Ala o mambo mena me

Ala o ebambu a mongo

 JOKWA 2

Rebeka a ta a pula bwese̱ Yehova muńe̱nge̱

Rebeka a ta a pula bwese̱ Yehova muńe̱nge̱

Rebeka a ta nde muto nu ta nu to̱ndo̱ Yehova. Dina la mom’ao di ta nde ná Isak. Mo̱ pe̱ a ta a to̱ndo̱ Yehova. Rebeka a boli nde ne̱ni o bia Isak e? Ne̱ni a lee̱le̱no̱ ná a mapula bwese̱ Yehova muńe̱nge̱ e? Di se̱le̱ kwala jombwea mom’ao, Isak.

Abraham nde a ta sango a Isak, Sara pe̱, ńango ao. Ba ta nde ba ja o mundi ma Kanaan, wuma yena bato ba si tano̱ ba bolea Yehova. Nde Abraham a ta a pula ná mun’ao a ba nde muto nu maboleye̱ Yehova. Ońola nika nde a lomno̱ muboled’ao, ponda po̱ nu ba mabele̱no̱ ná Eliese̱r, ná a kuseye Isak muto o mundi ba mabele̱no̱ ná Haran, wuma mbia ma Abraham mu tano̱ mu ja.

Rebeka a boli ebol’a ngińa na mulema mwe̱se̱ o toea kamel madiba

Eliese̱r alo o di lo̱ndo̱ na baboledi bape̱pe̱ ba Abraham. Di lo̱ndo̱ di ta bwaba jita. Balane̱ dom la kamel i ta i bambe̱ da na mabea. Ne̱ni Eliese̱r a wusano̱ bia njika muto o po̱sea Isak e? Ponda mo̱ na bane̱ baboledi ba po̱ino̱ o Haran, ba te̱m o tongo a madiba ońolana Eliese̱r a ta a bia ná, son a ponda, bito ba me̱nde̱ po̱ toa madiba oten. Na mo̱ a kane̱ Yehova ná: ‘Na baise̱ te̱ ngo̱ndedi po̱ ná e bole mba madiba, nde e bola mba madiba, e bola pe̱ kamel am madiba, na me̱nde̱ so̱ṅtane̱ ná nu muto nde o po̱sino̱.’

Na ni ngo̱ndedi, Rebeka, e po̱ o tongo. Bibe̱l e makwala ná a ta a do̱lo̱ jita. Eliese̱r a baise̱no̱ mo̱ madiba ma ńo̱,  Rebeka alabe̱ ná: ‘E, na mabola wa madiba, nde na me̱nde̱ pe̱ toea kamel ango̱ madiba.’ O me̱ne̱ e? Kamel i mańo̱ madiba mena! Rebeka a ta so̱ angame̱n ńa mīla, jondea na siba, o toea mo̱ madiba. We o je̱ne̱ o duta ne̱ni eno̱ bola ebolo na ngińa e?— Eliese̱r a ta a ńaka o je̱ne̱ ne̱ni Yehova alabe̱no̱ muka mwao.

Eliese̱r a boli Rebeka jita la mabea ma bwam. Ombusa nika, Rebeka alane̱ Eliese̱r na bane̱ baboledi omboa sango ao. Eliese̱r a langwedi babo̱ ońola nje Abraham a lomno̱ mo̱, na ne̱ni Yehova alabe̱no̱ muka mwao. Mbia ma Rebeka mu ta muńe̱nge̱ o jese̱le̱ ná Rebeka ale o diba omboa Isak.

Rebeka na Eliese̱r balo o Kanaan ná Rebeka a babe̱ na Isak

Nde o mo̱nge̱le̱ ná Rebeka a ta a pula wala o diba omboa Isak e?— Rebeka a ta a bia ná Yehova nde a lom Eliese̱r. Ońola nika nde ponda mbia mao mu baise̱no̱ mo̱ yete̱na a mapula wala o Kanaan o babe̱ na Isak, alabe nde ná: ‘E, na memea wala.’ Dibokime̱ne̱, alo nde na Eliese̱r. Ba po̱ino̱ o Kanaan, na mo̱ a babe̱ na Isak.

Nika Rebeka a bolino̱ nje Yehova a tano̱ a pula, Yehova a namse̱ mo̱. Ombusa mimbu jita, Yesu a yabe̱ o mbia mwa Rebeka! Wa pe̱, wembilane̱ te̱ Rebeka, o bwese̱ Yehova muńe̱nge̱, a me̱nde̱ namse̱ wa.

LANGA O BIBE̱L ANGO̱