Tolibai kumaa id suang

Tolibai hilo’d table of contents

Sasi-Sasi'd Yohuwah

Pilio boros Dusun

 KOTOB 18

Minog toi o Pomboktian Ku di Yohuwah om Botisan?

Minog toi o Pomboktian Ku di Yohuwah om Botisan?

1. Nunu doti sorohon nu soira minsingilo ko kopio do buuk diti?

NOKOPINSINGILO ko no’d ogumu katapatan do Baibol soira mininsingilo ko do buuk diti, miagal ko batos do Kinorohingan pasal koposion poingompus, kowoyo-woyoon tulun di napatai, om kalansanan do kotungagan. (Gomponuduk 9:5; Lukas 23:43; Yohanis 5:28, 29; Pinointalang 21:3, 4) Nokotimpuun ko no doti do rumikot id pitimungan do Sasi-Sasi’d Yohuwah om  otumbayaan dot tumanud iyolo do sambaan dit otopot. (Yohanis 13:35) Om nokotimpuun ko no kanto do poposuni do piombolutan miampai’d Yohuwah, om nokopomili ko no kanto dot sumamba Dau. I pogi momusorou ko kanto, “Nunu apatut do wonsoiyon ku do baino moi’d sumamba do Kinorohingan?”

2. Nokuro tu minokibatis i kusai do Itiopia?

2 Ilo no it nosorou do songulun kusai do Itiopia di poimpasi id maso di Yesus. Piipiro maso soira’d kinotungagan di Yesus, pinahabaran di Pilipus i kusai diri. Pinointalang di Pilipus kumaa dau dot i Yesus no i Mosias. Nokoontok kopio do ginawo di kusai do Itiopia it nopinsingilaan dau, om boros ka dau: “Hoodi daa o waig! Nunu po o koontobon do mamatis doho?”​—Winonsoi 8:26-36.

3. (a) Nunu ponuhuan dit pinatahak di Yesus kumaa’d tumatanud dau? (b) Poingkuro’d botisan o sosongulun?

3 Atalang kopio ponudukan do Baibol dot nung sumamba ko’d Yohuwah, apatut ko do mokibatis. Boros ka di Yesus dot id tumatanud dau: “Ongoi kou no dot id pointikid-tikid do bansa’d tulun do pointongkop diti pomogunan, om silihon no iyolo do tumatanud ku. Botisan no iyolo.” (Matius 28:19) Minanahak nogi i Yesus do poomitanan maya do botisan dau sondiri. Koinsanai tinan dau pinotolop dot id waig, okon ko pinoiyasan do waig id tulu dau. (Matius 3:16) Baino, soira haro o tulun Kristian do mokibatis, apatut nogi do koinsanai tinan dau do potolopon dot id waig.

4. Nunu pokitanan do botisan nu kumaa’d tulun suai?

 4 Soira nobotisan ko no, iti popokito do tulun suai dot manu ko kopio do sumiliu’d tambalut di Yohuwah om sumamba Dau. (Sinding 40:8, 9) I pogi momusorou ko kanto, “Nunu apatut do wonsoiyon ku moi dot obotisan oku?”

TOILAAN OM KOTUMBAYAAN

5. (a) Nunu apatut do wonsoiyon nu pogulu i do botisan ko? (b) Nokuro tu oponting o pitimungan do Kristian?

5 Pogulu i mokibatis, apatut ko’d mongintutun po di Yohuwah om i Yesus. Nokotimpuun ko no do momonsoi diti maya pinsingilaan do Baibol. (Basao Yohanis 17:3.) Nga iti a po kabagal. Ka’d Baibol apatut ko’d haro toilaan “gisom do koilo kopio kou do koinsanai di korohian do Kinorohingan.” (Kolosi 1:9) Pitimungan do Sasi-Sasi’d Yohuwah kouhup diya do kaanu piromutan dit osomok miampai’d Yohuwah. Iri no sabap nokuro tu apatut ko’d rumikot kasai id pitimungan dilo.​—Ibrani 10:24, 25.

Pogulu i do botisan, mositi minsingilo ko’d Baibol

6. Piro rinalom dot apatut ko’d koilo kokomoi’d Baibol pogulu i do botisan ko?

6 Tantu no, a alansan i Yohuwah diya do mongilo koinsanai id suang do Baibol pogulu i do botisan ko. A i Yau alansan do koilo i tulun do Itiopia do koinsanai pogulu i do botisan yau. (Winonsoi 8:30, 31) Om tumilombus toko nondo do minsingilo kokomoi’d Kinorohingan do sogigisom. Nga moi dot obotisan, apatut ko’d mongilo om mamaramit tuwou ponudukan do Baibol.​—Ibrani 5:12.

7. Poingkuro’d nokouhup diya o pinsingilaan nu do Baibol?

 7 Ka’d Baibol: “Aiso i o tiso pod tulun do kohubayaan do Kinorohingan, ondung aiso o kotumbayaan do tulun diri.” (Ibrani 11:6) I pogi apatut do haro kotumbayaan nu pogulu i do botisan ko. Minomisunud o Baibol dati dot piipiro tulun id kakadaian do Korintus nokorongou nunu ponudukan di tumatanud di Yesus, om sobaagi’d kinootuson, piipiro diyolo “notumbayaan di Yesus, om minokibatis.” (Winonsoi 18:8) Miagal nogi, pinsingilaan nu do Baibol nokouhup diya do kaanu kotumbayaan id batos do Kinorohingan om kuasa do rundun di Yesus, i kaanu do manampasi dati mantad dusa om kapataiyon.​—Yosua 23:14; Winonsoi 4:12; 2 Timotius 3:16, 17.

POSUNUDO DO TULUN SUAI KOKOMOI’D KATAPATAN DO BAIBOL

8. Nunu it milo mongudsuur diya do poposunud do tulun suai kokomoi’d nunu it nopinsingilaan nu?

8 Soira minsingilo ko’d ogumu mantad do Baibol om mintong poingkuro iti monguhup diya id koposion nu, gumirot nondo o kotumbayaan nu. Manu ko nondo’d poposunud do tulun suai kokomoi’d nunu it nopinsingilaan nu. (Yoromia 20:9; 2 Korintus 4:13) Nga isai o sunudan nu?

Kotumbayaan apatut do mongudsuur diya’d poposunud do wokon do nunu it kinotumbayaan nu

9, 10. (a) Isai timpuunan nu do popoilang do nunu it nopinsingilaan nu? (b) Nunu mositi wonsoiyon nu nung manu ko’d popinhabar miampai’d sidang?

9 Manu ko doti do poposunud do sampaganakan nu, tambalut, sombol, toi tambalut karaja kokomoi’d nunu it nopinsingilaan nu. Osonong ilo,  nga wonsoiyon kasai iti id ginawo dit osonong om oupus. I pogi, kaanu ko nondo do tumimpuun do popinhabar miampai do sidang. Soira kosodia ko’d momonsoi dilo, milo ko’d moboros kumaa’d Sasi it monuduk diya do Baibol om posunudo dau dot orohian ko’d tumanud do karaja popinhabaran miampai’d sidang. Nung kasarahan di tulun diri dot kosodia ko no om nung koposion nu tumanud do Baibol, om rumuba kou nondo ngoduo do duo ponotua id sidang.

10 Nunu nondo o aantakan id pinirubaan dilo? Moboros nondo i ponotua diya do mongintong nung karati om otumbayaan ko do ponudukan do Baibol, nung mumboyo ko’d boros Baibol id koposion nu, om nung manu ko kopio do sumiliu’d Sasi-Sasi’d Yohuwah. Soroho no dot momoduli o ponotua do koinsanai surupu do sidang, iya nga kohompit nogi, i pogi’d kada korosiai do moboros kumaa diyolo. (Winonsoi 20:28; 1 Pitrus 5:2, 3) Katalib pinirubaan diti, poiloon ko nondo di ponotua nung milo ko’d tumimpuun do popinhabar miampai sidang.

11. Nokuro tu oponting do momonsoi ponimbanan pogulu id kaanu ko’d popinhabar miampai do sidang?

11 Pointalangon doti di ponotua diya dot apatut ko do momonsoi ogumu ponimbanan pogulu id tumimpuun ko’d popinhabar miampai’d sidang. Nokuro tu oponting do momonsoi ponimbanan dilo? Sabap soira moboros toko do wokon kokomoi’d Kinorohingan, mongobi toko’d Yohuwah  om koposion toko nga apatut do kapamantang Dau.​—1 Korintus 6:9, 10; Galatia 5:19-21.

RUMOLOGO OM GUMULI

12. Nokuro tu apatut do rumologo o koinsanai tulun?

12 Haro po hal dit apatut nu’d wonsoiyon pogulu id botisan ko. Ka’d Pitrus: “Rologo kou no di dusa dokoyu, om guli kou no dot id Kinorohingan, om tonuson i dau o koinsanai di dusa dokoyu.” (Winonsoi 3:19) Nunu rati’d rumologo? Rati nopo ti nga monosol tomod montok hal dit kasala do nowonsoi toko. Ponokosuntu, nung a osonong kowoyo-woyoon do koposion nu, apatut ko’d rumologo. Om mulong piya’d monotos ko id koposion do momonsoi nunu it otopot, apatut do rumologo ko kasai, tu koinsanai toko nga kidusa om apatut toko’d mokiampun di Yohuwah.​—Rum 3:23; 5:12.

13. Nunu rati do “gumuli”?

13 Kabagal toi nung monosol nopo montok do nunu it nowonsoi nu? Amu. Boros kaddi Pitrus dot apatut ko nogi do “gumuli.” Rati nopo ti nga apatut ko’d mangada do kowoyo-woyoon nu dit araat om tumimpuun do momonsoi dit otopot. Hondomo pogi dot moi ko hilo’d iso kinoiyonon dit insan ko nogi koongoi. Om, kopurimanan ko dot nakasala o ngoyon nu. Nunu o wonsoiyon nu? Tantu no dot lumoyo o pamanahan nu, mundorong, gumuli, om tumanud ralan dit otopot. Miagal nogi, soira minsingilo ko’d Baibol, kopuriman  ko kanto dot haro piipiro kowoyo-woyoon id koposion nu do apatut nu’d simbanan. Kasaga no do “gumuli”​—komoyon diti, momonsoi ponimbanan dit apatut—om tumimpuun do momonsoi dit otopot.

MOMONSOI POMBAKTIAN

Nakapamatos ko nangku di Yohuwah dot sumamba ko Dau?

14. Poingkuro ko’d mambakti kumaa’d Kinorohingan?

14 Ralan nopo’d suai dit oponting it apatut do wonsoiyon nu pogulu i botisan nga mambakti kumaa di Yohuwah. Soira mambakti ko di Yohuwah, sumambayang ko do mamatos do sumamba Dau nopo om momonsoi’d korohian Dau it oponting kopio id koposion nu.​—Ponugutan 6:15.

15, 16. Nunu mongudsuur do sosongulun do mambakti kumaa’d Kinorohingan?

15 Mamatos do sumamba’d Yohuwah nopo nga miagal do mamatos ko’d momoguno sontob do koposion nu miampai sosongulun dit koupusan nu. Hondomo pogi’d miupus o songulun kusai om tondu. Soira mongintutun kopio i kusai di tondu, oupus nondo yau dau om sipanansawo dau. Mulong piya’d awagat kopio o kootuson diti, nga asaga i kusai do mananggung diti tu oupus iyau dau.

16 Soira minsingilo ko’d kokomoi’d Yohuwah, oupus ko nondo Dau om monotos do sumamba Dau. Iti kaanu mongudsuur diya do sumambayang om mamatos dot sumamba Dau. Ka’d Baibol dot isai-isai nopo o tumanud di Yesus apatut do “lihuan i dau’d korohian.” (Markus 8:34) Nunu rati  ti? Komoyon nopodti nga apatut ko do popogulu kotumbayaan kumaa’d Yohuwah id koposion nu. Nunu korohian di Yohuwah lobi oponting ko mantad do korohian om hontolon nu sondiri.​—Basao 1 Pitrus 4:2.

KADA KOROSIAI DOT A KALANTOI

17. Nokuro tu piipiro tulun a mambakti kumaa’d Yohuwah?

17 A mambakti o piipiro tulun kumaa’d Yohuwah, sabap nga orosian iyolo dot a katanud do batos diyolo do sumamba Dau. A iyolo manu’d papakaus di Yohuwah, toi haro doti pomusarahan diyolo dot nung a iyolo mambakti kumaa di Yohuwah, om a kaanu i Yohuwah do mangantob diyolo‘d mananggung montok nunu it wonsoiyon diyolo.

18. Nunu it kouhup diya do monoguang nunu nopo korosian do kapakaus di Yohuwah?

18 Tupus nu montok di Yohuwah kouhup diya do monoguang nunu nopo korosian do kapakaus Dau. Sabap do oupus ko Dau, monotos ko’d tumanud di pinabatos nu Dau. (Gomponuduk 5:4; Kolosi 1:10) A ko momusorou dot osusa kopio do momonsoi’d ponuhuan di Yohuwah. Minonurat i Yohanis: “Tu komoyon nopod osianan toko do Kinorohingan om mumboyo toko do koinsanai di ponuhuan dau. Om koinsanai di ponuhuan dau nga a i awagat dot id dati.”​—1 Yohanis 5:3.

19. Nokuro tu a apatut do orosian ko do mambakti kumaa’d Yohuwah?

19 A tagal do aiso o bohiton nu moi do mambakti  kumaa di Yohuwah. A Yau insan do lumansan dati do momonsoi lobi ko it aanu toko’d momonsoi. (Sinding 103:14) Monguhup Yau diya do momonsoi nunu it otopot. (Yosaya 41:10) Kotumbayaai no di Yohuwah miampai aayi-ayi o ginawo nu, om “tudukan ko indo dau do kowoyo-woyoo do tumanud di korohian dau.”​—Boros dot Aralom 3:5, 6.

POKITANAN SOKODUNG MONTOK KATAMPASIAN

20. Soira’d nakabakti ko no di Yohuwah, nunu o ralan do sumusuhut?

20 Nokosodia ko no toi do mambakti kumaa di Yohuwah? Soira’d nakabakti ko no di Yohuwah, kosodia ko no montok ralan do sumusuhut. Apatut ko do mokibatis.

21, 22. Poingkuro ko’d popokito do ‘mangakun ko dot kotumbayaan’ nu?

21 Poiloo no i koordinator do kotinanan do ponotua dot nakabakti ko no di Yohuwah om mokibatis ko. Om haro nondo piipiro ponotua do mongulit piipiro ponudukan Baibol miampai diya. Nung kaakun iyolo do nokosodia ko no, momisunud nondo iyolo diya dot milo ko do botisan id pitimungan tagayo toi konvensyen do sumusuhut do Sasi-Sasi’d Yohuwah. Id pitimungan tagayo, haro nondo o boro-boroson dit popointalang do rati do botisan. Monguhot nondo i popolombus do boboroson do duo poguhatan toniba. Maya’d monimbar do poguhatan dilo, popokito ko  nondo do ‘mangakun ko dot kotumbayaan’ nu.​—Rum 10:10.

22 Om botisan ko nondo. Potolopon nondo o koinsanai tinan nu id waig. Pombotisan diti popokito kumaa’d koinsanai dot nakabakti ko no di Yohuwah om baino iso mantad Sasi-Sasi’d Yohuwah.

 NUNU KOOBIAN DO BOTISAN NU

23. Nunu rati botisan id “ngaran do Tapa, om Tanak om rusod do Kinorohingan”?

23 Minoboros i Yesus di tumatanud dau dot botisan iyolo id “ngaran do Tapa, om Tanak om rusod  do Kinorohingan.” (Basao Matius 28:19.) Nunu rati ti? Rati nopo ti nga koilo ko do kuasa di Yohuwah om tonggungan di Yesus id hontolon do Kinorohingan, om nogi momoguna i Kinorohingan do rusod tolidang Dau do popootus do hontolon Dau.​—Sinding 83:19; Matius 28:18; Galatia 5:22, 23; 2 Pitrus 1:21.

Soira’d nobotisan ko, popokito ko dot manu ko’d momonsoi do korohian di Yohuwah

24, 25. (a) Nunu koobian do botisan? (b) Nunu pogibara-barasan toko id kotob do tohuri no?

24 Oponting kopio koobian do botisan. Soira potolopon ko id waig, komoyon, minatai toi mangada ko do kowoyo-woyoon do koposion nu dit a osonong. Soira’d kosoibau ko mantad id waig, kotimpuun nondo o koposion nu dit kawawagu do momonsoi korohian do Kinorohingan. Iti popokito dot sumamba ko nondo di Yohuwah mantad baino. Soroho no dot a ko mambakti do sinompuruan do tulun toi karaja. Nakabakti nu no o koposion nu kumaa di Yohuwah.

25 Pombaktian nu kouhup diya do poposuni piombolutan tosomok miampai di Yohuwah. (Sinding 25:14) Iti okon ko rati dot atampasi nondo o sosongulun sabap nobotisan no iyau. Ka’d Yesus: “Nga iri nopondo tulun dit ogirot do gisom do kopupuson om posion indo.” (Matius 24:13) Botisan nopo nga pongimpuunan nopo. Nga poingkuro ko’d koinsomok kasai di Yohuwah? Osimbar o poguhatan diti id kotob do tohuri no do buuk diti.