Ala o mambo mena me

Ala o ebambu a mongo

Dina la Loba ná nja e?

Dina la Loba ná nja e?

We te̱ o pula bia moto, lambo laboso o mabolano̱ le nde ná o baise̱ mo̱ ná: “Dina lo̱ngo̱ ná nja e?” Yete̱na wangame̱n baise̱ Loba mi myuedi, ne̱ni a me̱ndeno̱ jalabe̱ e?

“Mba nde ne Yehova, dina lam di.”​Yesaya 42:8.

Mo̱ nged’a boso ni o masengano̱ di dina e? Ye ná e be̱ nika, ońolana jita la batukwedi ba Bibe̱l ba si mabolane̱ mo̱ jita, to̱ ná ba si mabolane̱ nde mo̱ ná bambam. Ba yo̱ki nde bolane̱ “SANGO” o epol’ao. Nde dina la Loba di maso̱be̱ o te̱xt a bebaedi ya Bibe̱l lambo ka 7 000 la ngedi. Di dina di longedi nde na mom ma litera ya Bonahebe̱r ine̱i, ye nde YHWH to̱ JHVH, yena i tukwabe̱ ná “Yehova” na bwambo ba Duala.

Dina la Loba di maso̱be̱ o te̱xt a Bonahebe̱r ńe̱se̱ na o jita la betukwedi

Myenge ma Munja-ma-wanga Ebwe’a mbu 1 P.A., BONAHEBE̱R

Betukwedi ba Tyndale 1530, INGLISI

Betukwedi ba Reina-Valera 1602, PAŃA

Betukwedi ba Union Version 1919, KINA

OŃOLA NJE YENO̱ MWEŃA O BIA DINA LA LOBA

Di dina le Loba mo̱me̱ne̱ mweńa. To̱ moto a si boli Loba dina, mo̱me̱ne̱ nde a po̱si dina lao. Yehova mo̱ ná: “Dina lam din ońola bebe be̱se̱, nika nde bangame̱nno̱ bele̱ mba o ńo̱ṅo̱n ye̱se̱.” (Bebusedi 3:15) Dina la Loba, Yehova, di maso̱be̱ o Bibe̱l buka to̱ njik’eto̱ti a be̱nno̱ ka: Ńangum, Tete̱, Sango, to̱ Loba, na buka to̱ njika mina mape̱pe̱ ka: Abraham, Mose, David, to̱ Yesu. Jemea la Yehova le pe̱ nde ná dina lao di biane̱. Bibe̱l e makwala ná: “Ná ba bie ná wame̱ne̱ mō̱ nu be̱n dina ná Yehova nde we Ńasam omo̱ń a wase ńe̱se̱!”​—Myenge 83:19.

Di dina le Yesu mweńa. O muka mu belabe̱ ná A Tete̱ Ńasu to̱ Muka ma Sango, Yesu okwe̱le̱ bokwedi bao o kane̱ Loba na ben byala ná: “Dina lo̱ngo̱ di dubabe̱ [to̱ “sangisabe̱,” NW].” (Mateo 6:9) Yesu mo̱me̱ne̱ a kane̱ Loba ná: “A Te, busise̱ dina lo̱ngo̱.” (Yohane 12:28) Busise̱ la dina la Loba nde di ta Yesu lambo laboso o longe̱ lao, ońola ni njo̱m nde a kwalino̱ o muka ná: “Na bīse̱ babo̱ dina lo̱ngo̱, na me̱nde̱ pe̱te̱ bīse̱ mo̱.”​—Yohane 17:26.

Di dina le ba ba bi Loba mweńa. Tumba la Loba o mińa ma kwaṅ di ta di so̱ṅtane̱ ná betatedi na jongise̱ lao ba ta nde ba se̱me̱ye̱ o mpo̱m ma dina  la Loba. “Dina la Yehova le nde njongo a ngińa, nute̱m na sim nu mawutame̱ oten e mbaki.” (Minia 18:10) “To̱ nja nu mabele̱ dina la Yehova a me̱nde̱ jonga.” (Yoel 2:32) Bibe̱l e malee̱ ná dina la Loba di mawe̱le̱ ba ba maboleye̱ mo̱ diwengisan. “To̱ mane̱ matumba ma madangwa nde diwo̱ te̱ o dina la lao loba, biso̱ di madangwa nde o dina la Yehova, Loba lasu, m’ba na m’ba.”​—Mika 4:5; Bebolo 15:14.

NJE DI DINA DI MABĪSE̱NO̱

Loba mo̱me̱ne̱ mō̱ nde e ná a bambe̱ di dina. Bamabie̱ jita ba kwali ná dina la Yehova di be̱n nde beteledi ná “A mabola ná e timbe be̱.” Yehova Loba a boli beteledi ba dina lao ponda a bīse̱no̱ Mose dina lao na ben byala ná: “Na me̱nde̱ timba be̱ nje na po̱sino̱ o be̱.” (Bebusedi 3:14, NW) Dina la Loba di si mabonde̱ buka te̱ ná mo̱ nde e Muwekedi nu mabole̱ ná me̱se̱ ma be̱. Dina lao di mabīse̱ pe̱ k’ao ni dongame̱n o bola ná mo̱me̱ne̱ name̱ne̱ pe̱ na bewekedi bao ba timbe be̱ to̱ nje e mapule̱ o bwam ba londise̱ mwano mao. Beto̱ti be mabīse̱ nde epol’ao yasam, doi lao la byanedi, to̱ ngiń’ao, nde dina lao la Yehova buka te̱ nde di bambe̱ nje ye̱se̱ eno̱, na nje ye̱se̱ eno̱ ná a timba be̱.

Di dina di mabīse̱ ná Loba a be̱n ponda ońol’asu. Beteledi ba dina la Loba be mapula nde kwala ná a mombwea bewekedi bao be̱se̱, na biso̱ pe̱. Buka nika, kana Loba a bīse̱no̱ dina lao nika e mapula nde kwala ná ńo̱ng’ao ńe nde ná di bie mo̱. Omo̱ń a me̱se̱, Yehova indi bīse̱ dina lao etum a ponda, oboso ná moto a mawekabe̱. Yehova a mapula ná je̱ne̱ mo̱ ka Moto jeno̱ ná di sisea be̱be̱.​—Myenge 73:28.

Bolane̱ la dina la Loba di malee̱ ná di be̱n ponda ońol’ao. K’eyembilan, we ná o kwalane̱ moto weno̱ o pula be̱ne̱ ka diko̱m ná a bele̱ wa na dina lo̱ngo̱. Ne̱ni o me̱nde̱no̱ senga ke̱ nu moto a bangi bolane̱ dina lo̱ngo̱ e? Na ponda, we ná o baise̱ na wame̱ne̱ nga nu moto a mapula be̱ diko̱m lo̱ngo̱ na mbale̱. Nā pe̱ nde yeno̱ na Loba. Yehova a langwedi mbel’a moto dina lao, a mapula pe̱ ná di bolane̱ mo̱. Di boli te̱ nika, ke̱ je nde o lee̱le̱ Yehova ná di mapula sisea mo̱ be̱be̱. A me̱ne̱ nate̱na mo̱me̱ne̱ ba “bena ba dube̱ dina lao”!​—Maleaki 3:16.

Jokwa la dina la Loba nde le tanga la mweńa laboso o bia mo̱. Nde di s’angame̱n suea wa. Jangame̱n bia nja ńe nu Moto nu bambe̱ di dina. Jangame̱n jokwa bia ne̱ni eno̱.

DINA LA LOBA NÁ NJA E? Dina la Loba ná Yehova. Di dina di mabīse̱ ná Loba mo̱me̱ne̱ mō̱ nde e nu nu dongame̱n o londise̱ mwano mao