Ala o mambo mena me

Ala o ebambu a mongo

 DONGO 5

Ne̱ni benga be̱ musango na bayedi bo̱ngo̱

Ne̱ni benga be̱ musango na bayedi bo̱ngo̱

“Bińo̱ bo̱to̱ so̱ nded’a mulema, bwam, sibise̱ la ńolo, pī, we̱lisane̱.”Kolose 3:12

Diba di mabola moto a be̱ne̱ mbia ma peńa. Ye mbale̱ ná o me̱nde̱ benga to̱ndo̱ bayedi bo̱ngo̱ na bola pe̱ babo̱ edube, nde munj’ango̱ to̱so̱ mom’ango̱ nde e wa tatan moto ńe mweńa buka be̱se̱ o wase. Nika ńena e be̱ so̱ngo̱ na ńo̱ngo̱ ndutu o jemea. Nde bete̱sedi ba Bibe̱l bena bongwane̱ wa ná o benge be̱ne̱ musango na bayedi bo̱ngo̱ nikame̱ne̱ pe̱ na ba mom’ango̱ to̱so̱ munj’ango̱ ni ponda weno̱ o keka longa mbia mo̱ngo̱ ma peńa.

 1 BENGA BE̱NE̱ MULATAKO MA BWAM NA MBIA MO̱NGO̱ MA DIBA

NJE BIBE̱L E MAKWALANO̱: “Dube̱ so̱ngo̱ na ńo̱ngo̱.” ­(Efeso 6:2) We eto̱m o bola so̱ngo̱ na ńo̱ngo̱ edube to̱ o be̱ne̱ nde njika mimbu. Emba ná munj’ango̱ to̱so̱ mom’ango̱ pe̱ a be̱n ba­yedi bena angame̱nno̱ o jombwea. “Ndolo e si mako̱no̱ne̱,” ońola nika mulatako a be̱nno̱ na bayedi bao mu s’angame̱n bwese̱ wa bo̱ngo̱.1 Korinto 13:4; Galatia 5:26.

NJE WENO̱ NÁ O BOLA:

  • O si bolane̱ byala ka ben, “Mbia mo̱ngo̱ mu singe̱ mba” to̱so̱ “Ye te̱ ńo̱ngo̱, nje ye̱se̱ na mabolano̱ ye nde bobe mo̱ na mo̱”

  • Keka we̱le̱ wame̱ne̱ o epol’a ­munj’ango̱ to̱so̱ mom’ango̱

 2 WE̱LE̱ MOYO YETE̱NA NIKA E MAPULA

NJE BIBE̱L E MAKWALANO̱: “Ońola nika moto a me̱nde̱ dia sango na ńango, a tingame̱ na munj’ao; nde ba me̱nde̱ nde be̱ eyobo ewo̱.” (Bebotedi 2:24) Ombusa diba lo̱ngo̱, bayedi bo̱ngo̱ bena bo̱nge̱le̱ ná ba dia ba be̱n mbe̱ ma bongwa wa, nika ńená e tute̱le̱ babo̱ o pula wana jongwane̱ oteten a diba lo̱ngo̱, e be̱ ná lo be̱n ńo̱ng’abu to̱ ke̱m.

Bińo̱ babane̱ nde langame̱ne̱ o so̱ṅtane̱le̱ o moyo bińo̱ lo mawe̱le̱ye̱no̱ babo̱, lo langweye pe̱ babo̱ na muyao nje lo domse̱no̱. Wena o langwea moto mbale̱ na bwē, nde o mbad’a muyao. (Minia 15:1) Sibise̱ la ńola, pī, na we̱lisane̱ ba me̱nde̱ jongwane̱ wa be̱ne̱ mulatako ma bwam na bayedi ba munj’ango̱ to̱so̱ ba mom’ango̱ na benga “we̱lisane̱ mō̱ na nune̱ o ndolo.”Efeso 4:2.

NJE WENO̱ NÁ O BOLA:

  • Yete̱na ńai bayedi bańu ba maso̱lo̱no̱ o diba lańu e matakise̱ wa, kwalea ońola nika na ­mom’ango̱ to̱so̱ na munj’ango̱ o ponda ńe pī

  • Bińo̱ so̱ṅtane̱le̱ o mbad’a sangilane̱ y’ekwali