Ala o mambo mena me

Ala o ebambu a mongo

 LONGE̱ LA KRISTE̱N

Di sue̱le̱ bedangwedi bena Yehova a do̱lisanno̱

Di sue̱le̱ bedangwedi bena Yehova a do̱lisanno̱

Yehova Loba a boli bato ba benama bete̱sedi ońola bedangwedi. K’e-yembilan, a te̱se̱ ná diba le nde mulatako ma bwindea oteten a mome na muto. (Mt 19:4-6, 9) A mabanga pat’a bedangwedi ye̱se̱ i titi ko̱nji. (1Ko 6:9, 10) A boli pe̱ bete̱sedi ońola bebo̱tedi na mbad’a po̱ngo̱ la mulopo ná baboledi bao ba be̱ diwengisan.​—Ndim 22:5; 1Ti 2:9, 10.

O nin was’a we̱nge̱, bato jita ba mabanga bete̱sedi ba Yehova. (Ro 1:18-32) Ba mese̱le̱ ná mo̱nge̱le̱ ma bato ma yue bebo̱tedi babu, mbad’abu ńa po̱ngo̱ la mulopo, na bedangwedi babu. Jita ba mabonde̱ beboledi babu ba ńakaka, nde ba sa ba bena ba be̱n bedangwedi be diwengisan.​—1Pet 4:3, 4.

Biso̱ Mboṅ a Yehova, jangame̱n sue̱le̱ na iwiye̱ bete̱sedi bao ońola bedangwedi. (Ro 12:9) Ne̱ni e? Jangame̱n bīse̱ n’ede̱mo nje Yehova a do̱lisanno̱. Nde biso̱ mo̱me̱ne̱ pe̱ jangame̱n benga be̱ne̱ bedangwedi ba bwam o longe̱ lasu. K’eyembilan, di mapo̱so̱ te̱ patan a bebo̱tedi to̱ mbad’a po̱ngo̱ la mulopo, di baise̱ biso̱me̱ne̱ min myuedi ná: ‘Mpo̱so̱ko mam mu mabonde̱ nde bete̱sedi ba Yehova nga ba nin wase e? Mo̱ bebo̱tedi bam na po̱ngo̱ lam la mulopo ba malee̱ ná ne nde Kriste̱n ni mabwe̱ Loba bo̱ngo̱ e?’ To̱so̱ di mapo̱so̱ te̱ mambo ma matombe̱ o television nikame̱ne̱ pe̱ na sinima di mombwano̱, je ná di baise̱ na biso̱ mo̱me̱ne̱ ná: ‘Mo̱ Yehova e ná a do̱lisane̱ man mambo e? Bete̱sedi ba nja jombwea bedangwedi man mambo ma masue̱le̱no̱ e? Mo̱ mpo̱so̱ko mam ma longe̱le̱ la ńolo mwe ná mu bo̱bise̱ mo̱nge̱le̱ mam ma janane̱ nje ye bobe e? (Mye 101:3) Mu mpo̱so̱ko mwe ná mu be̱ eso̱njisan ońola belongi ba mbia to̱ bato bape̱pe̱ e?’​—1Ko 10:31-33.

Mo̱ ońola nje yeno̱ mweńa jita ná di sue̱le̱ bedangwedi bena Yehova a do̱lisanno̱ e? Son a ponda, Kristo Yesu a me̱nde̱ ńamse̱ matumba na bobe bwe̱se̱. (Hes 9:4-7) Buka te̱ ba bena ba mabole̱ jemea la Loba nde ba me̱nde̱ die̱ nate̱na o bwindea. (1Yoh 2:15-17) Ońola nika, di sue̱le̱ bedangwedi bena Yehova a do̱lisanno̱ ná be̱se̱ ba me̱ne̱ bedangwedi basu ba bwam ba sese Loba.​—1Pet 2:11, 12.

Nje mpo̱so̱ko mam ma bebo̱tedi na po̱ngo̱ lam la mulopo ba malee̱no̱ jombwea bete̱sedi bam ońola bedangwedi e?

OMBWA SINIMA TIMBA DIKO̱M LA YEHOVA​—MOME MŌ̱, MUTO MŌ̱, DENGE̱ O MALABE̱ MIN MYUEDI:

  • Ońola nje yeno̱ dibie̱ o dangwa o bete̱sedi ba Yehova e?

  • Ońola nje bayedi bangame̱nno̱ botea lee̱ bana babu bedangwedi bena Yehova a do̱lisanno̱ botea mimbu mabu misadi e?

  • Ne̱ni beso̱mbe̱ na batudu ba bato ba mongwane̱no̱ bato o tombwane̱ bwam ba Loba e?