Ala o mambo mena me

Ala o ebambu a mongo

Buka bwemba ba mo̱nge̱le̱ mo̱ngo̱

Buka bwemba ba mo̱nge̱le̱ mo̱ngo̱

WE OTETEN a ewe̱nji! Musinged’ango̱ Satan a mabolane̱ elongisan a bila ye bobe jita te̱nge̱ne̱ wa. Njika mo̱ e? Camane̱ la mo̱nge̱le̱! Y’elongisan e boṅsabe̱le̱ nde tobotobo o janane̱ mo̱nge̱le̱ mo̱ngo̱, seto̱ ńol’ango̱ ń’eyobo.

O diwengisan na yine̱ Kriste̱n, ńamuloloma Paulo a ta omabe̱le̱ ońola lambi la Satan la camane̱ la myango. K’eyembilan, bō̱ o Korinto ba ta ba lakisane̱ babo̱me̱ne̱ jita—bo̱nge̱le̱ ná ba bam o mbale̱ ńai ba titino̱ ná ba ko̱ to̱ buńa. (1 Kor. 10:12) Ońola nika nde Paulo a bolino̱ din jome̱le̱: “Na mabwa bo̱ngo̱ ná mo̱nge̱le̱ mańu me ná ma ńamsabe̱ na panda etum na mbale̱ na bosangi o Kristo, kana ńama-bwaba e wo̱ndino̱ Eva na misomba mao.”​—2 Kor. 11:3.

Byala ba Paulo be malee̱ mweńa ma si be̱ne̱ne̱ moto mo̱me̱ne̱ lakisane̱ di bo̱le̱. Ná o buke bwemba ba mo̱nge̱le̱ mo̱ngo̱, wangame̱n jemba lambi la camane̱ myango na tata wame̱ne̱ na mo̱.

NE̱NI CAMANE̱ LA MO̱NGE̱LE̱ LENO̱ LAMBI E?

Nje ye camane̱ la mo̱nge̱le̱ e? O wan, le nde bolane̱ la byala ba mawo̱ndo̱n o bwam ba die̱le̱ mo̱nge̱le̱ na beboledi ba bato. Bō̱ ba makobisane̱ camane̱ la mo̱nge̱le̱ na “mawo̱ndo̱n, be̱ la mpenga, tute̱le̱ moto o bola lambo ońola muse̱ṅ mo̱ngo̱, die̱le̱ mo̱nge̱le̱ ma moto, [na] ewe̱nji ya mo̱nge̱le̱” mulatako na “si be̱ la mbale̱, bobe na beboledi be si te̱nge̱n.”​—Propaganda and Persuasion.

Ne̱ni camane̱ la mo̱nge̱le̱ leno̱ lambi e? Di wutam—ka po̱isin ńe o ngo̱ di si me̱ne̱no̱, to̱ senga enumba—di be̱n pe̱ nde ngińa o mo̱nge̱le̱. Di si me̱ne̱ camane̱ la mo̱nge̱le̱ ka nje te̱ leno̱. Ońola nika, ńa dibie̱ mō̱ Vans Pakard mo̱ ná: “Jita lasu buka nje di  mo̱nge̱le̱no̱, di matutabe̱le̱ nde o bola lambo.” Ńa dibie̱ nupe̱pe̱ mo̱ ná camane̱ la mo̱nge̱le̱ di boli ná bato ba be̱ne̱ bedangwedi ba bobe, nika e die̱le̱ o ‘bosinga, bila, mitakisan ońola muso̱no̱ m’eyobo to̱so̱ ebasi.’​—Easily Led—A History of Propaganda.

Tatan so̱, yete̱na mot’a benama e ná a wo̱ndo̱ biso̱ tongwea na camane̱ la mo̱nge̱le̱, ngedi ininga na Satan e? Oko o bia mot’a benama botea na ponda a wekabe̱no̱. Tatan “wase ńe̱se̱” ńe nde owas’a ngiń’ao. E ná a bolane̱ to̱ njik’epas’a wase ná a camane̱ mpoṅ mao. (1 Yohane 5:19; Yohane 8:44) Satan ‘a dimse̱ so̱ṅtane̱’ la bato jita na camane̱ la mo̱nge̱le̱ mao ńai ńena tatan e nde o ‘lo̱ndo̱ wase ńe̱se̱.’ (2 Kor. 4:4; Bbī. 12:9) Ne̱ni weno̱ ná o lembe̱ camane̱ la mo̱nge̱le̱ mao e?

OÚSE̱ DUBE̱ LO̱NGO̱

Yesu a boli ben byanedi be wam, o bwam ba janane̱ camane̱ la mo̱nge̱le̱: “Lo me̱nde̱ bia mbale̱, nde mbale̱ e me̱nde̱ timbise̱ bińo̱ wonja.” (Yohane 8:31, 32) Bila be te̱, mot’a bila a be̱n ńo̱ngi o bia owe̱ni kusa bediedi be te̱nge̱n, ońolana musingedi a me̱nde̱ bolane̱ mambo ma titi mbale̱ ná a wo̱nde mo̱. Owe̱ni so̱ jeno̱ ná di kusa bediedi ba mbale̱ e? Yehova a boli biso̱ mo̱ o Eyal’ao, Bibe̱l. We ná o so̱ oten nje ye̱se̱ e mapule̱ wa o janane̱ camane̱ la mo̱nge̱le̱ la Satan.​—2 Tim. 3:16, 17.

Ye mbale̱, mucamane̱ mo̱nge̱le̱ nunde̱ne̱ Satan a bi nika. A mabolane̱ ebe̱yed’ao ya mambo ya nin wase o bola ná bato ba si langa Bibe̱l to̱ jokwa mo̱. O si ko̱ o di lambi lao! (Efe. 6:11.) “We̱le̱ bia nje ye” matongo ma mbale̱ me̱se̱. (Efe. 3:18) Nik’e me̱nde̱ baise̱ wa miwe̱n jita. Nde o̱nge̱le̱ nin mbal’a dibongo mutiledi Noam Comsky a tilino̱: “To̱ moto a si me̱nde̱ songe̱ mbale̱ o bo̱ngo̱ bo̱ngo̱. Ye nde lambo wangame̱nno̱ wasa na wame̱ne̱.” Ońola nika “wasa na wamo̱me̱ne̱” tongwea na “wasa betiledi buńa te̱” na iwiye̱.​—Bebolo 17:11.

Ná o buke bila ba mo̱nge̱le̱ mo̱ngo̱, wangame̱n o jemba lambi camane̱ la mo̱nge̱le̱ di be̱nno̱, na tata wame̱ne̱ te̱nge̱ne̱ mo̱

Kika o mo̱nge̱le̱ mo̱ngo̱ ná Satan a si mapula ná o duteye mbad’a bwam to̱so̱ ná o be̱ne̱ mo̱nge̱le̱ ma te̱nge̱n. Ońola nje e? Kalati po̱ ni belabe̱ ná Media and Society in the Twentieth Century e makwala ná camane̱ la mo̱nge̱le̱ “di be̱n nde ngińa ke̱ bato . . . ba  bo̱bi ńai ba si mawase̱le̱no̱ pe̱ mambo nga me mbale̱ to̱ ke̱m.” Ońola nika so̱, o si bo̱bo̱ to̱ ko̱ ndima o jemea nje ye̱se̱ o masengano̱. (Min. 14:15) Be̱ ye̱ne̱, o bolane̱ pe̱ ngiń’ango̱ ńa dutea o jouse̱ dube̱ lo̱ngo̱.​—Min. 2:10-15; Rom. 12:1, 2.

NO̱NGO̱ JANGAME̱YE̱ NA EDĪ YA JABA NA YA JANEA

Bato ba bila ba malule̱ myano, ba mabolane̱ camane̱ la mo̱nge̱le̱ o bo̱bise̱ ngiń’a mulema na edī ya bila ya bane̱. Ba mabola bate̱nge̱ne̱ babo̱ banane̱le̱ mō̱ na nune̱, to̱so̱ ba lemse̱ babo̱ ná ba pande na badie̱le̱ babo̱. Bato ba makwala ná mwaned’a mulo̱ṅ mō̱ o Jaman emedi ná njo̱m po̱ ba bo̱lo̱ne̱no̱ bila ba wase ńe̱se̱ ba boso e ta nde ná “bato ba ta ba no̱ngo̱be̱ milema tongwea na camane̱ la mo̱nge̱le̱ ka pakatolo na ńama-bwaba.” Satan a mabolane̱ i ńai a misomba o jaba ná aneye; k’eyembilan, a makeka o we̱le̱ mpungu oteten a bonasango na bonańango, to̱so̱ bola babo̱ ná ba pande na bebokedi ba Yehova ońola nje ba me̱ne̱no̱ ka ni si te̱m na sim, to̱so̱ ońola lambo di lingise̱ babo̱.

O si wo̱ndo̱be̱! Ese̱le̱ eyal’a Loba e die̱le̱ wa. K’eyembilan, o nje e mombweye̱ mulatako na bonaso̱ngo̱ na bonańo̱ngo̱, Bibe̱l e mabola malea o benga “lakisane̱ mō̱ na nune̱” na be̱ makwasi o pongulane̱ myambo. (Kol. 3:13, 14; Mat. 5:23, 24) E mome̱le̱ biso̱ na iwiye̱ ná di si pandise̱ biso̱me̱ne̱ na mwemba. (Min. 18:1) Kekise̱ belongisan bo̱ngo̱ ba bila te̱nge̱ne̱ camane̱ la mo̱nge̱le̱ la Satan. Baise̱ na wamo̱me̱ne̱ ná: ‘Ngedi ni sukan na tano̱ o ni ńai a bete̱medi, nje e tute̱le̱ bedomsedi bam e? Mudī ma wase nga mudī ma Loba e?’​—Gal. 5:16-26; Efe. 2:2, 3.

O S’ESE̱LE̱ NÁ LAKISANE̱ LO̱NGO̱ DI BO̱MBE

Sonja ni si lakisan mudie̱le̱ mo̱ e si me̱nde̱ jana bwam. Camane̱ la mo̱nge̱le̱ pe̱ di me̱nde̱ nde bo̱bise̱ mulatako na lakisane̱ le oteten a ni sonja na mwaned’ao. Be ná ba kwala ná: “O titina o lakisane̱ banedi bo̱ngo̱!” na ná “o s’ese̱le̱ pe̱ to̱ babo̱ ná ba die̱le̱ wa o dibumbe!” Ná ba dilise̱ beto̱pedi babu, be ná ba bolane̱ mawuse̱ ma badiedi bo̱ngo̱. Satan a mabola nika. A si me̱nde̱ wo̱lo̱ to̱ buńa o keka o bo̱bise̱ lakisane̱  lo̱ngo̱ o be̱ne̱ne̱no̱ badiedi bena Yehova a po̱sino̱.

Ne̱ni weno̱ ná o tata wame̱ne̱ e? No̱ngo̱ bedomsedi o tingame̱ na bebokedi ba Yehova , o be̱ pe̱ jemea o sue̱le̱ badiedi a te̱se̱no̱—to̱ na mawuse̱ mabu.(1 Tes. 5:12, 13) O si ‘wamse̱ pungwabe̱ mulopo’ na bato̱bi jowe̱ la mbale̱ bena ba me̱nde̱ te̱nge̱ne̱ wa, to̱so̱ i ńai a bapungwe̱ mo̱nge̱le̱ bape̱pe̱—to̱ ná mibakan mabu mi me̱nde̱no̱ je̱ne̱ne̱ ka mbale̱. (2 Tes. 2:2; Tito 1:10) Bupe̱ malea ma bolabe̱ eso̱mb’a moto Timoteo. Tingame̱ o mbale̱ wokono̱, o si dimbea pe̱ to̱ we̱ni wokono̱ mo̱. (2 Tim. 3:14, 15) Na mbale̱, byembilan be jita o lee̱ ná we ná o lakisane̱ ba bena Yehova eno̱ o bolane̱ be̱be̱ na ebwe’a mbu we̱nge̱ o die̱le̱ biso̱ o nge’a mbale̱.​—Mat. 24:45-47; Bon. 13:7, 17.

O SI BWA MYANO MA MISISAN BO̱NGO̱

O̱nge̱le̱ ná camane̱ la mo̱nge̱le̱ la Satan di titi ponda ye̱se̱ o mbad’a misomba. Dongo la ponda, a mabolane̱ myano mi masisane̱—“mwano mō̱ ma camane̱ la mo̱nge̱le̱ ma kwaṅ kwaṅ.” (Easily Led—A History of Propaganda) Mulēdi mō̱ ńa inglisi Filip M. Taylor mo̱ ná: K’eyembilan, bato ba Asiria banedi nde basingedi babu na “misisan mi lati na camane̱ la mo̱nge̱le̱.” Satan a mabolane̱ bwa la bato bo̱ngo̱, bo̱ngo̱ ba mitakisan, bo̱ngo̱ ba kwedi, na to̱ njika pat’a bo̱ngo̱ bope̱pe̱ o keka janea wa, na bola ná wese̱le̱ bolea la Yehova.​—Yes. 8:12; Yer. 42:11; Bon. 2:15.

O s’ese̱le̱ Satan a bolane̱ bo̱ngo̱ mo̱me̱ne̱ o bo̱bise̱ mo̱nge̱le̱ mo̱ngo̱ to̱ tingame̱ lo̱ngo̱. Yesu mo̱ ná: “Lo si bwa ba bo̱ngo̱, bena ba mabwe̱ ńolo, nde ombusa nika ba si we̱le̱ pe̱ bola to̱ lambo.” (Lukas 12:4) Lakisane̱ dikaki la Yehova la jombwea wa, la bola wa “ngińa ni pakapakan,” na jongwane̱ pe̱ wa o lembe̱ to̱ njika mikekisan mi te̱m wa oboso.​—2 Kor. 4:7-9; 1 Pet. 3:14.

Mbaki ńe nde ná dongo la ponda o me̱nde̱ wo̱lo̱, o bwa pe̱ bo̱ngo̱. Nde ne̱nge̱ o mo̱nge̱le̱ ben byala Yehova a tano̱ a kwalisane̱ Yosua o jembe̱ mo̱: ‘Embame̱, o kake mulema. O si bwa bo̱ngo̱, o si soa pe̱ to̱; ebanja Yehova, Loba lo̱ngo̱, e na wa o me̱se̱ o mabolano̱.’ (Yos. 1:9) Mutaka mu po̱i te̱, kane̱ Yehova dibokime̱ne̱ na mulema mo̱ngo̱ mwe̱se̱. We ná o be̱ mbaki ná “musango ma Loba . . . mu me̱nde̱ kombe̱ milema mańu na mo̱nge̱le̱ mańu” kańena o me̱nde̱ be̱ne̱ ngińa o lembe̱ camane̱ la mo̱nge̱le̱ la Satan le̱se̱.​—Fil. 4:6, 7, 13.

Mo̱ o dia o mo̱nge̱le̱ camane̱ la mo̱nge̱le̱ la nulomabe̱ ńa Asiria, Rabsake, te̱nge̱ne̱ tumba la Loba e? A kwali nde ná ‘To̱ lambo di titi ná di tata bińo̱ oboso ba Asiria. To̱ Loba lańu Yehova a titi ná a bola to̱ lambo ońol’ańu.’ Na mo̱ a bata na bokenju ná: ‘Yehova mo̱me̱ne̱ nde anedi mba ná: Ondea o janane̱ y’ekombo, o ńamse̱ mo̱.’ Ne̱ni Yehova alabe̱no̱ e? “O si bwa bo̱ngo̱ ońola byala o sengino̱, bena bautu ba kiṅ’a Asiria ba to̱po̱nno̱ mba dibena.” (2 Ki. 18:22-25; 19:6) Na mo̱ a loma so̱ ange̱l ńena ni bo 185 000 la bato ba Asiria bulu bō̱!​—2 Ki. 19:35.

BE̱ DIBIE̱—SENGANE̱ YEHOVA PONDA YE̱SE̱

O májombwa sinima po̱ we̱ni weno̱ je̱ne̱ ná bwē ne̱ni beno̱ lemse̱ moto nde a si bie e? Na wa o pula puse̱le̱ ná: ‘O si dube̱! Be nde o wo̱ndo̱ wa!’ Dutea so̱ ná ange̱l ye o lee̱ wa mulemlem ma mwe̱ndi: “O s’ese̱le̱ ná Satan a lemse̱ wa na mpoṅ mao!”

Kuke̱ so̱ matoi mo̱ngo̱ te̱nge̱ne̱ camane̱ la mo̱nge̱le̱ la Satan (Min. 26:24, 25) Sengane̱ Yehova, o lakisane̱ mo̱ o me̱se̱ o mabolano̱ (Min. 3:5-7) Alabe̱ bebeledi bao ba ndolo: “A mun’am, be̱ dibie̱, o bwese̱ mulema mam muńe̱nge̱.” (Min. 27:11) Na nika, o mabuka bila ba mo̱nge̱le̱ mo̱ngo̱!