Ala o mambo mena me

Bawedi be pe̱te̱ ná ba timba be̱ longe̱ na mbale̱ e?

Bawedi be pe̱te̱ ná ba timba be̱ longe̱ na mbale̱ e?

We na o kwala ná  . . .

  • e e?

  • ke̱m e?

  • yen ebe e?

 BIBE̱L E MAKWALA NÁ

“Bepumbwedi . . . be me̱nde̱ be̱.”Bebolo 24:15, Traduction du monde nouveau (Betukwedi ba Was’a peńa).

NJE WENO̱ NÁ O TOMBWANE̱ KE̱ O DUBE̱ NIKA

Lo̱ko̱mea ke̱ bandolo ba wedi.2 Korinto 1:3, 4.

Te̱me̱ la wonja na bo̱ngo̱ ba kwedi.Bonahebe̱r 2:15.

Dipita di bam la je̱ne̱ pe̱te̱ bandolo ba wedi.Yohane 5:28, 29.

 JE NÁ DI DUBE̱ NJE BIBE̱L E MAKWALANO̱ NA MBALE̱ E?

E, ońola yin njo̱m ilalo:

  • Loba nde e Muweked’a longe̱. Bibe̱l e mabele̱ Yehova Loba ná “tongo a longe̱.” (Myenge 36:10; Bebolo 17:24, 25) Nu ńena nu boli bewekedi be̱se̱ longe̱ e pe̱te̱ ná a bola moto nu wedi longe̱.

  • Loba a pumbwe̱le̱ bato o ponda kwaṅ. Bibe̱l e malangwa myango ma bato lo̱mbi—beso̱mbe̱, badun, bome, na bito—be ná ba timbi pe̱te̱ be̱ longe̱ o wase. Bō̱ ba si ta ba minda wo̱, nde mō̱ a jai mińa mine̱i o so̱ngo̱!Yohane 11:39-44.

  • Loba a be̱n ńo̱ngi o bata bola nika. Yehova a singe̱ kwedi; a me̱ne̱ nde mo̱ ka musingedi. (1 Korinto 15:26) A “mabwa ńo̱ngi” o buka nu musingedi, o bo̱le̱ kwedi tongwea na bepumbwedi. A mapula pumbwe̱le̱ ba bena a ne̱nge̱no̱ o mo̱nge̱le̱ mao na je̱ne̱ pe̱ ná be pe̱te̱ longe̱ o wase.Hiob 14:14, 15.

 MUEDI OŃOLA DUTEA

Ońola nje di madunano̱ di wo̱ pe̱ e?

Bibe̱l e mabola jalabe̱ la mu muedi o BEBOTEDI 3:17-19 na ROMA 5:12.