Tolibai kumaa id suang

Tolibai hilo’d table of contents

Sasi-Sasi'd Yohuwah

Pilio boros Dusun

 KOTOB 13

Mamantang do Titahak do Koposion

Mamantang do Titahak do Koposion

1. Isai manahak dati’d koposion?

YOHUWAH “no o Kinorohingan di poimpasi.” (Hosia 1:10) Iyau no i Gompomonsoi toko, om minanahak dati’d koposion. Ka’d Baibol: “Iya no o minomonsoi do koinsanai’d nunu nopo, om mantad i do korohian nu do nongosiliu ngai om songimpasi o koinsanai’d nunu nopo.” (Pinointalang 4:11) Oo, manu i Yohuwah do haro koposion toko. Koposion nopo nga iso titahak dit agayo kopio gatang mantad Dau.​—Basao Sinding 36:9.

2. Poingkuro toko’d kalantoi id koposion toko?

2 Manahak i Yohuwah dati dit pokioonuan toko do masi. (Winonsoi 17:28) Nga ogumu po ko ilo, manu Yau dati dot mogondos do koposion. (Winonsoi 14:15-17) Moi’d kalantoi id koposion apatut dot tumumboyo toko dot kooturan di Yohuwah.​—Yosaya 48:17, 18.

POINGKURO TOPURIMANAN DO KINOROHINGAN KOKOMOI DO KOPOSION

3. Nunu winonsoi di Yohuwah soira’d pinatai di Kain i Habil?

3 Minonuduk o Baibol dati dot koposion nopo nga kigatang montok di Yohuwah. Sobaagi’d suntu, soira otogod kopio i Kain​—tanak di Adam om i Hawa—​kumaa’d tadi dau i Habil, sinunudan di Yohuwah i Kain dot apatut do pususon dau o kototogod dau. Nga a i Kain mokinongou, om “umangai noddi di Kain i Habil do gisom do napatai i Habil.” (Kinawansayan 4:3-8) Hinukuman di Yohuwah i Kain tu minamatai di Habil. (Kinawansayan  4:9-11) I pogi, kototogod om karaatan nopo nga koligogon tu iti poposiliu dati sobaagi’d tulun dit araat. Tulun miagal diti a kaanu’d koposion dit poingompus. (Basao 1 Yohanis 3:15.) Montok poposonong di Yohuwah, mositi minsingilo toko’d mupus do koinsanai tulun.​—1 Yohanis 3:11, 12.

4. Nunu iso ko mantad toturan dit pinatahak kumaa’d tulun Israil dit monuduk dati kokomoi’d titahak do koposion?

4 Rinibuan o toun do mantad diri, pinopokito i Yohuwah dot koposion nopo nga kigatang kopio soira minanahak Yau do Hopod Toturan kumaa’d Musa. Iso mantad toturan diri nopo nga: “Kada kou pamatai.” (Ponugutan 5:17) Nung monomod do mamatai do tulun o sosongulun, apatut dot yau nga pataiyon nogi.

5. Poingkuro topurimanan do Kinorohingan pasal mongidu tanak id ponontianon?

5 Poingkuro topurimanan do Kinorohingan kokomoi mongidu’d tanak id ponontianon? Koposion do tanak dit a po nosusu nga kigatang kopio montok di Yohuwah. Id suang Toturan dit pinatahak di Yohuwah kumaa’d tulun Israil, minoboros i Yohuwah dot nung haro o tulun kopokoruol do molohing tondu om napatai o tanak di tondu sabap diti, yau nga pataiyon nogi. (Basao Kinosoliwanan 21:22, 23; Sinding 127:3.) Iti monuduk dati dot mongidu tanak id ponontianon iso o kasalaan.​—Intangai Sinuratan id Tohuri 28.

6, 7. Poingkuro toko’d popokito di Yohuwah dot koposion nopo nga kigatang kopio?

6 Poingkuro toko’d kaanu popokito di Yohuwah dot kigatang kopio o koposion toko om suai tulun? Amu momonsoi nunu nopo i manahak do koligaganan do koposion. I pogi, a toko monigup toi moginggat toi manganu dadah, sabap iti kopokoruol om kapamatai dati.

 7 Nonuan toko di Yohuwah do tinan om koposion, om apatut do gunaon toko iti miagal dit korohian Dau dati. I pogi, mositi’d tamangan toko o tinan toko. Nung amu, kosiliu toko nondo dot sosomu id mato Dau. (Rum 6:19; 12:1; 2 Korintus 7:1) A toko milo’d sumamba di Yohuwah, nung a toko mongintong do koposion nopo nga kigatang kopio. Mulong piya’d apagon do popotingkod do kowoyo-woyoon dit araat, nga monguhup i Yohuwah dati nung opogot toko no’d tumingkod.

8. Nunu o wonsoiyon toko moi dot a toko momoligogon do koposian toko om suai tulun?

8 Nokopinsingilo toko no dot koposion nopo nga titahak dit kigatang kopio. Otumbayaan i Yohuwah dati dot kaanu toko’d monotos dot a momonsoi dit koligogon do koposion toko om suai tulun. Owonsoi toko miagal diti soira papapanau do kurita, motosikol, toi sasakayon do suai. A toko tumanud pomoinan dit koligogon toi kisuang do korongitan. (Sinding 11:5) Tumotos toko nogi do momonsoi dot kointirung i walai kumaa dati om suai tulun. Minonuhu i Yohuwah do tulun Israil: “Soira nopo do momonsoi kou do walai’d wagu, om wansayan no kopio dokoyu do tolig o pointutuk di tisan di taap. Om a kou indo pasalaon do haro piya o tulun dot aratu do mantad hiri om gisom dot apatai.”​—Ponugutan 22:8.

9. Poingkuro toko’d apatut do momogompi do nintorusan?

9 Ralan piya do momogompi’d nintorusan nga oponting kumaa di Yohuwah. Pinasaga dau yati do mamatai do nintorusan montok takanon om pakayan, om nung monumpuronok do koposion toko. (Kinawansayan 3:21; 9:3; Kinosoliwanan 21:28) Nga a toko milo’d pokoruol toi ko mamatai do nintorusan montok do pomoinan.​—Boros dot Aralom 12:10.

 MAMANTANG DO KOLIDANGAN DO KOPOSION

10. Poingkuro toko’d koilo dot raha nopo nga mongongobi do koposion?

10 Raha nopo nga olidang kumaa’d Yohuwah tu raha nopo nga mongongobi do koposion. Soira pinatai di Kain i Habil, ka’d Yohuwah di Kain: “Millohou doho i raha di tadi nu do hilo’d tana.” (Kinawansayan 4:10) Raha di Habil nopo nga mongongobi do koposion dau, om hinukuman di Yohuwah i Kain tu minamatai di Habil. Soira nakatalib o Luyud tontok maso di Nuu, pinopokito kaagu i Yohuwah dot raha nopo nga mongongobi do koposion. Nonuan di Yohuwah i Nuu om sampaganakan dau do kasagaan do mangakan tonsi do nintorusan. Ka Dau: “Angaakan ngai i dokoyu iri, om i songinsuni dit ongotomou nga angaakan ngai i dokoyu; tu patahakon ngai ku no iri do maan dokoyu’d kanon.” Mulong piya dii, haro iso o ponuhuan di Yohuwah dot a diyolo akanon: “Nga iso poo ot a dokoyu koino-ino dot akanon; iri po i tonsi di kiraha. Pogoduhan ku pogi iti nga ginawo nopo om hiri id raha.”​—Kinawansayan 1:29; 9:3, 4.

11. Nunu ponuhuan dit pinatahak di Yohuwah do bansa Israil kokomoi do raha?

11 Aga-aga 800 toun nakatalib soira minomisunud i Yohuwah di Nuu dot a mangakan do raha, pinosunud Dau kaagu do tulun Dau: “Soira nopod haro o tulun dot Israil ko bansa’d suwai di poirolot diyolo do mongoi pongintorus do nintorusan ko tombolog di koino-ino’d kanon, om mositi nod paawason dau i raha do hiri’d tana om olitan nogindo do tana i raha’ddi.” Nokoboros o Baibol: “Om iri no o nokopogoduhan do TUHAN di tulun dot Israil do mangakan do tonsi dit a nakaawas o raha.” (Oturan 17:13, 14) Manu kasai i Yohuwah do tulun dot popokito’d raha nopo nga olidang. Kaanu yolo’d mangakan  do tonsi nga okon ko raha. Soira’d mamatai yolo’d nintorusan montok takanon, mositi do paawason diyolo i raha do hiri’d tana.

12. Poingkuro’d tulun Kristian mongintong do raha?

12 Piipiro toun nakatalib soira’d napatai i Yesus, minogiruruba i tumatanud om tongoponotua do sidang Kristian id Yorusalim do momili nunu boogian do Kooturan dit pinatahak kumaa’d tulun Israil do kakal po’d gunaon do tulun Kristian. (Basao Winonsoi 15:28, 29; 21:25.) Minonguhup i Yohuwah diyolo do mamarati dot kigatang kasai o raha montok Dau om apatut iyolo do mintong kasai diti do olidang. Tulun Kristian di timpuuni, a mangakan toi monginum do raha toi mangakan tonsi dit a nakaawas kopio o raha. Nung momonsoi iyolo’d miagal dii, iti miagal nogi do karaaton dot sumamba do tingolig toi magampahu. Mantad maso dilo om sumusuhut, minangada o Kristian dit otopot do mangakan toi monginum do raha. Poingkuro’d baino? Kakal po’d manu i Yohuwah dati do mongintong do raha nopo nga olidang.

13. Nokuro tu a mamaramit o tulun Kristian do kopoundalihan raha?

13 Komoyon nangku diti dot magada o Kristian do kopoundalihan raha? Oo, tantu no. Minonuhu i Yohuwah dati dot a mangakan toi monginum do raha. Nung momisunud o dokutur diya dot a moginum do tinumon dit kaawuk, manu ko toi posungkiton iri id tinan nu? Tantu no amu! Miagal nogi komoyon do ponuhuan do a mangakan toi monginum raha nopo nga a toko mamaramit do kopoundalihan raha.​—Intangai Sinuratan id Tohuri 29.

14, 15. Poingkuro’d oponting montok tulun Kristian do mamantang do koposion om tumumboyo di Yohuwah?

14 Poingkuro nung momisunud i dokutur dot apatai  toko, nung a toko mamaramit do kopoundalihan raha? Monikid tulun mositi momili dot mumboyo toi ko amu do toturan do Kinorohingan. Mamantang kopio o tulun Kristian do titahak Kinorohingan do koposion, om mogihum toko nondo’d pongubatan suai moi do kotilombus o koposion; nga a toko mamaramit do kopoundalihan raha.

15 Monotos toko do momogompi do kolidasan toko, nga sabap koposion nopo kigatang kopio kumaa’d Yohuwah, a toko mamaramit do kopoundalihan raha. I pogi, lobi’d oponting dot mumboyo’d Yohuwah mantad ko a mumboyo Dau do mumbal daa dot kotilombus o koposion toko. Ka’d Yesus: “Tu iri nopo tulun dit orohian do momogompi do koposion dau, om okon nogi dot atagakan do koposion dau. Nga iri nogindo tulun di papatahak do koposion dau do gisom piya’d apatai dot iyoho o kapatahakan, om kaanu nogindo kopio do koposion.” (Matius 16:25) Tumumboyo toko di Yohuwah sabap oupus toko Dau. Koilo Yau do nunu o tosonong montok dati om momit toko di Yohuwah do mongintong dot koposion nopo nga kigatang om olidang.​—Ibrani 11:6.

16. Nokuro tu obintumboyo o tumatanud do Kinorohingan kumaa Dau?

16 Mumboyo kasai do toturan pasal do raha i tumatanud do Kinorohingan dit obintumboyo. A iyolo mangakan toi monginum do raha, om a iyolo mamaramit do raha sabap do pongubatan. * Nga, mamaramit yolo pongubatan do suai moi dot manampasi do koposion diyolo. Otumbayaan iyolo dot koilo i Gompomonsoi do  koposion dot nunu it osonong kopio montok diyolo. Otumbayaan ko nangku dot koilo Yau do nunu it tosonong montok diya?

MOMOGUNO’D RAHA DIT PINASAGA DI YOHUWAH

17. Nunu o pomogunaan do raha dit pinasaga di Yohuwah do hilo’d Israil?

17 Id suang do Kooturan dit pinatahak do Kinorohingan di Musa, minomisunud i Yohuwah do tulun Israil: “Tu ginawo nopo do koinsanai di songimpasi om hiri nod raha. Om iri no o nokoponuhuan do TUHAN do popotuntug do koinsanai di raha do hiri’d pananaraban do porsombahan, om oidu indo o dusa’d tulun.” (Oturan 17:11) Soira’d kopomidusa o tulun Israil, kaanu yolo’d mokiampun di Yohuwah maya’d porsombahan do tayam om monuhu dit boyoon do tugama do popotuntug dit raha hilo’d pananaraban do porsombahan. Iti noo o kopomogunaan do raha dit pinasaga di Yohuwah kumaa’d tulun Israil.

18. Nunu o aanu toko mantad pinorundunan di Yesus?

18 Soira’d nokorikot i Yesus hiti’d pomogunan, nalanan di dau i kooturan do rundun porsombahan do tayam miampai’d pinatahak dau o koposion toi raha dau montok kopongompunan do dusa toko. (Matius 20:28; Ibrani 10:1) Agayo kopio gatang do koposion di Yesus dot soira’d pinotungag di Yohuwah i Yesus hilo’d surga, oonuan di Yohuwah do kosiwatan o koinsanai tulun do masi poingompus.​—Yohanis 3:16; Ibrani 9:11, 12; 1 Pitrus 1:18, 19.

Poingkuro ko’d popokito dot mamantang ko’d koposion om raha?

19. Nunu o apatut do wonsoiyon toko dot a pasalaon pasal kapataiyon do koinsanai tulun?

19 Mongunsikou toko di Yohuwah montok titahak Dau do koposion dit kikoimayaan! Om manu toko’d popoilo do tulun dot nung haro kotumbayaan diyolo di Yesus,  kaanu iyolo’d koposion poingompus. Oupus toko’d tulun, om momonsoi toko’d nunu nopo do monuduk diyolo do poingkuro’d kaanu’d koposion. (Yohoskiol 3:17-21) Om miagal di Paulus kaanu toko moboros: “Okon no ko doho’d kasalaan do haro piya ot id pogialatan dokoyu dot apatai. Tu a oku i nokoumbal do tuminongkiad diti karaja ku do monuduk dokoyu do koinsanai di natantu mantad do Kinorohingan do wonsoyon dau.” (Winonsoi 20:26, 27) Oo, popokito toko dot mamantang toko kopio do koposion om raha soira’d momisunud toko’d suai tulun kokomoi di Yohuwah om poingkuro’d kigatang kopio o koposion kumaa Dau.

^ per. 16 Montok kopoilaan kokomoi’d kopoundalihan raha, intangai koukaban 87-89 id buuk do “Terus Hidup di Bawah Naungan Kasih Tuhan,” pinalabus do Sasi-Sasi’d Yohuwah.