Ala o mambo mena me

Ala o ebambu a mongo

 JOKWA 8

Yosia a ta a be̱ne̱ mako̱m ma bwam

Yosia a ta a be̱ne̱ mako̱m ma bwam

O mo̱nge̱le̱ ná ye ndutu o bola nje e te̱nge̱n e?— Bato jita ba mo̱nge̱le̱ ná nika ńe ndutu. Bibe̱l e malangwea biso̱ ná nika e ta ndutu jita ońola mun’a mome mō̱ ba mabele̱no̱ ná Yosia ná a bole nje e te̱nge̱n. Nde a ta a be̱ne̱ mako̱m ma bwam mená mongwane̱ mo̱. Jokwe mambo mō̱ jombwea Yosia na mako̱m mao.

Sango a Yosia a ta nde Kiṅ’a Yuda, dina lao di ta nde ná Amon. Amon a ta bobe jita, a ta pe̱ owe̱ njimbidi. Ponda sango a Yosia a wedino̱, Yosia nde a timbi Kiṅ’a Yuda. Nde a ta po̱n nde a be̱ne̱ bukate̱ mimbu lo̱mbi! O mo̱nge̱le̱ ná a ta bobe ka sango e?— Ke̱m, a si ta nika!

Sefańa a langwedi bato ná ba s’owe̱ njimbidi

To̱ ke̱ a dia eso̱mbe̱, Yosia a ta a to̱ndo̱ sengane̱ Yehova. Ońola nika nde a po̱sino̱ o be̱ diko̱m bukate̱ na bato bena ba to̱ndi Yehova. Bongwane̱ mo̱ o bola nje e te̱nge̱n. Mako̱m ma Yosia mō̱ ma ta nde banja e?

Dina la diko̱m lao diwo̱ ná Sefańa. Sefańa a ta nde muto̱ped’a mudī ńena nu langwedi tumba la Yuda ná, yete̱na ba bengi  jowe̱ njimbidi, mambo ma bobe ma mapo̱ye̱ babo̱. Yosia a sengane̱ Sefańa na mo̱ owe̱ nde Yehova, seto̱ njimbidi.

Diko̱m la Yosia dipe̱pe̱ ná Yeremia. A ta nde mimbu mō̱ na Yosia, ba si ta pe̱ to̱ ba ja etum mō̱ na nune̱ ke̱ be o koka. Ba ta mako̱m ma bwam jita, ńai ńena ponda Yosia a wedino̱, Yeremia a tili mwenge mwa tobotobo ońola kwed’a Yosia. Yeremia na Yosia bongwane̱le̱ o bola nje e te̱nge̱n na o sengane̱ Yehova.

Yosia na Yeremia bongwane̱le̱ o bola nje e te̱nge̱n

Nje eyembilan a Yosia e mokwe̱le̱no̱ wa e?— To̱ na nika Yosia a tano̱ a dia son a muna, a ta a to̱ndo̱ bola nje e te̱nge̱n. A ta a bia ná angame̱n nde be̱ diko̱m na bato ba to̱ndi Yehova. Wa pe̱ bola me̱se̱ ná o po̱se nde mako̱m oteten a bato ba to̱ndi Yehova, mená mena mongwane̱ wa o bola nje e te̱nge̱n!

LANGA O BIBE̱L ANGO̱