Tolibai kumaa id suang

Tolibai hilo’d table of contents

Sasi-Sasi'd Yohuwah

Pilio boros Dusun

 PINSINGILAAN 11

Minonurat Yolo’d Pasal di Yesus

Minonurat Yolo’d Pasal di Yesus

Okito nu’i lo tongokusai id gambar diti?— Iyolo nopo nga i Matius, Markus, Lukas, Yohanis, Pitrus, Yakub, Yudas om i Paulus. Poimpasi yolo’d di tontok dit hino po’i Yesus do hiti’d pomogunan, om iyolo nogi o minonurat dot pasal di Yesus. Kaino pinsingilo to’d pasal diyolo.

Nunu toilaan nu’d pasal dot tongokusai ti?

Tolu nopo diyolo nga nokowoyo’d Yesus dot popinsusui’d habar dot osonong. Koilo ko’d isai iyolo?— Matius, Yohanis om i Pitrus. I rasul Matius om i rasul Yohanis nopo nga kotutun kopio’d Yesus, om minonurat iyolo  ngoduo pasal dit ralan do koposion di Yesus. I Yohanis nopo nga minonurat nogi’d di buuk dot komoyon dot Pinointalang om tolu o surat komoyon dot Iso Yohanis, Duo Yohanis om Tolu Yohanis. I rasul Pitrus minonurat dot duo buuk id Bible. Komoyon dot Iso Pitrus om Duo Pitrus. Iri nopo surat koduo’d rasul Pitrus nga sinurat dau o boros di Yohuwah di pasal di Yesus. Boros ka’d Yohuwah, “Iti no tanak ku. Oupus oku dau, om kaandasanku yau.”

Kusai suai id gambar diti nga minonurat om minonuduk nogi dati pasal di Yesus. Iso nopo diyolo nga i Markus. Mito-kito yau’d poingkuro’d nagakom i Yesus. Ilo nopo tiso nga i Lukas. Dokutur yau, nga suminuang yau’d Kristian dit alaid-laid no’d kinapataiyon di Yesus.

Duo nopo lo gambar diti nga tobpinai’d Yesus. Otutunan nu’i yolo?— Iyolo nopo nga i Yakub om i Yudas. Di timpuun’i amu yolo otumbayaan di Yesus. Kosorou nogi yolo’d mulau-ulau yau. Nga tohuri tadau, nosiliu’d di yolo’d tulun do Kristian.

Monunurat nopo’d Bible dit tohuri noh id gambar diti nga i Paulus. Ngaran nopo dau dit amu po nokosuang do Kristian nga i Saulus. Araatan om otogod yau’d tulun do Kristian. Koilo ko’d poingkuro tu suminuang yau’d Kristian?— Insan tadau, di manau-panau i Paulus id talun-alun kumaa’d hilo’d Damsik, sigog ka’d korongou dau boros di Yesus mantad surga. Nuhot dau i Paulus do ka, ‘Nokuro tu’ mongindaraat ko’d tulun dit monongkuyaan doho?’ Mantad diri, kosimban no’ddi o pomusarahan dau om suang noh yau’d Kristian. Minonurat di i Paulus dot 14 buuk id Bible, mantad dit buuk do Rum korikot dot Ibrani.

Mambasa toko’d Bible tikid tadau, otopot toi?— Mambasa toko nopo’d Bible, nga ogumu toilaan toko’d pasal di Yesus. Si’ilo ko toi’d nangku lobi’d ogumu’d pasal di Yesus?—

BASAO SUANG BIBLE NU

  • 2 Pitrus 1:16-18

  • Markus 3:21; 14:51

  • Yudas 1

  • Winonsoi 9:1-18