Tolibai kumaa id suang

Tolibai hilo’d table of contents

Sasi-Sasi'd Yohuwah

Pilio boros Dusun

 PALAJARAN 17

Poingkuro o Ponyolia Posorili Monguhup Dati?

Poingkuro o Ponyolia Posorili Monguhup Dati?

Malawi

Tongoulun di mongoi popinsusui

Karaja’ popinsusui

Pitimungan do ponotua do sidang

Asaru momoros o Baibol pasal di Barnabas om i rasul Paulus. Iyolo nopo nga’ ponyolia mogogompuya di kumakap do sidang Kristian di timpuun i’. Opusou kopio iyolo do kosimbayanan di tongotobpinai Kristian diyolo. Minomoros i Paulus do siguli iyau ‘do mongoi pogompuya’ do tongotobpinai do mongilo nung poingkukuro iyolo. Agaan ginawo dau do mamanau mulong dot osodu kopio do mongoi popogirot kotumbayaan diyolo. (Winonsoi 15:36) Irad diri nogi o korohian do ponyolia mogogompuya dati’d baino.

Mogompuya iyolo do mongodsuur dati’. Koinsanai ponyolia posorili kumakap solinaid sominggu id 20 toi ko’ lobi’ sidang dot induo do sontoun. Ogumu kasanangan aanu toko’ mantad di toilalaan diyolo om sawo diyolo nung nakasawo no iyolo. Tumotos iyolo’d mintutun tobpinai dit omulok ko’ i molohing piya, om orohian tomod iyolo’d mongoruhang dati’ id karaja’d popinsusui toi ko’ id pinsingilaan do Baibol. Momonsoi iyolo’d karaja’d momogompi miampai’d ponotua do sidang, om manahak do carama di mongodsuur id pitimungan om pitimungan dot agayo do popokoris kotumbayaan dati’.Winonsoi 15:35.

Mogompuya iyolo do momusou koinsanai dati’. Opusou kopio ponyolia posorili kowoowoyoon do piombolutan do tongotobpinai id sidang miampai di Yohuwah. Rumuba iyolo do ponotua om palayan do sidang do mongintong kouruton di nowonsoi, om manahak nosihat di popoingkawas kosonongo do pomomonsoi tonggungan id sidang. Monguhup iyolo’d tongotobpinai id sidang do kaanu’d isomuli id karaja’ diyolo’d popinsusui. Suwai ko’ iri, orohian nogi iyolo do mintutun tongoulun di wagu id sidang om mokinongou di kouruton do piombolutan diyolo miampai di Yohuwah. Monikid diyolo nga’ sumimbayan do sumiliu’d “tambalut” kumaraja’ do monguhup dati’. (2 Korintus 8:23) Apatut toko’ do momit kotumbayaan om kosianan diyolo dit aralom kumaa di Yohuwah.Ibrani 13:7.

  • Nokuro tu’ kumakap o ponyolia posorili do tongosidang?

  • Poingkuro ko do kaanu’d kasanangan soira’ kumakap iyolo?