Tolibai kumaa id suang

Tolibai hilo’d table of contents

Sasi-Sasi'd Yohuwah

Pilio boros Dusun

 KOTOB 11

Nokuro tu Ogumu Kopio Koinggoritan?

Nokuro tu Ogumu Kopio Koinggoritan?

1, 2. Nunu o poguhatan do kogumuan tulun?

ISO TSUNAMI minamaraag do iso kampung. Songulun minonimbak id iso garaja, piipiro tulun nogonitan om napatai. Songulun tina napatai do toruol kanser, om minonongkiad limo o tanak.

2 Soira aantakan dot koligaganan miagal dilo, ogumu tulun moguhot, “Nokuro?” Ogumu tulun do moguhot nokuro tu noponu’d karaaton om koinggoritan o pomogunan? Nokoumbal ko’d momusorou pasal dilo?

3, 4. (a) Nunu poguhatan dit nouhot di Habakuk? (b) Poingkuro minonimbar i Yohuwah dau?

3 Id Baibol, minsingilo toko dot tulun dit aralom o kotumbayaan kumaa’d Kinorohingan nga moguhot nogi do poguhatan miagal dilo. Sobaagi’d suntu, minoguhot i ponubuat Habakuk di Yohuwah: “Nokuro tu pokitonon oku diya do karaaton do miagal kopio’dti? Poingkuro kopio ko iya’d kotoron do montong do kowoyo-woyoon dot araat do miagal kopio’dti? Posorili nopo doho i mamaraag om kororongit, om pointongkop nopo o mogiumang om mogisosongkiwal.”​—Habakuk 1:3.

4 Id Habakuk 2:2, 3, kabasa toko’d sisimbar di Yohuwah do poguhatan di Habakuk om batos Dau do moginsonong do hal diti. Haro tupus dit aralom  di Yohuwah kumaa’d tulun. Ka’d Baibol: “Mamadul [momoduli] i iyau dokoyu.” (1 Pitrus 5:7) Otopot dot araatan i Yohuwah do kokito do koinggoritan lobi ko mantad dati. (Yosaya 55:8, 9) Kaino pogibara-barasai toko pasal poguhatan diti. Nokuro tu ogumu kopio koinggoritan hiti’d pomogunan?

NOKURO TU OGUMU KOPIO KOINGGORITAN?

5. Nunu noboros do kogumuan sigu do tugama pasal koinggoritan? Nunu ponudukan do Baibol?

5 Boyoon om sigu do tugama kosoruan do moboros dot koinggoritan nopo’d tulun nga mantad do Kinorohingan. Piipiro moboros doti dot nunu nopo kaantakan do sosongulun, kohompit o koligaganan, natantu no’d Kinorohingan om a toko kaanu’d mamarati nokuro tu miagal diri. Haro nogi doti moboros dot tulun it kohompit o tangaanak, matai moi dot kaampai iyolo’d Kinorohingan hilo’d surga. Nga a i otopot ilo. A insan i Yohuwah do poposiliu do kaantakan dit araat. Ka’d Baibol: “Kinorohingan nopo it Osundu Kopio om a i kopio momonsoi dit araat; om a i kopio iyau insan do momonsoi dit a otulid dot id disai nopo.”​—Ayub 34:12.

6. Nokuro tu ogumu o tulun do papasala’d Kinorohingan montok koinsanai koinggoritan hiti’d pomogunan?

6 Ogumu tulun papasala do Kinorohingan montok koinsanai koinggoritan hiti’d pomogunan sabap momusorou iyolo dot Yau no o pomorinta do pomogunan. Nga miagal dit nopinsingilaan toko id Kotob 3, pomorinta totopot nopo’d pomogunan nga i Rogon.

7, 8. Nokuro tu ogumu koinggoritan hiti’d pomogunan?

7 Ka’d Baibol: “Id suang ngai do pomorintaan di  Yaraat o pointongkop diti pomogunan.” (1 Yohanis 5:19) Rogon nopo nga pomorinta’d pomogunan dit araat kopio. Yau no “i monipu dot id pointongkop do pomogunan.” (Pinointalang 12:9) Ogumu tulun do momit dau. Om iri no sabap nokuro tu noponu’d tudut, karaatan, om karaaton o pomogunan.

8 Haro po sabap do suai nokuro tu ogumu koinggoritan hiti’d pomogunan. Soira’d suminaap i Adam om i Hawa, pinotungkusan diyolo’d dusa o koinsanai sinakagon diyolo. Om sabap do dusa, tulun monginggorit do tulun suai. Kosoruan manu iyolo’d sumiliu lobi’d oponting ko mantad tulun suai. Mogiumang, moi sangod, om monginggorit iyolo’d tulun suai. (Gomponuduk 4:1; 8:9) Somoonu oinggorit o tulun sabap naantakan “tontok di maso dit a i daa dau soro-sorohon.” (Gomponuduk 9:12) Soira hilo iyolo’d koiyonon id timpu dit poinsala, aantakan iyolo’d koligaganan om kaantakan dit a osonong.

9. Nokuro tu otumbayaan toko dot haro sabap tosonong di Yohuwah montok popologos do kotilombus o koinggoritan?

9 A insan i Yohuwah dot papaharo’d koinggoritan. A milo’d papasala di Yohuwah kokomoi’d pisangadan, karaaton, om pongindaraatan. A Iyau papaharo’d koligaganan miagal ko gumuyu tana, tongus topuhod, om luyud. Nga momusorou ko doti: “Nung kikuasa kopio i Yohuwah id tawan om tana, nokuro tu a Dau tingkodon do kosiliu kaantakan taraat dilo?” Oilaan toko’d dot momoduli kopio o Kinorohingan dati, i pogi’d haro sabap tosonong do pologoson Dau do kotilombus o koinggoritan.​—1 Yohanis 4:8.

 NOKURO TU PINOLOGOS DI YOHUWAH O KOINGGORITAN?

10. Poingkuro i Rogon suminaap di Yohuwah?

10 Id kabun do Idon, minamalid i Rogon di Adam om i Hawa. Minonondos i Rogon di Yohuwah sobaagi’d Pomorinta dit araat. Monondos nogi yau dot popolisok i Kinorohingan dit osonong mantad di Adam om i Hawa. Manu i Rogon dot otumbayaan iyolo dot yau noo pomorinta dit osonong mantad ko i Yohuwah om a yolo manu’d Kinorohingan.​—Kinawansayan 3:2-5; intangai Sinuratan id Tohuri 27.

11. Nunu poguhatan dit apatut do simbaron toko?

11 A tuminumboyo i Adam om i Hawa di Yohuwah om suminaap dii Dau. Osorou diyolo dot kiharo kuasa diyolo do monontu nunu it tosonong om taraat montok diyolo. Poingkuro i Yohuwah popointalang dot kasala i sumasaap om koilo Yau do nunu tosonong montok dati?

12, 13. (a) Nokuro tu a tinilombusan di Yohuwah do momunso i sumasaap? (b) Nokuro tu pinologos di Yohuwah i Rogon dot momorinta hiti’d pomogunan om tulun do momorinta sondiri?

12 A tinilombusan di Yohuwah do momunso i Adam om i Hawa. Suai ko, pinologos Dau yolo dot kitanak. Om winonsoi di Yohuwah iti moi dot kaanu i tangaanak di Adam di Hawa do momili isai pomorinta’d kosioonuan diyolo. Hontolon nopo’d Kinorohingan nga momonu’d pomogunan diti miampai’d tulun dit aiso bohiton, om iti no ot osiliu mulong piya’d nunu nopo wonsoiyon di Rogon.​—Kinawansayan 1:28; Yosaya 55:10, 11.

13 Suminaap i Rogon di Yohuwah id toguang do riniangan o moloikat. (Ayub 38:7; Daniol 7:10) I pogi,  nonuan di Yohuwah i Rogon do timpu do popointalang dot otopot nangku o panandasan di Rogon. Nonuan nogi’d Yohuwah do timpu o tulun dot popoingkakat do pomorintaan diyolo sondiri id siriba do kuasa di Rogon. Iti popokito dot kodimpot nangku iyolo nung aiso o ponguhupan do Kinorohingan.

14. Nunu kointalangan do timpu?

14 Noumbalan do tulun dot momorinta sondiri montok rinibuan o toun, nga a nakalantoi iyolo. Nokointalang no i Rogon do goudut. Manu o tulun do ponguhupan do Kinorohingan. Otopot i ponubuat Yoromia soira minoboros dot: “Oi TUHAN, oilaan ku i dot aiso i o tongosongulun piya do kikuasa do manantu do kootuson do koposi-posion dau; om aiso o tiso’d tulun do koporinta do kowoyo-woyoo dau.”​—Yoromia 10:23.

NOKURO TU ALAID KOPIO PAGANDADAN DI YOHUWAH?

15, 16. (a) Nokuro tu pinologos di Yohuwah o koinggoritan do tumilombus do alaid kopio? (b) Nokuro tu a po di Yohuwah ninsanangan o kobolingkangan dit nowonsoi di Rogon?

15 Nokuro tu pinologos di Yohuwah o koinggoritan do tumilombus do alaid kopio? Nokuro tu a Dau tiningkod o karaaton? Iti manganu timpu do popokito dot a nakalantoi o pomorintaan do Rogon. Noumbalan no’d tulun o mogisuaian o pomorintaan, nga aiso i o nakalantoi. Mulong piya nokowonsoi iyolo’d koburuon id sains om teknoloji, nga nokoingumu nogi it a aadang, komosikinan, karaaton, om pisangadan. A toko milo’d momorinta sondiri miampai aiso o Kinorohingan.

 16 Nga, a po di Yohuwah ninsanangan o kobolingkangan dit nowonsoi di Rogon. Nung wonsoiyon Dau, iti miagal ko monokodung Yau di Rogon om a i Yau insan do momonsoi miagal dilo. Om nogi otumbayaan o tulun dot kalantoi i iyolo do momorinta sondiri. Iti nopo nga tudut, om a i Yohuwah monokodung do hal diti. A Yau insan do mongudut.​—Ibrani 6:18.

17, 18. Nunu o wonsoiyon di Yohuwah kokomoi’d koinsanai kinaraagan dit nowonsoi do Rogon?

17 Kaanu toi i Yohuwah do monginsonong koinsanai kinaraagan dit nowonsoi do Rogon om tulun? Oo. Bagi’d Yohuwah, nunu nopo nga owonsoi. Oilaan di Yohuwah soira’d osimbar o koinsanai pogumbalan di Rogon. Om wonsoiyon nondo Dau o pomogunan diti do paradais miagal dit timpuuni. Koinsanai “tulun di nangapatai” tungagon nondo kawagu. (Yohanis 5:28, 29) A nondo sumakit toi matai o tulun. Maan nondo’d Yesus insanangai o koinsanai kinaraagan dit nowonsoi’d Rogon. Gunaon nondo di Yohuwah i Yesus do “pamaraag di karaja do Rogon.” (1 Yohanis 3:8) Ounsikou tomod toko dot daamot do alanut o ginawo di Yohuwah miampai dati moi do kaanu toko’d mongintutun Dau om kaanu’d momili Dau sobaagi’d Pomorinta toko. (Basao 2 Pitrus 3:9, 10.) Mulong piya’d oinggorit toko, monguhup Yau dati do monoguang dilo.​—Yohanis 4:23; Basao 1 Korintus 10:13.

18 A i Yohuwah mononsog dati do momili Dau sobaagi’d pomorinta toko. Nonuan Dau titahak o tulun do kosimbayanan do momili. Kaino sorisido toko nunu rati titahak dit kigatang diti montok dati.

 POINGKURO KO’D MOMOGUNO DO TITAHAK KOSIMBAYANAN DO MOMILI?

19. Nunu koimayaan dit pinatahak di Yohuwah dati? Nokuro tu apatut toko’d ounsikahan montok titahak diti?

19 Titahak kosimbayanan do momili di Yohuwah kaanu’d popisuai dati mantad do nintorusan. Nintorusan nopo tumanud topurimanan diyolo sondiri, nga yati kaanu’d momili poingkuro ralan do koposion dit korohian toko om manantu do tumanud di Yohuwah toi ko amu. Nogi, yati a miagal do misin it momonsoi nopo dit pinatantu do wonsoiyon. Kikosimbayanan toko’d momili do nunu korohian toko, tambalut toko, om ralan koposion toko sondiri. Manu i Yohuwah dati dot oondos id koposion.

20, 21. Nunu pomilian tosonong it milo nu’d wonsoiyon do baino?

20 Manu i Yohuwah dati do mupus Dau. (Matius 22:37, 38) Yau nopo nga miagal ko songulun tapa dit oondos soira korongou yau di tanak dau do moboros “oupus oku diya” mantad ginawo dau sondiri om okon ko sinansagan. Minanahak i Yohuwah dati’d kosimbayanan do momili do sumamba Dau toi ko amu. Minomili do minangada i Rogon, i Adam, om i Hawa di Yohuwah. Poingkuro ko’d momoguno do titahak kosimbayanan do momili?

21 Gunoon no kosimbayanan nu do momili do sumamba di Yohuwah. Riniangan o tulun minomili dot papasanang do Kinorohingan om minangada di Rogon. (Boros dot Aralom 27:11) Nunu it milo nu’d wonsoiyon do baino moi dot koiyon ko id pomogunan do wagu do Kinorohingan soira punsoon Dau o koinsanai’d koinggoritan? Osimbar o poguhatan diti id kotob sumusuhut.