E. Loba a mombwea baboledi bao bena ba maboe̱. Bibe̱l e makwala ońola muboled’a jemea mō̱ ná: “Yehova a me̱nde̱ jembe̱ mo̱ o no̱ngo̱ la diboa.” (Myenge 41:4) Yete̱na o be̱n diboa di matike̱ po̱ko̱po̱ko̱, man matanga malalo mabupe̱ me ná mongwane wa o lembe̱:

1.   Kane̱ Loba ná a bole wa ngudi o lembe̱. We ná o kusa “musango ma Loba mwena mu buki dibie̱ le̱se̱.” Mu musango mwe ná mu lo̱ko̱ mutaka mo̱ngo̱ na sue̱le̱ pe̱ wa.—Filipi 4:6, 7.

2.   Be̱ne̱ mo̱nge̱le̱ ma bwam. Bibe̱l mo̱ ná: “Mulema mu kenji mwe nde bwanga ba bwam, nde mudī mu pungwedi mu manjise̱ bewese.” (Minia 17:22) Ko̱lo̱ngo̱ne̱ muke̱ke̱ti na lo̱, ebanja ma mambo ma mongwane̱ o kenjise̱ ńolo, me pe̱ muse̱ṅ ońola ja la bwam.

3.   Ouse̱ dipita lo̱ngo̱ la kie̱le̱ ni maye̱. Dipita di bam le ná longwane̱ wa o be̱ muńe̱nge̱ to̱ na diboa di matike̱ po̱ko̱po̱ko̱. (Roma 12:12) Bibe̱l mo̱ ná ponda e me̱nde̱ po̱ ńena “to̱ moto a si me̱nde̱ pe̱ kwala ná: Na si jai bwam.” (Yesaya 33:24) Loba a me̱nde̱ bo̱le̱ maboa me̱se̱ ma matike̱ po̱ko̱po̱ko̱ mena o nin we̱nge̱ ma buki mado̱ki o bo̱lise̱. A me̱nde̱ pe̱ bo̱le̱ bodun. K’eyembilan, Bibe̱l e makwalea ońola mudun a moto ninka ná: “Eyobo ao e mabe̱ peńa ka o mińa mao ma mūtu.”—Hiob 33:25.

 Maki: To̱ ná beno̱ mbaki ná Loba a mongwane̱ babo̱, mboṅ a Yehova i mabolane̱ myanga ma do̱kita ke̱ i be̱n diboa di matike̱ po̱ko̱po̱ko̱. (Marko 2:17) Di si malangwea pe̱ to̱ bato njika pat’a myanga bangame̱nno̱ bolane̱; ebanja i memba ná moto te̱ nde angame̱n no̱nge̱ bao bedomsedi.