do̱lisane̱ Loba. Bayēdi bángame̱ne̱ bolane̱ bete̱sedi be tilabe̱ o eyal’a Loba o die̱le̱ na jókwise̱ bana babu na ndolo.​—Efeso 5:22–6:4; Kolose 3:18-21.

Kriste̱n i kusi jóngwane̱ o soṅtane̱ mwano ma Loba. Mato̱ti jita ma Mbend’a Mose móngwane̱ o tata ná die̱le̱ Bonaisrae̱l nate̱na o bepo̱yedi ba Kristo. (Galatia 3:24) Nde, Kriste̱n i si be̱n ná i bupe̱ ni Mbenda o jowē̱ Loba. O kalati Paulo a tiledino̱ Bonahebe̱r nika ńe nde Bonayuda bena ba timbi Kriste̱n, a bati wana mwe̱ne̱n o beteledi ba Mbenda na o ne̱ni mwano ma Loba mu malondeano̱ Kristo. Paulo a boli beteledi ná beboledi jita bena be ta o was’a ni Mbenda be  ta nde edinge̱. K’eyembilan mabea ma ńama ma ta nde edinge̱dinge̱ a kwed’a Yesu ńena ni ta ńángame̱ne̱ wana lakise̱ la myobe la mbale̱. (Bonahebe̱r 10:1-4) Tongwea na kwed’a Yesu, Loba a bo̱le̱ male ma ni Mbenda, ebanja ma si ta pe̱ mapula.​—Kolose 2:13-17; Bonahebe̱r 8:13.

Bete̱sedi ońol’a bediedi bángame̱n ba mwemba. Bome ba mapula te̱ be̱ne̱ mbe̱ oteten a mwemba bángame̱ne̱ be̱ne̱ bede̱mo ba bwam na be̱ pe̱ ńai ni dongame̱n o bola mambo ma tilabe̱ o Bibe̱l. (1 Timoteo 3:1-10, 12, 13; Tito 1: 5-9) Bato bena ba mowē̱ Yehova Loba bángame̱ne̱ ko̱to̱me̱ póndá na póndá na bonasango abu o jomane̱le̱ mō̱ na nune̱. (Bonahebe̱r 10:24, 25) Mako̱to̱ne̱ ońol’a jowē̱ mángame̱ne̱ be̱ ńai ni malongisane̱ na ni mókwe̱le̱ pe̱.​—1 Korinto 14:26, 31.

Póndá Paulo a tilino̱ kalati ni londe̱ ibā a lomedino̱ Timoteo a ta a mátimba o  beboa o Roma o jenge̱le̱ muka. Ngus’a bato ba ngiń’a mulema bukate̱ nde ba pe̱pe̱le̱ mo̱. Paulo a ta a bia ná pónd’ao e mawuta. A kwala ná: “Na majana ewe̱nj’a bwam, na madomse̱ lo̱ndo̱ lam, na kombe̱ dube̱.” (2 Timoteo 4:7) Ombusa ngus’a mińa Paulo pe̱ a bwabe̱ ońol’a dube̱ lao. Nde kalati ya ńamuloloma i madie̱le̱ bato bena ba mowē̱ Loba ba mbale̱ nate̱na we̱nge̱.

—Nika e se̱medi o Roma; 1 Korinto; 2 Korinto; Galatia; Efeso; Filipi; Kolose; 1 Tesalonika; 2 Tesalonika; 1 Timoteo; 2 Timoteo; Tito; Filemon; Bonahebe̱r.