Tolibai kumaa id suang

Tolibai hilo’d table of contents

Sasi-Sasi'd Yohuwah

Pilio boros Dusun

 PINSINGILAAN 3

Otumbayaan i Rahab di Yohuwah

Otumbayaan i Rahab di Yohuwah

Soroho toko’d hilo toko id kakadaian do Yorikou. Kakadaian nopo’d ti nga hilo’d Kanaan, nga tulun nopo’d hilo nga amu otumbayaan di Yohuwah. Poingiyon o songulun tondu, pinungaranan dot i Rahab.

Dit omulok poi Rahab, nokorongou yau’d boros dot poingkuro i Musa dot minamarasak di Rahat dot Aragang di kososoliwan yolo’d mantad Masir. Nokorongou nogi yau’d poingkuro i Yohuwah minonguhup diyolo’d minangala’d sangod diyolo. Nga baino ti orongou dau’d poingkiim noh o’t tulun Israil hilo’d doros dot Yorikou!

Nintirungan di Rahab i ponoluku tu notumbayaan yau’d Yohuwah

Di insan tadau minsosodop, minongoi ponoluku duo tulun do Israil dot hilo’d Yorikou. Ruminikot yolo’d hilo’d walai di Rahab. Nokorongou nogi raja do Yorikou dot haro o monoluku do hilo’d walai’d Rahab. Pootodo noh di raja o susuhuon dau’d dot mamagakom dit ponoluku. Nga nokolisok noh di Rahab yolo id tiningusan di walai dau. Om barasai noh dau i susuhuon do raja. “Otopot nogi do haro tulun do nokorikot hiti’d walai ku, nga nakapamanau noh. Nga ondung ongoiyon dokoyu iyolo gusao nga okosupan po dokoyu.” Nokuro ma tu nintirungan di Rahab i ponoluku di?— Otumbayaan gia yau’d Yohuwah om koilo’d tahakon Dau’d tulun do Israil iti tana do Kanaan.

Tintod di minamanau i ponoluku, minamatos iyolo di Rahab dot apasi ngai o paganakan dau’d mulong piya’d raagon o Yorikou. Nunu pinonuhuan diyolo di Rahab?— “Pokogoso noh iti tali’d aragang om potoido no’d hilo’d liligaon nu. Ondung wonsoiyon nu ti, koinsanai’d suang do walai nu nga intirungan ngai.” Tumboyoo noh di Rahab. Nunu po kawagu o aantakan?—

Nintirungan di Yohuwah i Rahab om paganakan dau

Piro-piro tadau’d nabantalan pintutukai nod tulun do Israil ilo kakadaian do Yorikou. Onom o’t tadau om insan sangadau yolo’d tumutuk. Nga nopo’ddi koturu tadau, inturu iyolo’d minintutuk, om pimpangkis noh yolo’d opuhod. I kuasa’d Yohuwah noh o’t nakahaba dilo tolig do kakadaian do Yorikou.  Walai nopo’d dit haro poingkogos do tali’d aragang nga kakal po’d poingkakat! Okito nu lo gambar?— Nintirungan di Yohuwah i Rahab om paganakan dau!

Nunu nopinsingilaan toko mantad di Rahab?— Notumbayaan i Rahab di Yohuwah tu noimayaan yau dit koinsanai’d noilaan dau. Iya nga minsingilo nogi dit osonong mantad di Yohuwah. Otumbayaan ko’d miagal di Rahab?— Koilo yahai’d, iya nga otumbayaan nogi.

BASAO SUANG BIBLE NU

  • Yosua 2:1-24; 6:1-5, 14, 15, 20-25

  • Ibrani 11:31