Tolibai kumaa id suang

Tolibai hilo’d table of contents

Sasi-Sasi'd Yohuwah

Pilio boros Dusun

 PINSINGILAAN 6

Amu Atalou I Daud

Amu Atalou I Daud

Nunu wonsoiyon nu’d soira ko’d modosi?— Mokiuhup ko doti di tapa om tina nu. Nga haro po suai dit obinguhup diya. Iyau nopo nga lobi agaras om osundu. Koilo ko’d isai?— Oo, i Yohuwah, i Kinorohingan. Kaino pibarasai kito songulun tanak wagu i Daud o ngaran dau ka’d Bible. Oilaan dau’d monguhup kasai i Yohuwah dau, om amu no’ddi yau orosian.

Di tanak po’i Daud, tinudukan yau’d molohing dau dot mupus di Yohuwah. Iti nopo nga kouhup di Daud do amu modosi do nunu nopo. Oilaan di Daud dot i Yohuwah nopo nga tambalut om monguhup dau. Insan tadau dit maso’d Daud dot madtamong dot dumba, tabpaai noh daa do mondou i dumba dau! Nokoilo ko nunu winonsoi’d Daud? Gusao no’d Daud i mondou om pataiyo noh dau’d longon toomod! Nokoumbal nogi daa’d haro bohuang dot minanabpo di dumba dau nga pinatai nogi’d Daud! Isai di minonguhup di Daud?— Oo, i Yohuwah nogi.

Insan tadau osiou kopio i Daud. Tontok nopo’ddi, misangod o tulun do Israil om tulun do Pilistin. Songulun o soudor longuyon do Pilistin. I Guliat o ngaran dau. I longuyon nopo ti nga monguntotori dot soudor do Israil om i Yohuwah, tu aiso gia katama dot sumangod dau. Soira nopo’d norongou’d Daud iti, boros ka dau, “Sumaap oku diya, tu uhupan okui’d Yohuwah, om ‘aala ku i iya!” Osiou toi Daud?— Oo, osiou moti. Mokiilo ko, nunu kawagu o’t aantakan?

Onuo nod Daud i lositik dau om limo watu’d tolunau om ongoi noh yau saap di Guliat. Soira nopo’d nokito’d Guliat i Daud do tomulok po om untotorio nogi dau, nga boros ka Daud, “Iya’ nopo om rumikot do sumaap doho’ do mikuwo’d gayang, om tandus. Nga’ iyoho’ nopo om rumikot do sumaap diya’ do mikuwo’d ngaran do Yohuwah it Agayo Kuasa.” Om suangai no’d Daud do watu i lositik om polositiko noh dau id turos di  Guliat. Om kahaba nopo i Guliat om kapatai! Norosian tomod o tulun do Pilistin om pogiahau noh yolo mogidu. Poingkuro i Daud dit omulok po nakaala dit longuyon?— Nuhupan yau’d Yohuwah tu lobi’d agaras ko i longuyon.

Amu orosian i Daud tu oilaan dau’d monguhup i Yohuwah dau

Nunu nopinsingilaan nu’d ti susuiyan di Daud?— Yohuwah noh o’t agayo kuasa ko mantad isai nopo. Om tambalut nu nogi. Kopuriman ko nopo’d modosi suai tadau, nga sorohon noh, kaanu Yohuwah monguhup diya om osiou ko nondo.

BASAO SUANG BIBLE NU

  • Sinding 56:3, 4

  • 1 Somuil 17:20-54