Ala o mambo mena me

Ala o ebambu a mongo

Mbe̱t’a dibongo e madie̱le̱ muna mulemlem kana musina a mabolane̱no̱ pai o te̱se̱ bo̱lo̱ o ngea

 OŃOLA BAYEDI

6: Mbe̱t’a dibongo

6: Mbe̱t’a dibongo

NJE NIKA E MAPULANO̱ KWALA

Eyal’a mbe̱t’a dibongo ye ná e pula kwala bediedi to̱so̱ belēdi. Ngedi iwo̱, e bambe̱ pe̱ ko̱kise̱ la muna ke̱ a dango bobe. Nde o ponda iwo̱ e mapula pe̱ kwala jokwe̱le̱ la muna bedangwedi ba bwam be mongwane̱ mo̱ o jokwa no̱ngo̱ bedomsedi ba bwam.

OŃOLA NJE NIKA ŃENO̱ MWEŃA

Min mimbu mi tombi, mbe̱t’a dibongo e si me̱ne̱ne̱ pe̱ o mbia mō̱, ebanja bayedi ba mo̱nge̱le̱ ná ko̱kise̱ la muna di mabola ná a si be̱ne̱ne̱ pe̱ mo̱me̱ne̱ edube. Nde, bayedi be dibie̱ ba mate̱se̱ myeka mangame̱n, bokwe̱le̱ pe̱ bana babu o bupe̱ mo̱.

“Bana bangame̱n langwabe̱ nje bola na nje ba s’angame̱nno̱ bola o jongwane̱ babo̱ o be̱ bato bou. Bana be nde ka bo̱lo̱ bo si be̱n pai ke̱ ba si be̱n mbe̱t’a dibongo​—nika ńe pe̱ ná e lenea babo̱ mbeu a ńolo.”​—Pamela.

NJE WENO̱ NÁ O BOLA

Bama o byala bo̱ngo̱. Mun’ango̱ a si mabupe̱ te̱ myeka mo̱ngo̱, ko̱kise̱ mo̱. O mune̱ mudi pe̱, le̱le̱me̱ o sesa mo̱ yete̱na a bupe̱ myeka.

“Na masesa bana bam ponda ye̱se̱ ná be sengane̱ o nin wase ńena sengane̱ leno̱ pasa. Musesako mu mongwane̱ ná ba kase beko̱kisedi na bo̱bise̱ la ńolo ke̱ e mapula nika.”​—Kristine.

BETE̱SEDI BA BIBE̱L: “Nje moto a masano̱, mo̱ pe̱ nde a mumbwano̱.”​—Galatia 6:7.

Me̱ne̱ beko̱kisedi. Ombwea mimbu na dime̱ne̱ la so̱ṅtane̱ la muna na diwuse̱ a bolino̱. Beko̱kisedi be mokwe̱le̱ nde ponda ye̱se̱ ke̱ be bupisane̱ diwuse̱ ​—k’eyembilan, we ná o se̱le̱ no̱ngo̱ne̱ muna telefon ońola pambo a ponda po̱ yete̱na a mabolane̱ mo̱ ńai a bobe. O mulemlem ma ponda pe̱, we̱ ná o si kolise̱ mawuse̱ masadi.

“Na makeka o so̱ṅtane̱ nga mun’am a kwe̱m nde mba na m’boṅsan to̱so̱ ná a po̱ngi nde diwuse̱. Diwengisan le oteten a ede̱mo a bobe muna a be̱nno̱ yena wangame̱nno̱ bo̱le̱ na diwuse̱ a po̱ngino̱ lena wangame̱nno̱ po̱ngulane̱.”​—Wendell.

BETE̱SEDI BA BIBE̱L: “A basango, lo si lingise̱ bana bańu, ba si ya be̱ ba kakame̱.”​—Kolose 3:21.

Be̱ ndolo. E bo̱bi ná bana ba kase mbe̱t’a dibongo na we̱le̱ pe̱ mo̱ o ebolo yete̱na ba bi ná bayedi babu ba to̱ndi babo̱.

“Ponda te̱ mun’asu a mawusano̱, di mabola mo̱ mbaki ná je muńe̱nge̱ na bedomsedi ba bwam be̱se̱ a se̱le̱no̱ no̱ngo̱. Di matele̱ye̱ pe̱ mo̱ ná be bedomsedi be si mańamse̱ dina lao la bwam yete̱na a po̱ngulane̱ mambo, na ná je pe̱ owa o jongwane̱ mo̱ bola nika.”​—Daniel.

BETE̱SEDI BA BIBE̱L: “Ndolo e mawe̱lisane̱, ńe pe̱ muyao.”​—1 Korinto 13:4.