Ala o mambo mena me

Ala o ebambu a mongo

 LONGE̱ LA KRISTE̱N

Ne̱ni te̱ dikalo mwemba o mōnda ma jita la leme̱

Ne̱ni te̱ dikalo mwemba o mōnda ma jita la leme̱

Bato ba yo̱ki pomane̱ lambe̱ye̱ mwe̱ndi ma Janea toi ke̱ ba masenga mo̱ o eyem’abu ya bwambo. Yen ebe ońola nika nde o Buńa ba Mwatanu ba 33 P.A., Yehova a bolino̱ ná “Bonayuda bena ba ta badubedi ba wu o matumba me̱se̱ mena me owas’a mo̱ń” ba senge myango ma bwam na “bwambo mō̱ [ńabu] te̱ a yabanno̱,” to̱ná ba tano̱ ba to̱po̱ bwambo bwena bato be̱se̱ ba mato̱po̱no̱, ka Bonahebe̱r to̱ Grikia. (Bbol 2:5, 8) O bepolo we̱ni jita la leme̱ lo mato̱po̱be̱no̱ nin we̱nge̱, myemba myena mi matombise̱ ndongame̱n na leme̱ le diwengisan mi be̱n nde milemlem ma myonda ma dikalo. Ne̱ni bate̱ dikalo ba mi myemba beno̱ ná ba bola ebolo mwemba, o te̱ye̱ bato be̱se̱ ba maje̱ o mi myonda dikalo, esibe̱ timba o wuma iwo̱ na iwo̱ ngedi jita o takise̱ baje̱ oten e?

  • Kwalisane̱le̱ (Min 15:22): Bombwedi b’ebol’a dikalo bangame̱n kwalisane̱le̱ o bwam ba so̱ mbad’a te̱ dikalo ni do̱lisan myemba mye̱se̱. Yete̱na mōnda mabu ma dikalo mu biane̱, myemba myena mi mate̱ dikalo na leme̱ lope̱pe̱ mye ná mi baise̱ ná bate̱ dikalo ba mwemba mo̱ngo̱ ba kate milongi ma bato ba mato̱pe̱ eyem’abu ya bwambo. Nde yete̱na ba titi ná ba te̱ dikalo o mōnda mabu mwe̱se̱ ońolana milongi ba matapano̱ mi camane̱ oteten a mōnda munde̱ne̱, be ná ba to̱ndo̱ ná lo si kata bolongi to̱ bō̱, nde ná lo bīse̱ babo̱ ke̱ lo so̱i moto nu mato̱pe̱ eyem’abu ya bwambo nu lee̱le̱ ńo̱ngi. (od 93 § 37) To̱so̱ be ná ba baise̱ ná mwemba mo̱ngo̱ mongwane̱ babo̱ o wasa bato ba mato̱pe̱ eyem’a mwemba mabu, na bola pe̱ ná ba kuse adre̱s ya bato ba so̱be̱. (km 7/12 5, edinge̱le̱) O si dimbea ná dongo la ponda, leme̱ jita le ná lo to̱po̱be̱ o bolongi bō̱. Bete̱sedi be mano̱ngo̱be̱ o tapa mōnda mwe̱se̱ be be̱ nde bupisane̱ mambenda ma mombweye̱ bolane̱ la adre̱s a bato.

  • Bupe̱ bediedi (Efe 4:16): Bupe̱ bediedi be̱se̱ bena o makusane̱no̱ mombwed’a ebola dikalo ná batabata. Mo̱, we o tombise̱ jokwa la moto nu to̱ndi jokwe̱ na bwambo bwena bo titi bwambo ba mwemba mo̱ngo̱ e? Nu mokwe̱ Bibe̱l a me̱nde̱ pomane̱ ńaka yete̱na o boli ná moto ńe o mwemba to̱ o dibo̱to̱ di mato̱pe̱ eyem’ao ya bwambo alane̱ jokwa lao oboso.

  • Boṅsane̱ (Min 15:28; 16:1): O te̱nge̱ne̱ te̱ mot’ekwali o mōnda mo̱ngo̱ nu mato̱pe̱ eyeme̱ ye diwengisan na yo̱ngo̱, bola me̱se̱ ná o te̱ye̱ mo̱ dikalo. We ná o boṅsane̱ oboso ba ponda ońola leme̱ weno̱ ná o dongame̱ne̱ o mōnda, o songwa pe̱ oboso ba ponda betukwedi ba Bibe̱l, na sinima o telefon to̱ o tafe̱l ango̱. We pe̱ ná o bolane̱ JW Language app o jokwa ne̱ni soma bato na lo leme̱.