Ala o mambo mena me

Ala o ebambu a mongo

Muyao​—Ede̱mo e maleabe̱le̱ o byala na o bebolo

Muyao​—Ede̱mo e maleabe̱le̱ o byala na o bebolo

EBOLED’A muyao e mabola mbaki na lo̱ko̱mea! Di matimbise̱le̱ moto masoma ke̱ di me̱ne̱ ná a mombwea biso̱. Kana mō̱ ńasu te̱ a to̱ndino̱ ná ba lee̱le̱ mo̱ muyao, ne̱ni jeno̱ ná di sa yen ede̱mo a bwam e?

Muyao mu mabaise̱ ná jombweye bwam ba bane̱ na mbale̱​—je nde ná di lee̱le̱ nika tongwea na byala na bebolo. Kana muyao mweno̱ nde o bebolo, lee̱le̱ la bede̱mo ba bwam buka te̱ o pula je̱ne̱ne̱ na bane̱ di si dongame̱n. Muyao ma mbale̱ mu se̱medi nde o ndol’a mbale̱ na o ndutu di mabwano̱ ke̱ bane̱ ba mataka. Buka nika, nin ńai a muyao ńe nde dongo diwo̱ l’epum’a mudī ya Loba yena Kriste̱n te̱ ńangame̱nno̱ sa. (Gal. 5: 22, 23, NW) Kana jangame̱nno̱ sa muyao, jombweye so̱ ne̱ni Yehova na Mun’ao ba lee̱le̱no̱ yen ede̱mo, na ne̱ni pe̱ jeno̱ ná di bupe̱ eyembilan abu.

YEHOVA E MUYAO NA BE̱SE̱

Yehova e muyao, a mombwea pe̱ be̱se̱, nate̱na mo̱me̱ne̱ “ba ba si bi masoma, na babobe pe̱.” (Lukas 6:35) K’eyembilan, Yehova “a mabola wei ao i pańa omo̱ń a babobe na babwam, a mayo̱lise̱ pe̱ mbua omo̱ń a bate̱m na sim na basite̱m na sim.” (Mat. 5:45) Ońola nika, to̱ ba bena ba si membe̱ Yehova ka Muweked’abu pe̱ ba matombwane̱ nje ye̱se̱ a mabolano̱ na muyao ońola longe̱ na bwane̱ pe̱ bonam muńe̱nge̱.

Di me̱ne̱ eyembilan a tobotobo ya muyao o nje Yehova a boledino̱ Adam na Eva. Dibokime̱ne̱ ombusa babo̱ ko̱ o bobe, Adam na Eva ba ‘longi byadi ba jangolo, ba po̱ngea babo̱ mo̱me̱ne̱ bekube̱.’ Nde Yehova a ta a bia ná e me̱nde̱ pula babo̱ mbo̱ti yangame̱n ná ba we̱le̱ ja etum na mōnda ma Ede̱n, wuma mińangadu mi loabe̱no̱ na “nge̱nge̱le̱ na ngangadi.” Yehova ombwedi so̱ ńo̱ng’abu na muyao, a po̱ngea babo̱ “mbo̱t’a byobo ba ńama” ya myaba.​—Bbot. 3:7, 17, 18, 21.

To̱ná Yehova eno̱ muyao na “babobe na babwam,” a be̱n ńo̱ngi tobotobo o lee̱le̱ baboledi bao ba jemea muyao. K’eyembilan, o mińa ma muto̱ped’a mudī Sakaria, Ange̱l po̱ e ta e bwa ndutu o je̱ne̱ ne̱ni ebol’a longise̱ la tempe̱l peńa o Yerusalem e te̱mno̱. Yehova a sengane̱ mutaka ma ni Ange̱l, na mo̱ alabe̱ na “byala ba bwam na ba lo̱ko̱mea.” (Sak. 1:12, 13) Yehova a boli mulemlem o mińa ma muto̱ped’a mudī Elia. E po̱i ponda po̱ muto̱ped’a mudī a tano̱ a wo̱lea, na mo̱ a baise̱ Yehova ná a no̱nge mudī mao. Yehova a so̱ṅtane̱ besengedi ba Elia na mo̱ a loma Ange̱l o jembe̱ mo̱. Omo̱ń a nika, Loba a boli muto̱ped’ao ńa mudī mbaki ná a titi muso̱lo̱ki. Elia a kusino̱ ben byala ba muyao na jongwane̱ a tano̱ a be̱ne̱ ńo̱ngi, a ta be̱be̱ o wala londise̱ m’bē̱ mu ta mu bolabe̱ mo̱. (1 Ki. 19:1-18) Oteten a baboledi ba Loba be̱se̱, nja nu lee̱le̱ o dime̱ne̱ lasam yen ede̱mo a Yehova ya muyao e?

 YESU​—MOT’A MUYAO NUNDE̱NE̱

O ebol’ao ya dikalo, Yesu a ta a biane̱ ka mot’a muyao na nu be̱n ponda ońola bane̱. A si ta moto nu kwań to̱ nu mabande̱ bape̱pe̱. Ndedi e tute̱le̱ mo̱ o kwala ná: “Ya na mba, bińo̱ be̱se̱ ba wo̱li na ba bambe̱ myūna mi dili, nde na mabola bińo̱ wumse̱. . . . Ebanja eko̱ko̱s’am e s’ambi.” (Mat. 11:28-30) Muyao mao mu tute̱le̱ bato o bupe̱ mo̱ to̱ we̱ni a tano̱ ala. Yesu a ta “a bwea” babo̱ ndedi, a dese̱ babo̱, a bo̱lise̱ baboedi na ba m’boko, okwe̱le̱ pe̱ babo̱ “mambo jita” jombwea Sango.​—Marko 6:34; Mat. 14:14; 15:32-38.

Yesu a lee̱le̱ muyao mao ninka ná, a ta a wasa so̱ṅtane̱ bato na be̱ne̱ pe̱ bedangwedi ba bwam o mbasanedi ma bane̱. Yesu a kasi be̱se̱ na “muyao” bena ba ta ba wasa mo̱ na mbale̱, esibe̱ jombwea njika mutaka ba be̱nno̱. (Lukas 9:10, 11) K’eyembilan, a si kimedi muto nu ta nu soa na bo̱ngo̱, ńena to̱ná a si tano̱ a sanga bupisane̱ mbend’a Mose, a tapi mbo̱t’ao na dipita ná a me̱nde̱ bo̱lisabe̱ na diboa lao la busa la maya. (Lev. 15:25-28) Yesu a bwedi nu muto nu bou 12 la mbu ndedi, a kwalane̱ mo̱ ná: “A mun’am, jemea lo̱ngo̱ jongise̱ wa, ala na musango, bo̱ na ndeng’ango̱.” (Marko 5: 25-34) E se̱ eboled’a muyao ya bwam e!

MUYAO MU MABAISE̱ BEBOLO BA BWAM

O byembilan di wuno̱ je̱ne̱, di so̱ṅtane̱ ná muyao mu maleabe̱le̱ nde na bebolo. Yesu a bonde̱ mweńa ma lee̱le̱ muyao o bebolo o munia mao ma mot’a Samaria ńa ndedi. To̱ná bosinga bo tano̱ oteten a bato ba Samaria na Bajū, nu mot’a Samaria o mun munia a bwedi nde nu moto ndedi bato b’ebwan ba songwane̱no̱ mbo̱ti, ba dipa mo̱, ba dia mo̱ a nanga be̱be̱ na kwedi o ngea. Muyao mu tute̱le̱ nun mot’a Samaria o bola lambo. A kaki bebango bao, a wana mo̱ o ndabo a be̱n. Na nu mot’a Samaria a sawea sango a ndabo a be̱n mo̱ni ná a bongwe mo̱, a bata pe̱ ná to̱ nje a me̱nde̱no̱ busise̱ buka nika, a me̱nde̱ timbise̱le̱ mo̱ mo̱ o betimbedi bao.​—Lukas 10:29-37.

To̱ná muyao mu me̱ne̱ne̱no̱ nde o bebolo, moto e pe̱ ná a lee̱le̱ mo̱ o byala ba bwam na be membe̱. Ońola nika, yete̱na “ndutu ńe moto o mulema e mańo̱so̱ mo̱” Bibe̱l e bati ná “eyal’a muyao e makenjisane̱.” (Min. 12:25) Je ná jembe̱ mudī ma bane̱ yete̱na muyao na bwam ba tute̱le̱ biso̱ o jabane̱ mambo ma malongisane̱ na babo̱. * Byala basu ba muyao be me̱nde̱ lee̱le̱ ná di mombwea babo̱. Ba kusi te̱ jembame̱, ba me̱nde̱ we̱le̱ lembe̱ mitakisan mabu.​—Min. 16:24.

NE̱NI BE̱ MUYAO

Kana di wekabe̱no̱ nde “o bowan ba Loba,” mō̱ ńasu te̱ e ná a sa yen ede̱mo a muyao. (Bbot. 1:27) K’eyembilan, Yulio, mwaned’a bila ńa Roma ńena ba tano̱ ba bake̱ Paulo ná alane̱ mo̱ o Roma, a ta “muyao na Paulo, a ta a bola mo̱ wonja o wala omboa mako̱m mao o kusane̱ babo̱ dibongo” o mundi ma Sidon. (Bebolo 27:3) Ombusa ponda, baje̱ o eyond’a Malta ba ta ba lee̱le̱ Paulo na bane̱ be̱se̱ ba ta binda mwemba na mo̱ muyao munde̱ne̱. Bato ba Malta ba ta na mo̱me̱ne̱ ba botea babo̱ wea ońolana mulo̱lo̱ko̱ mu ta jita. (Bebolo 28:1, 2) E, to̱ná nje ba bolino̱ e tano̱ yangame̱n sesabe̱, muyao mu buki bebolo ba bwam moto eno̱ ná a bola ponda iwo̱.

Ná di do̱lisane̱ Loba, muyao mwangame̱n nde be̱ ede̱mo a po̱ko̱po̱ko̱ ya longe̱ lasu la buńa te̱. Ońola nin njo̱m nde Yehova a  mabaise̱no̱ biso̱ ná di ‘bo̱te’ muyao. (Kol. 3:12) Nde di memba ná ponda iwo̱ e titi bu o be̱ne̱ yen ede̱mo a Loba. Ońola nje nika e? Ye ná e be̱ biso̱ ndutu o lee̱le̱ muyao ońola iso̱n, bo̱ngo̱, mitakisan, to̱so̱ di to̱ndi nde biso̱me̱ne̱. To̱ na nika, je ná di buka min mitakisan yete̱na di se̱medi o mudī-musangi, jembilane̱ pe̱ mbadi Yehova a malee̱le̱no̱ muyao.​—1 Kor. 2:12.

Mo̱ je ná di wasa bia o njika mambo jangame̱nno̱ bata be̱ muyao e? Di baise̱ na biso̱me̱ne̱ ná: ‘Mo̱ na malambe̱ye̱ bane̱ toi na ndedi e? Mo̱ ne makwasi o jongwane̱ bape̱pe̱ e? Njika ponda na sukanno̱ lee̱le̱ moto nu titi elong’am ya mbia to̱ diko̱m la ńo̱ngo̱ńo̱ngo̱ muyao e?’ Je so̱ ná di te̱se̱ ná di bate bia bato ba dinge̱le̱ biso̱, tobotobo ba be o mwemba ma Kriste̱n. Na nika nde jeno̱ ná di bia bete̱medi babu na ńo̱ng’abu. Denge̱ di mawe̱ o lee̱le̱ babo̱ muyao o mbadi di wusano̱ to̱ndo̱ ná ba lee̱le̱ biso̱ mo̱ ke̱ di be̱ o epol’abu. (Mat. 7:12) O sukan, Yehova a me̱nde̱ namse̱ miwe̱n di mapo̱ngo̱no̱ o sa muyao yete̱na di baise̱ mo̱ jongwane̱.​—Lukas 11:13.

MUYAO MU MADUTA BAPE̱PE̱

Ponda ńamuloloma Paulo a to̱pedino̱ jombwea mato̱ti ma malee̱ ná e nde muboled’a Loba, a kwaledi pe̱ ońola “muyao.” (2 Kor. 6:3-6) Bato ba sisedi Paulo o mbasan ebanja a ta muyao, a lee̱le̱ mo̱ o bebolo na o byala. (Bebolo 28:30, 31) Mulemlem nde biso̱ pe̱ jeno̱ ná di duta bato o mbale̱ tongwea na bebolo basu ba muyao. Je te̱ muyao na be̱se̱, name̱ne̱ pe̱ na bate̱nge̱ne̱ biso̱, nika ńe ná e we̱le̱ babo̱ son a mbidimbidi ma wea o milema mu me̱nde̱ ńamwe̱le̱ bosinga babu. (Rom. 12:20) Na ponda, belēdi ba Bibe̱l be ná be tapa babo̱.

O paradisi ni maye̱ o wase, jita la ba bena ba me̱nde̱ pumbwabe̱le̱ ba me̱nde̱ be̱ muńe̱nge̱ o leabe̱le̱ muyao ma mbale̱, yen ebe ka nged’a boso. Babo̱ pe̱ ba me̱nde̱ timbise̱le̱ masoma, na lee̱le̱ bape̱pe̱ muyao. To̱ nja nu si me̱nde̱ lee̱le̱ bane̱ muyao a si me̱nde̱ be̱ne̱ epolo owas’a Janea la Loba. O mune̱ mudi, be̱se̱ Loba a me̱nde̱no̱ do̱lisane̱ o be̱ longe̱ o bwindea ba me̱nde̱ leane̱ mō̱ na nune̱ muyao na ndolo. (Mye. 37:9-11) E se̱ mbo̱le̱ na musango ba me̱nde̱ be̱ o wase e! Nde, oboso ná nin ponda bonam e mapo̱, ne̱ni jeno̱ ná di tombwane̱ tatan ke̱ di lee̱le̱ bape̱pe̱ muyao e?

LEE̱LE̱ LA BANE̱ MUYAO DI MAWANA TOMBWANE̱

Bibe̱l mo̱ ná, “mot’a ndedi [to̱ ńe muyao] a mabolea nde mo̱me̱ne̱ bwam.” (Min. 11:17) Mot’a muyao a maduta bato, babo̱ pe̱ ba malee̱le̱ mo̱ muyao. Yesu mo̱ ná: “Lo me̱nde̱ nde me̱ne̱be̱ na dime̱ne̱ lo mame̱ne̱ne̱no̱.” (Lukas 6:38) Ońola nika, mot’a muyao a makusa mako̱m na bo̱bise̱ la ńolo, a kombe̱ pe̱ mo̱.

Ńamuloloma Paulo ome̱le̱ Kristen a mwemba ma Efeso ná bińo̱ “leane̱ muyao mō̱ na nune̱, lo be̱ ndedi, lo lakisane̱ mawuse̱ mō̱ na nune̱.” (Efe. 4:32) Mwemba mu matombwane̱ jita yete̱na mu longedi na Kriste̱n ye muyao na ndedi, na yena i mawase̱ o jongwane̱ mō̱ na nune̱. Yi ńai a Kriste̱n i si mabolane̱ byala ba bobe, misan ma ngińa to̱ make̱ko̱ ma mabwese̱ nune̱ ndutu. Ba mapo̱ngo̱ miwe̱n o bolane̱ eyem’abu o jongwane̱ bape̱pe̱ o mulopo ma camane̱ eto̱pe̱to̱pe̱. (Min. 12:18) Na nika nde mwemba mu mańakano̱ o mbad’a mudī.

E, muyao mwe nde ede̱mo e maleabe̱le̱ o byala na o bebolo. Je te̱ muyao, ke̱ je nde o lee̱le̱ ede̱mo a bwan na ya sanga la mulema ya Yehova, Loba lasu. (Efe. 5:1) Na nika nde di membe̱no̱ myemba masu na duta pe̱ bape̱pe̱ o jowe̱ la mbale̱. Di we̱ so̱ ná di biane̱ ka bato be muyao!

^ par. 13 Di me̱nde̱ to̱pea ońola bwam o mulopo m’ekwali mō̱ ma mi dibua mi mato̱peye̱ epum’a mudī-musangi ma Loba.