Tolibai kumaa id suang

Tolibai hilo’d table of contents

Sasi-Sasi'd Yohuwah

Pilio boros Dusun

 KOTOB 6

Hombo Ngoyon Toko Soira’d Apatai Toko?

Hombo Ngoyon Toko Soira’d Apatai Toko?

1-3. Nunu poguhatan do tulun pasal kapataiyon, om poingkuro o tugama’d monimbar do poguhatan diyolo?

MINAMATOS o Baibol dati dot insan tadau “aiso nondo o kapataiyon.” (Pinointalang 21:4) Id Kotob 5, nokopinsingilo toko dot maya’d tobusan, karamit toko nondo’d koposion poingompus. Nga kakal po’d apatai tulun. (Gomponuduk 9:5) I pogi, muhot toko’d iso poguhatan dit oponting, Nunu o aantakan kumaa dati soira’d apatai toko?

2 Sisimbar montok poguhatan diti oponting soira apataiyan toko’d sosongulun dit koupusan toko. Kosorou toko doti: “Hombo nongoi dau? Poingintong toi yau dati? Kouhup toi yau dati? Koruba toko po nangku dau?”

3 Mogisuaian o sisimbar do tugama pasal poguhatan diti. Piipiro minonuduk dot nung osonong ko, koongoi ko hilo’d surga om nung araat ko, otutudan ko hilo’d naraka. Piipiro moboros dot soira’d apatai ko, kosiliu ko nondo’d rusod om apasi miampai sampaganakan nu dit nangapatai. Om i suai moboros dot soira’d apatai ko om ohukuman, osusu ko nondo, toi apasi kaagu sobaagi’d tulun do suai toi nintorusan.

4. Nunu guas do pomusarahan dit pinotuduk do tugama pasal kapataiyon?

4 Mogisuaian o ponudukan do tugama. Nga kogumuan diyolo monuduk dot iso guas do pomusarahan.  Minonuduk iyolo dot soira apatai o tulun, soboogian dau poimpasi po kasai. Otopot nangku?

HOMBO NGOYON TOKO SOIRA’D APATAI TOKO?

5, 6. Nunu o aantakan soira’d apatai toko?

5 Koilo i Yohuwah nunu o aantakan soira’d apatai toko, om minomisunud dati dot soira apatai o tulun, opupusan nondo koposion dau. Kapataiyon nopo nga misulak do koposion. I pogi soira’d apatai o tulun, topurimanan om pomusarahan dau amu no poimpasi id hombo nopo. * Soira’d apatai toko, a toko kokito, a toko korongou, om a toko dii milo’d momusorou.

6 Minonurat i Raja Suliman dot “i tulun do napatai aiso noo o toila-ilaan dau.” Tulun napatai a kopuriman dot osianan om araatan. (Basao Gomponuduk 9:5, 6.) Nokoboros o Sinding 146:4 dot soira’d apatai tulun, pomusarahan dau nga apatai.

NUNU PINOBOROS DI YESUS PASAL KAPATAIYON

Winonsoi di Yohuwah o tulun do masi sogigisom hiti’d tana

7. Nunu pinoboros di Yesus pasal kapataiyon?

7 Soira napatai i Lasarus, ka’d Yesus kumaa tumatanud dau: “Nokoodop no i Lasarus, i tambalut toko.” Nga, okon ko komoyon di Yesus dot koodop kopio i Lasarus. Boros ka kaagu dau: “Napatai no i Lasarus.” (Yohanis 11:11-14) I pogi, pinoiyo di Yesus o kapataiyon miagal do koodop. A yau minoboros dot hilo’d surga i Lasarus toi miampai’d sampaganakan dau di nangapatai om oinggorit hilo’d naraka toi osusu kaagu sobaagi’d tulun do suai toi nintorusan. Amu, nga  miagal ko koolong kopio i Lasarus do koodop. Id naantakan do suai, pinoiyo di Yesus o kapataiyon miagal do koodop. Soira tinungag di Yesus i tanak tondu do Yairus, ka dau: “A i napatai ilo tanak dilo, koodop no iyau.”​—Lukas 8:52.

8. Poingkuro toko’d koilo dot a winonsoi’d Kinorohingan o tulun do matai?

8 Winonsoi nangku’d Kinorohingan i Adam om i Hawa moi dot apatai iyolo? Amu! Winonsoi’d Yohuwah iyolo do momurimon koposion sogigisom miampai kolidasan dit aiso bohiton. Soira’d winonsoi  di Yohuwah o tulun, nonuan Dau iyolo’d kosioonuan do masi sogigisom. (Gomponuduk 3:11) A manu o molohing dot kokito’d tangaanak diyolo’d lumohing om matai, om Yohuwah nga kopuriman nogi miagal diri pasal dati. Nga, nung winonsoi toko’d Yohuwah do masi sogigisom, nokuro tu apatai toko?

NOKURO TU APATAI TOKO?

9. Nokuro tu a osusa’d tumanud o porinta dit pinatahak di Yohuwah di Adam di Hawa?

9 Hilo’d kabun do Idon, minomisunud i Yohuwah di Adam: “Koino-ino nu i do kanon o koinsanai’d tua do kayu do hiti’d kabun, nga iri po i tua di kayu di manahak do toilaan ondung nunu it osonong om nunu it araat ot a nu koino-ino do kanon. Kada nogi kopio pangakan do tua do kayu’ddi. Tu ondung mangakan ko, om tontok no do tadau’ddi do matai ko.” (Kinawansayan 2:9, 16, 17) Okon ko osusa do tumanud do ponuhuan diti, om kikuasa i Yohuwah do momisunud di Adam om i Hawa nunu it osonong om araat. Monumboyo di Yohuwah, popokito dot mamantang iyolo dot kuasa Dau. Om popokito nogi dot ounsikahan kopio iyolo do koinsanai dit pinatahak Dau diyolo.

10, 11. (a) Poingkuro’d minongimbayat i Rogon di Adam om i Hawa? (b) Nokuro tu aiso no koompunan montok nunu it winonsoi diyolo?

10 Katangaban kopio, minomili i Adam om i Hawa dot a minumboyo di Yohuwah. Ka’d Rogon kumaa di Hawa: “Noduhan kou no kopio do Kinorohingan do mangakan do tua do koinsanai diti kayu do hiti’d kabun?” Sisimbar di Hawa: “Koino-ino i bo iyahai do  mangakan do tua do koinsanai diti kayu do hiti’d kabun, nga iri po i tua di songguas o kayu do hilo’d tanga diti kabun ot a dahai koino-ino dot akanon. Kumama piya nga a i iyahai koino-ino; tu owonsoi nopo dahai o miagal diri om apatai no iyahai.”​—Kinawansayan 3:1-3.

11 Om ka’d Rogon: “A i otopot ino; a kou i bo apatai. Minomisunud pogi o Kinorohingan do miagal diri nga oilaan dau do kaakan kou nopo di tua’ddi om koiyo kou nondo do Kinorohingan om koilo kou nondo ondung nunu it osonong om nunu it araat.” (Kinawansayan 3:4-6) Manu i Rogon di Hawa do momusorou dot kaanu yau’d momili montok dau sondiri nunu it osonong om araat. Om minongudut yau kokomoi nunu o aantakan nung a iyau minumboyo. Minomoros i Rogon dot a i apatai i Hawa, i pogi minangakan yau di tua om nonuan nogi dau i sawo dau. Nokoilo no i Adam om i Hawa dot minomisunud i Yohuwah diyolo dot a mangakan do tua dii. Soira’d minangakan iyolo, minomili iyolo’d a minumboyo do ponuhuan di Yohuwah. Sabap minangakan, pinopokito yolo dot a minamantang di Tapa diyolo dit obingupus hilo’d surga. Aiso no koompunan montok nunu it winonsoi diyolo!

12. Nokuro tu pokoruol kopio ginawo soira a minumboyo i Adam om i Hawa di Yohuwah?

12 Koruol kopio ginawo soira a minamantang o molohing toko di timpuuni do Gompomonsoi diyolo! Poingkuro topurimanan nu soira monotos ko’d kumaraja do papagayo tanak kusai om tondu nu nga suminaap  iyolo diya om minomonsoi dit pogoduhan nu? A toi koruol iti’d ginawo nu?

Winonsoi i Adam mantad tana, om gumuli kawagu id tana

13. Nunu komoyon di Yohuwah soira minoboros Yau “sumiliu ko indo kawagu do tana”?

13 Soira a iyolo minumboyo, natagakan dii yolo’d kosiwatan do apasi’d poingompus. Nosunudan di Yohuwah i Adam: “Tana ko i do winonsoi, om sumiliu ko indo kawagu do tana.” (Basao Kinawansayan 3:19.) Komoyon nopo ti nga koguli kawagu i Adam do tana, miagal dit a po yau nowonsoi. (Kinawansayan 2:7) Soira minomidusa i Adam, napatai dii yau om a nodi hino.

14. Nokuro tu matai toko?

14 Nung minumboyo daa i Adam om i Hawa do Kinorohingan, poimpasi po daa iyolo’d baino. Nga soira’d a minumboyo, minomidusa om napatai dii yolo. Dusa nopo nga miagal ko toruol dit araat kopio it notungkusan toko mantad di Adam. Koinsanai dati nosusu sobaagi’d kidusa, om i pogi’d matai toko. (Rum 5:12) Nga iti okon ko hontolon do Kinorohingan montok tulun. A insan do manu o Kinorohingan dot apatai tulun, om noroitan do Baibol dot kapataiyon miagal do “sangod.”​—1 Korintus 15:26.

 KATAPATAN POPOIDU DATI

15. Poingkuro katapatan pasal kapataiyon popoidu dati?

15 Katapatan pasal kapataiyon popoidu dati mantad ogumu pomusarahan dit a otopot. Minonuduk o Baibol dati dot tulun dit napatai a kopuriman do orualan toi tumongob. A toko milo’d monongkiboros diyolo om yolo nga ingka nogi. A toko kouhup diyolo om yolo nga ingka nogi. A iyolo koporuol dati, om i pogi a toko modosi diyolo. Nga, ogumu tugama momisunud dati dot poimpasi po o tulun napatai id hombo nopo om kaanu toko’d monguhup diyolo nung mambayar toko’d tusin kumaa di boyoon do tugama. Nga soira noilaan toko katapatan pasal kapataiyon, a toko oudutan dot tudut dilo.

16. Nunu tudut dit pinotuduk do ogumu tugama kokomoi do kapataiyon?

16 Momoguno i Rogon do tugama dit a otopot do mongudut dati om mamalid dati’d momusorou dot poimpasi po i tulun do napatai. Sobaagi’d suntu, piipiro tugama monuduk dot soira’d apatai toko, haro po koposion id suang do tinan toko. Minonuduk nangku tugama nu miagal dilo toi minonuduk nangku iyolo nunu boros do Baibol pasal kapataiyon? Momoguno i Rogon do tudut do popoinsodu tulun mantad di Yohuwah.

17. Nokuro tu pomusarahan kokomoi do monutud tulun id naraka mongindaraat di Yohuwah?

17 Nunu nopo pinotuduk do ogumu tugama nga popotigog. Sobaagi’d suntu, haro piipiro monuduk dot tulun taraat maan tutudai sogigisom hilo’d naraka. Tudut diti iso pongindaraatan kumaa’d Yohuwah. A Yau insan papasaga’d tulun do oinggorit miagal  dilo! (Basao 1 Yohanis 4:8.) Nunu topurimanan nu kokomoi’d sosongulun dit mongukum tanak miampai monutud longon tanak dau id tapui? Tantu no’d momusorou ko dot araat kopio iyau om a ko orohian do mongintutun dau. Iti no korohian di Rogon kumaa dati do momurimon pasal di Yohuwah!

18. Nokuro tu a toko apatut do modosi tulun dit napatai?

18 Piipiro tugama momisunud dati dot soira’d apatai tulun, sumiliu nondo yolo’d rusod. Tugama diti monuduk dati dot mositi momusou om mondosi toko di rusod sabap milo iyolo’d sumiliu tambalut dit kikuasa toi sangod taraat. Ogumu tulun otumbayaan do tudut diti. Modosi iyolo di napatai, i pogi, sumamba iyolo di nangapatai okon ko i Yohuwah. Soroho no dot tulun dit napatai a kopuriman, i pogi, a tagal do modosi diyolo. Yohuwah nopo nga Gompomonsoi toko. Iyau no Kinorohingan dit otopot om it apatut dot sambaon toko.​—Pinointalang 4:11.

19. Poingkuro koilo’d katapatan kokomoi do kapataiyon kouhup dati?

19 Soira noilaan toko katapatan kokomoi do kapataiyon, koidu toko nondo mantad tudut do tugama. Om katapatan diti kouhup dati’d mamarati batos dit kikoimayaan dit nowonsoi di Yohuwah pasal koposion om maso’d abantalan toko.

20. Nunu opinsingilaan toko id kotob do sumusuhut?

20 Di pogulu po, iso susuhuon do Kinorohingan, i Ayub, minoguhot: “Ondung apatai o tulun om milo po tuu iyau do masi kawagu?” (Ayub 14:14) Apasi po nangku i tulun do napatai? Kagayat kopio’d ginawo o sisimbar dit pinatahak do Kinorohingan dati id suang do Baibol. Okito toko iti id kotob do sumusuhut.

^ per. 5 Piipiro tulun otumbayaan dot kakal po’d poimpasi o ginawo toi rusod soira apatai o sosongulun. Montok kopoilaan ogumu, intangai Sinuratan id Tohuri 17 om 18.