Tolibai kumaa id suang

Tolibai hilo’d table of contents

Sasi-Sasi'd Yohuwah

Pilio boros Dusun

 KOTOB 16

Momili do Sumamba do Kinorohingan

Momili do Sumamba do Kinorohingan

1, 2. Nunu poguhatan dit apatut do uhoton toko tinan sondiri, om nokuro tu oponting iti?

MAYA’D pinsingilaan nu do Baibol, nokopinsingilo ko dot ogumu tulun mangakun do sumamba do Kinorohingan, nga otopot nopo om monuduk toi momonsoi yolo dit karaatan do Kinorohingan. (2 Korintus 6:17) Ilo pogi nokuro tu monuhu i Yohuwah dati dot sumoliwan mantad tugama dit a otopot, “Babil dit Agayo.” (Pinointalang 18:2, 4) Nunu wonsoiyon nu? Koinsanai dati kaanu momonsoi’d pomilian, om mositi monguhot toko tinan sondiri, “Sumamba oku tuu do Kinorohingan tumanud ralan do korohian Dau, toi tumanud ralan dit korohian ku sondiri?”

2 Osonong nung nokosoliwan toi nokotingkod ko no mantad tugama dit a otopot. Nga haro doti koubasanan do tugama dit a otopot dot tonudon nu po kasai. Kaino pibabarasai toko piipiro koubasanan dilo om intangan nokuro tu oponting dot mongintong toko dilo miagal pongintangan di Yohuwah.

SUMAMBA’D TINGOLIG OM TAKI-AKI

3. (a) Nokuro tu apagon montok sosongulun do tumingkod momoguno do tingolig id sambaan diyolo? (b) Nunu pinoboros do Baibol kokomoi’d momoguno tingolig do sumamba do Kinorohingan?

3 Piipiro tulun momoguno’d tingolig om walai poningoligan id walai diyolo do sumamba do  Kinorohingan montok piipiro toun. Nung otopot ilo kumaa diya, kosuaiyan toi kasala doti do sumamba do Kinorohingan nung a momoguno dilo. Nga soroho no, monuduk i i Yohuwah dati poingkuro do sumamba Dau. Om atalang kopio o Baibol do minomisunud dati dot a manu i Yohuwah dati do momoguno’d tingolig id sambaan toko.​—Basao Kinosoliwanan 20:45; Sinding 115:4-8; Yosaya 42:8; 1 Yohanis 5:21

4. (a) Nokuro tu a toko apatut do sumamba dot taki-aki toko? (b) Nokuro tu minomisunud i Yohuwah do tulun Dau dot a mumbal do monongkiboros miampai tulun di nangapatai?

4 Piipiro tulun momoguno doti do ogumu maso om kinoris do mongumbal daa do papasanang do taki-aki diyolo dit nangapatai. Sambaon nogi doti diyolo iyolo. Nga nokopinsingilo toko no dot tulun dit nangapatai a no milo’d monguhup toi pokoruol dati. A no yolo poimpasi id hombo nopo. Otopot nopo nga koligogon do mumbal dot monongkiromut diyolo tu nunu nopo pason dit koimbulai mantad tobpinai dit napatai nga mantad di moloikat dit araat. I pogi nokuro tu sinuhu di Yohuwah o tulun dot a mumbal do monongkiboros do tulun di nangapatai toi tumanud piipiro kokomoi’d demonisme.​—Ponugutan 18:10-12; intangai Sinuratan id Tohuri 26 om 31.

5. Nunu o kouhup diya do tumingkod momoguno do tingolig do sumamba’d Kinorohingan om taki-aki nu?

5 Nunu o kouhup diya do tumingkod do momoguno’d tingolig do sumamba’d Kinorohingan toi taki-aki nu? Mositi mambasa ko’d Baibol om momusorou  kopio poingkuro i Yohuwah do mongintong dilo. Karaatan toi sosomu ilo id pongintangan Dau. (Ponugutan 27:15) Sambayang no’d monikid tadau do mokiuhup do mongintong dilo miagal di Yohuwah om montok monguhup do sumamba Dau tumanud do korohian Dau. (Yosaya 55:9) Otumbayaan ko dot onuan ko di Yohuwah do kokorisan di pokioonuan nu do mongidu mantad koposion nu o nunu nopo i poinghompit dot sambaan dit a otopot.

APATUT NANGKU MAMARAMAI TOKO’D KRISMAS?

6. Nokuro tu nopili o tadau 25 Tulan Kohopod om Duo do mamaramai kinosusuon di Yesus?

6 Id pointongkop do pomogunan, Krismas nopo nga iso ko mantad do karamaian dit nointutunan, om ogumu tulun momusorou dot iti nopo nga karamaian montok do kinosusuon di Yesus. Otopot nopo nga Krismas haro piromutan miampai do sambaan dit a otopot. Pinointalang id iso ensiklopedia dot mamaramai i tulun kapir do Rum do kinosusuon do tadau id 25 Tulan Kohopod om Duo. Manu i boyoon do garaja do ogumu tulun kapir do sumiliu Kristian, mulong piya’d a i Yesus nosusu id 25 Tulan Kohopod om Duo, pinili diyolo o tadau dilo do mamaramai’d kinosusuon di Yesus. (Lukas 2:8-12) A mamaramai o tumatanud di Yesus do Krismas. Iso buuk sompilan popointalang dot 200 toun nakatalib do kinosusuon di Yesus, “aiso tiso piya’d koilo, om okuri o tulun do momoduli, soira kopio o kinosusuon dau.” (Sacred Origins of Profound Things) Nokotimpuun o  pamaramaian do Krismas id piipiro nahatus toun nakatalib soira di hiti po i Yesus id tana.

7. Nokuro tu a mamaramai’d Krismas o Kristian totopot?

7 Ogumu tulun koilo kokomoi’d tadon do Krismas om koubasanan dau, miagal ko karamaian om manahak titahak. Ponokosuntu, id England om soboogian do Amerika, haro maso pinogoduhan do mamaramai’d Krismas tu tadon dau nopo nga mantad kapir. Isai nopo mamaramai diti nga hinukuman. Nga tuminimpuun kaagu o tulun do mamaramai’d Krismas. Nokuro tu a mamaramai’d Krismas o Kristian totopot? Sabap manu iyolo papasanang di Yohuwah do nunu nopo wonsoiyon diyolo.

APATUT NANGKU MAMARAMAI TOKO’D TADAU KINOSUSUON?

8, 9. Nokuro tu a mamaramai’d tadau kinosusuon o tulun Kristian di timpuuni?

8 Iso po kaagu karamaian dit nointutunan montok kogumuan do tulun nopo nga tadau kinosusuon diyolo. Apatut nangku mamaramai’d tadau kinosusuon o tulun Kristian? Karamaian do tadau kinosusuon nopo’d narait id Baibol nga pinaharo do tulun dit a sumamba di Yohuwah. (Kinawansayan 40:20; Markus 6:21) Karamaian tadau kinosusuon nopo nga ginuno do mamarayou do ponokokinorohingan dit a otopot. I pogi nokuro tu moboros o tulun Kristian dit timpuuni do “karamaian nopo’d tadau kinosusuon nga koubasanan do tulun kapir.”​—The World Book Encyclopedia.

9 Tulun Rum om Yunani di gulu po otumbayaan  dot haro sunduan do pointanud do maso’d kosusuon do sosongulun om sunduan diti mongintirung do koposion dau. Tumanud do buuk The Lore of Birthdays, “Haro piromutan do sunduan diti miampai’d ponokokinorohingan id tadau kinosusuon do sosongulun.”

10. Nokuro tu a mamaramai o tulun Kristian dot tadau kinosusuon do baino?

10 Pinasaga nangku di Yohuwah o karamaian dit haro piromutan dot tugama dit a otopot? (Yosaya 65:11, 12) Amu. I pogi nokuro tu a toko mamaramai’d tadau kinosusuon toi nunu nopo tadau karamaian dit haro piromutan miampai’d tugama dit a otopot.

OPONTING KOPIO NANGKU ITI?

11. Nokuro tu mamaramai o piipiro tulun do tadau karamaian? Nunu it oponting kopio montok diya?

11 Piipiro tulun koilo do tadon do Krismas om tadau karamaian do suai, nga tilombuson kasai diyolo do mamaramai. Kopuriman iyolo dot tadau karamaian nopo nga iso kosiwatan tosonong do momoguno’d maso miampai sampaganakan diyolo. Iyodti nangku topurimanan nu? A i kasala do momoguno’d maso miampai’d sampaganakan nu. Winonsoi di Yohuwah o sampaganakan om manu Yau dati do haro piromutan tosonong miampai diyolo. (Iposus 3:14, 15) Nga apatut do poguluonon toko do haro piromutan tosonong miampai di Yohuwah mantad ko papasanang do tobpinai toko dot mamaramai’d tadau karamaian do tugama dit a otopot. I  pogi nokuro tu minoboros i Paulus dot: “Tumotos kou no do mongilo ondung nunu i kohubayaan do TUHAN.”​—Iposus 5:10.

12. Nunu o a kohubayaan di Yohuwah do tadau karamaian?

12 Ogumu tulun kopuriman dot hombo piya tadon do tadau karamaian dilo a i oponting, nga bagi’d Yohuwah nopo nga oponting. A Yau asanangan do tadau karamaian do mantad sambaan dit a otopot toi it popoinggayo do tulun toi lambang do pogun. Ponokosuntu, ogumu karamaian do tulun Masir montok ponokokinorohingan dit a otopot. Soira’d minogidu o tulun Israil mantad do Masir, tinanud diyolo o karamaian di don kapir diyolo om mamarait diti do “maan do pomusou do TUHAN.” Nga hinukuman dii yolo do Kinorohingan. (Kinosoliwanan 32:2-10) Ka di ponubuat Yosaya: “Kada kou ongoi igit di konunu-nunuan do sosomu!”​—Basao Yosaya 52:11.

MOMONSOI DIT OSONONG KUMAA’D TULUN SUAI

13. Nunu poguhatan nu soira momili ko’d tumingkod do mamaramai’d tadau karamaian?

13 Soira momili toko’d tumingkod do mamaramai’d tadau karamaian, ogumu doti o poguhatan nu. Sobaagi’d suntu: Nunu apatut do wonsoiyon ku soira’d moguhot o tambalut karaja ku do nokuro tu a oku mamaramai do Krismas miampai diyolo? Nunu apatut do wonsoiyon ku soira haro sosongulun do manahak doho do titahak do Krismas? Nunu apatut do wonsoiyon ku nung manu o koruhang ku do mamaramai oku do karamaian? Poingkuro oku’d monguhup do tangaanak ku dot a kopuriman do olunggui  sabap dot a mamaramai’d tadau karamaian toi tadau kinosusuon diyolo?

14, 15. Nunu it milo nu’d wonsoiyon nung moboros o sosongulun diya do kopisanangan tadau karamaian toi manahak diya do titahak?

14 Oponting do momoguno toilaan soira ko’d momili nunu boroson om wonsoiyon do monikid kaantakan. Sobaagi’d suntu, nung haro o tulun moboros diya do kopisanangan tadau karamaian, milo ko’d moboros, “Pounsikou.” Nga id kaantakan do siilo o sosongulun do ogumu, milo ko’d momili do popointalang do nokuro tu a ko mamaramai’d tadau karamaian. I pogi, mositi sumonong kasai, kitoilaan, om nogi kipamantangan. Ka’d Baibol: “Om mositi no do poposonong kasai do ginawo om koinsasamod o poboroson dokoyu. Om mositi no do koilo kou do ponimbar do pointikid-tikid di ponguhatan do tulun.” (Kolosi 4:6) Milo ko doti’d popointalang do oondos ko’d momoguno do maso miampai tulun suai om manahak titahak, nga momili ko do a momonsoi miagal dii it haro piromutan do tadau karamaian diti.

15 Nunu apatut do wonsoiyon nu nung manahak diya o sosongulun do titahak? A manahak o Baibol do nuludan do toturan, nga haro boros id Baibol dot apatut toko’d momogompi topurimanan do ginawo dit osonong. (1 Timotius 1:18, 19) A doti koilo i tulun dit minanahak diya do titahak dot a ko mamaramai do tadau karamaian. Toi moboros doti yau: “Koilo oku i dot a ko mamaramai do karamaian diti, nga manu kasai oku do manahak diya’d titahak diti.” Id hombo nopo kaantakan diti, milo ko’d momili do  mamaramit toi amu do titahak diti. Nga nunu nopo kootuson dit wonsoiyon nu, apatut do momogompi do topurimanan do ginawo dit osonong. A toko manu do momonsoi do nunu nopo it milo mamaraag do piromutan toko miampai di Yohuwah id ralan dit araat.

IYA OM SAMPAGANAKAN NU

Oondos ngai o koinsanai susumamba di Yohuwah

16. Nunu o apatut do wonsoiyon nu nung mamaramai o sampaganakan nu dot tadau karamaian?

16 Nunu o apatut do wonsoiyon nu nung mamaramai o sampaganakan nu dot tadau karamaian? A tagal do sumaap ko diyolo. Soroho no dot haro o kuasa diyolo do momili nunu o korohian do wonsoiyon diyolo. Sumonong om mamantang do pomilian diyolo miagal do orohian ko diyolo do mamantang diya. (Basao Matius 7:12.) Nga nung manu o sampaganakan nu do momoguno ko’d maso miampai diyolo id tadau karamaian, nunu o apatut do wonsoiyon nu? Pogulu id momili ko’d nunu o wonsoiyon, sambayang no’d kumaa di Yohuwah montok ponguhupan do momonsoi kootuson dit otopot. Soroho no om sorisido no kokomoi’d kaantakan dilo tu manu kasai ko do papasanang di Yohuwah.

17. Poingkuro ko’d kouhup do tangaanak nu do mongilag do topurimanan dot osongulunan soira’d mamaramai o suai tulun do tadau’d karamaian?

17 Poingkuro ko’d kouhup do tangaanak nu soira’d kokito yolo’d suai tulun mamaramai do tadau’d karamaian? Somoonu kaanu ko’d momonsoi nunu it osonong montok diyolo. Milo ko nogi’d monigowo diyolo’d miampai’d titahak. Om titahak nopo dit  osonong kopio do milo nu’d patahakon diyolo nga maso om tupus nu.

TUMANUD SAMBAAN DIT OTOPOT

18. Nokuro tu apatut do rumikot toko id pitimungan Kristian?

18 Moi’d papasanang di Yohuwah, apatut dot yadaan toko o tugama dit a otopot om nogi koubasanan om tadau karamaian dit poinghompit dilo. Nga apatut toko nogi do tumanud do sambaan dit otopot. Poingkuro? Iso nopo ralan nga rumikot kasai id pitimungan Kristian. (Basao Ibrani 10:24, 25.) Pitimungan nopo nga boogian do oponting kopio id sambaan dit otopot. (Sinding 22:23; 122:1) Kaanu toko’d mogiodsuur-suur soira’d mogititimung toko.​—Rum 1:12.

19. Nokuro tu oponting do momisunud do tulun suai kokomoi’d katapatan Baibol dit nopinsingilaan nu?

19 Ralan nopo suai do momili’d sambaan dit otopot nga mimboros kumaa’d tulun suai kokomoi dit nopinsingilaan nu mantad do Baibol. Ogumu tulun kopuriman dot oinggorit kokomoi’d karaaton dit nosiliu hiti’d pomogunan. Koilo ko doti piipiro tulun dit kopuriman miagal dilo. Sunudai no iyolo kokomoi’d kalansanan nu di tosonong montok maso’d abantalan. Soira’d rumikot ko id pitimungan Kristian om momisunud tulun suai kokomoi’d katapatan do Baibol, koilo ko nondo dot a ko no di kopuriman do orohian do pointanud do tugama dit a otopot om koubasanan diyolo. Otumbayaan ko dot oondos ko nondo om barakatan di Yohuwah o kopogoton nu soira’d minomili ko’d sumamba Dau id ralan dit otopot.​—Maliaki 3:10.