Ala o mambo mena me

Ala o ebambu a mongo

 DONGO 6

Ne̱ni bepo̱yedi ba muna be mawanano̱ diwengisan o ndabo a diba

Ne̱ni bepo̱yedi ba muna be mawanano̱ diwengisan o ndabo a diba

“Bana be nde sango la Yehova.”Myenge 127:3

Yabe̱ la muna lena di wanea mome na munj’ao muńe̱nge̱ nde na ebolo jita pe̱. Ka bato be o boteye̱ yadi, lena lo be̱ mańaka o je̱ne̱ ná dibongo la mwe̱nge̱ ma muna di mano̱ngo̱ ponda nikame̱ne̱ pe̱ na ngudi jita. Ja l’epe̱ńe̱ nikame̱ne̱ pe̱ na tabilane̱ la besengedi ba mulema bena be wana mitakisan minde̱ne̱ o mulatako mańu. Bińo̱ babane̱ langame̱ne̱ o po̱ngulane̱ mambo ńai lo mombweano̱ mun’ańu na tata pe̱ diba lańu. Ne̱ni bete̱sedi ba Bibe̱l be mongwane̱no̱ wa o lembe̱ mi mitakisan e?

 1 SO̱ṄTANE̱ NÁ MUNA A MAWANA DIWENGISAN O LONGE̱ LAŃU

NJE BIBE̱L E MAKWALANO̱: “Ndolo e mawe̱lisane̱ ńe pe̱ muyao.” O mbat’a nika, ndolo “e si mapulise̱ bwam bao ba mo̱me̱ne̱, e si mane̱nge̱ eba.” (1 Korinto 13:4, 5) O yadi laboso, ńango a muna a yo̱ki no̱ngo̱ ponda jita o jombwea mwe̱nge̱ ma muna tobotobo. Nde, mom’ango̱ ena a botea je̱ne̱ biana we o coma mo̱, o si dimbea so̱ ná mo̱ pe̱ a be̱n ńo̱ng’ango̱. Wena wongwane̱ mo̱ na muyao nikame̱ne̱ pe̱ na we̱lisane̱ o so̱ṅtane̱ ná o be̱n ńo̱ng’ao na ná e pe̱ ná ongwane̱ wa o jombwea muna.

“Bińo̱ bome pe̱, jane̱ bito bańu na dibie̱.” (1 Petro 3:7) So̱ṅtane̱ ná munj’ango̱ a me̱nde̱ nde bolane̱ dongo dinde̱ne̱ la ngud’ao o jombwea mun’ańu. A be̱n mbe̱ ma peńa, yen ebe, epame̱, a ńo̱sedi, mulema pe̱ mu wo̱ledi mo̱. Ponda iwo̱ pe̱ e ná a lingane̱ wa, nde keka ná o be̱ pī, ońolana “moto ńe muńo̱ngo̱ o malinga a buki ngum a bwemba.” (Minia 16:32) Bia ponda a be̱nno̱ ńo̱ng’a ­jongwane̱ ná o sue̱le̱ mo̱.Minia 14:29.

NJE WENO̱ NÁ O BOLA:

  • Basango ba bana: Ongwane̱ munj’ango̱ o jombwea muna, to̱ e be̱ nde bulu. Wutise̱ ponda o mabolane̱no̱ o mambo mape̱pe̱ ná o be̱ne̱ ponda eyeka o matombise̱no̱ mwemba na munj’ango̱ na mun’ańu

  • Bańango ba bana: Emea ná mom’ango̱ ongwane̱ wa o jom­bwea muna ponda te̱ a mapulano̱ bola nika. O si sa mo̱ yete̱na a si boli lambo bwam, nde lee̱ mo̱ na muyao ne̱ni bola di lambo o mbad’a bwam

 2 OUSE̱ MULATAKO MAŃU

NJE BIBE̱L E MAKWALANO̱: “Ba me̱nde̱ nde be̱ eyobo ewo̱.” (Bebotedi 2:24) To̱na nika elong’a mbia ewo̱ epe̱pe̱ e batino̱, o si dimbea ná bińo̱ babane̱ lo dia nde “eyobo ewo̱.” Bola me̱se̱ ná mulatako mańu mu be̱ ngińa.

A muto, timbise̱le̱ mom’ango̱ masoma ońola jongwane̱ a mawaneano̱ wa. Byala bo̱ngo̱ ba masoma be ‘majesane̱ bwam.’ (Minia 12:18) A mome, langwea munj’ango̱ ná o to̱ndi mo̱ na ná e wa tiki o miso̱. Sesa mo̱ ońola mbadi a mombweano̱ mbia.Minia 31:10, 28.

“To̱ moto a si pula bwam ba mo̱me̱ne̱, nde bwam ba nupe̱pe̱.” (1 Korinto 10:24) Bola nde o ponda ye̱se̱ nje yena e do̱lisane̱ mom’ango̱ to̱so̱ munj’ango̱. Bińo̱ no̱ngo̱ ponda o kwala, o sesa mō̱ na nune̱, na lambe̱ye̱ pe̱ mō̱ na nune̱ toi. O s’ombwea bwam bo̱ngo̱ ba wame̱ne̱ o nje e mombweye̱ mulatako mańu o no̱ngo̱. Moto te̱ a bie nje nune̱ a to̱ndino̱, a bole pe̱ nika. Bibe̱l e makwala ná: “Mome a bole munj’ao nje angame̱nno̱ kusane̱ mo̱, muto pe̱ a bole mom’ao nika.” (1 Korinto 7:3-5) Moto te̱ a tele̱ye̱ nune̱ mulema mao jombwea mulatako mańu o no̱ngo̱. We̱lisane̱ lo̱ngo̱ na so̱ṅtane̱ lo̱ngo̱ pe̱ ba me̱nde̱ jouse̱ ­mulatako mańu.

NJE WENO̱ NÁ O BOLA:

  • Lo si dimbea o tindea bińo̱me̱ne̱ ponda lo matombise̱no̱ mwemba

  • Bola ngus’a mambo mena ma malee̱le mom’ango̱ to̱so̱ munj’ango̱ ná o to̱ndi mo̱, ka walane̱ mo̱ muyenga wuma a to̱ndino̱ to̱so̱ bola mo̱ son a jabea

 3 OKWE̱LE̱ MUN’AŃU

NJE BIBE̱L E MAKWALANO̱: “Ebanja nate̱na mūtu o bi ­kalat’a bosangi yena i mawe̱le̱ lee̱ wa ngea jongise̱.” (2 ­Timoteo 3:15) Dutea, lombweye te̱ ne̱ni leno̱ ná lokwe̱le̱ ­mun’ańu. E ná a we̱le̱ jokwa o mbad’a betańsedi, nate̱na mo̱me̱ne̱ ke̱ a dia o dibum. Muna ena emba o dibum doi la sango to̱so̱ la ńango na ke̱ ńango e muńe̱nge̱ to̱so̱ ke̱ a ­lingi. Langea mo̱ kalati ke̱ a dia mwe̱nge̱ ma muna.To̱ nika a si masengano̱ nje o malangeano̱ mo̱, nika ńena ńongwane̱ mo̱ o to̱ndo̱ bolanga o koka lao.

Mun’ango̱ a si salo ńai ńena o titino̱ ná o kwalisane̱ mo̱ jombwea Loba. Bola ná a senge ne̱ni o makane̱no̱ Ye­hova. (Ndimbisedi 11:19) To̱ bińo̱ na muna le nde o joka loko, kwalisane̱ mo̱ jombwea mambo Loba a wekino̱. (Myenge 78:3, 4) Nika mun’ango̱ eno̱ o koka, a me̱nde̱ o so̱ṅtane̱ ndolo ńena o be̱ne̱nno̱ Yehova, mo̱ pe̱ okwa o to̱ndo̱ mo̱.

NJE WENO̱ NÁ O BOLA:

  • Kane̱ tobotobo ná o kuse dibie̱ o jokwe̱le̱ mun’ango̱

  • Timbise̱le̱ byala bena o mapulano̱ ná a bie ná a boteye o ­jokwa o mimbu mao misadi