Tolibai kumaa id suang

Tolibai hilo’d table of contents

Sasi-Sasi'd Yohuwah

Pilio boros Dusun

 KOTOB 9

Osomok no Nangku Kopupuson do Pomogunan?

Osomok no Nangku Kopupuson do Pomogunan?

1. Hombo kopinsingilaan toko kokomoi do maso’d abantalan?

NOKOUMBAL ko nangku mambasa surat habar om momusorou, “Sumiliu nangku hal diti do lobi araat?” Haro ogumu o koligaganan om karaaton gisom piipiro tulun otumbayaan dot osomok toko no dot kopupuson do pomogunan. Otopot nangku? Haro toi ralan do mongilo’d nunu ot osiliu id maso’d abantalan? Haro. Mulong piya aiso o tulun kaanu do monondu nunu it aantakan, nga kaanu i i Yohuwah. Minomisunud Yau dati mantad Baibol kokomoi do maso’d abantalan toko om pomogunan.​—Yosaya 46:10; Yakub 4:14.

2, 3. Nunu pokiilaan do tumatanud di Yesus, om poingkuro i Yesus do monimbar diyolo?

2 Soira mambasa toko’d Baibol pasal do kolimpupuson do pomogunan, komoyon, okon ko kopupuson do Tana nga kopupuson do karaaton. Minonuduk i Yesus do tulun dot momorinta nondo o Pomorintaan do Kinorohingan hiti’d tana. (Lukas 4:43) Mokiilo i tumatanud dau soira’d rumikot o Pomorintaan do Kinorohingan om ka diyolo: “Soira dot ongosiliu ngai iti. Om nunu o pogintutunan do korikatan nu om kopupuson diti pomogunan?” (Matius 24:3) A i Yesus minomisunud diyolo do tadau’d korikatan diri, nga pinopoilo yau’d nunu o  aantakan pogulu id kopupuson diti pomogunan. Nunu it aantakan do pinoboros di Yesus maso no’d aantakan do baino.

3 Id kotob diti, pogibabarasan toko kointalangan dot poimpasi toko no id maso’d pogulu id kopupuson diti pomogunan. Koiso, apatut toko’d minsingilo kokomoi’d iso pisangadan dit naantakan hilo’d surga moi dot karati toko nokuro tu araat kopio hiti’d pomogunan.

PISANGADAN HILO’D SURGA

4, 5. (a) Nunu naantakan hilo’d surga soira’d nosoliu i Yesus do Raja? (b) Tumanud do Pinointalang 12:12, nunu o aantakan soira’d nakataam i Rogon hiti’d tana?

4 Id Kotob 8, nokopinsingilo toko dot nosiliu no i Yesus do Raja hilo’d surga di toun 1914. (Daniol 7:13, 14) Minomisunud dati o Buuk do Pinointalang nunu o naantakan: “Haro’ddi o pisangadan do hilo’d surga. Om monokisangod i Mikail [Yesus] om i piro-piro i moloikat dau do sumaap di naga’ddi [Rogon]. Om iri naga nga sumaap i di Mikail, om uhupan i naga di piro-piro o moloikat dau.” * Naala i Rogon om i tumatanud dau id pisangadan om pinataam hiti’d pomogunan. Hondomo pogi kataadan do topurimanan di tongomoloikat! Nga poingkuro dii tulun hiti’d pomogunan? Nokoboros o Baibol dot haro maso do kobolingkangan montok tulun. Nokuro? Sabap otogod kopio i Rogon,  “tu oilaan no dau dot a no alaid o maso dau.”​—Pinointalang 12:7, 9, 12.

5 Monotos kopio i Rogon do momonsoi’d kobolingkangan do hiti’d tana. Otogod kopio yau tu a no alaid o maso dau dot punsoon do Kinorohingan. Kaino sorisido toko nunu ka’d Yesus kokomoi’d kaantakan id maso’d tadau kolimpupuson.​—Intangai Sinuratan id Tohuri 24.

TADAU DO KOLIMPUPUSON

6, 7. Nunu milo’d poboroson pasal pisangadan om mononglous do baino?

6 Pisangadan. Ka’d Yesus: “Mogisasaap nondo o bansa’d tulun, om mogisasangod o pomogunan.” (Matius 24:7) Id maso toko’d baino, ogumu tulun napatai id pisangadan mantad ko maso do suai id susuiyan. Iso kopoilaan mantad Worldwatch Institute popokito dot mantad di toun 1914, lobi’d 100 riong o tulun napatai id pisangadan. Lobi’d intolu ginumu tulun do napatai id pisangadan id maso 100 toun id piolitan do 1900 om 2000 mantad ko i napatai di maso solinaid 1,900 toun. Hondomo pogi koinggoritan om korualan dit nopurimanan do riniangan o tulun sabap do pisangadan!

7 Mononglous. Ka’d Yesus: “Pointongkop nopondo o mononglous.” (Matius 24:7) Mulong piya’d ogumu takanon do pinalabus mantad ko i pogulu po, nga ogumu po tulun dot a abagalan do takanon. Nokuro? Sabap a kabagal o tusin  dot pomoli do takanon toi tana montok pomutanaman. Lobi’d sobilion o tulun dit okuri ko soringgit o koonu-onuan do sangadau montok balanja. Minomisunud o Sinompuruan Kolidasan Sompomogunan dot riniangan o tanganak do apatai monikid toun, sabap a abagalan do takanon montok potilombus do kolidasan.

8, 9. Nunu popokito dot nokootus no o nubuat di Yesus kokomoi’d gumuyu tana om toruol?

8 Gumuyu Tana. Minonubuat i Yesus: “Gumuyu nondo o tana dot opuhod kopio.” (Lukas 21:11) Monikid toun, ogumu o gumuyu tana dot opuhod kopio. Mantad di toun 1900, lobi’d duo riong tulun napatai sabap do gumuyu tana. Mulong piya’d kouhup o teknoloji do osikap do mongilo’d gumuyu tana, nga ogumu kasai o tulun dot apatai.

9 Toruol. Minoboros i Yesus dot haro nondo o “toruol  di mogkoroliu.” Toruol dit koligogon osikap do mogkoroliu om mamatai. (Lukas 21:11) Mulong piya nokopinsingilo o dokutur poingkuro’d momolingos ogumu ot toruol, nga haro po o toruol dit a milo lingoson. Iso o kopoilaan popointalang dot monikid toun, riniangan o tulun do apatai mantad do toruol, miagal ko tuberkulosis, malaria, om kolera. Okon ko ilo noo, nokoihum o dokutur dot 30 toruol dit kawawagu, om piipiro dilo aiso po tubat do pomolingos.

NUNU O KOWOYO-WOYOON DO TULUN ID TADAU DO KOLIMPUPUSON

10. Poingkuro nokootus o 2 Timotius 3:1-5 id maso’d baino?

10 Ka 2 Timotius 3:1-5: “Motingkopupuson nopodti pomogunan om ogumu nondo o kosusaan.” Pinointalang di Paulus dot poingkuro kowoyo-woyoon do tulun id tadau do kolimpupuson. Ka dau haro nondo tulun do

  •   tumanud do korohian sondiri

  • adalaan do rumohian do tusin

  • sumaap do molohing

  • a obintumboyo

  • aiso kosianan montok sampaganakan

  • a alanut o ginawo

  • orongit om obintogod

  • orohian do kasanangan ko mantad do Kinorohingan

  • minghali-hali do mupus do Kinorohingan nga a tumanud do boros Dau

11. Tumanud do boros Sinding 92:8, nunu aantakan do tulun dit taraat?

11 Ogumu nangku tulun do haro miagal diti id kinoiyonon nu? Ogumu tulun miagal diri id pointongkop do pomogunan. Nga a no alaid om salasayon nondo’d Kinorohingan iti. Ka Dau: “Sumuni i doti daa do miagal do sakot dit orombung i tulun dot araat, om kumaya i doti daa i tulun do  mingwonsoi dit angaraat, nga oinsanan indo iyolo dot apatai.”​—Sinding 92:8.

HABAR DO OSONONG ID TADAU KOLIMPUPUSON

12, 13. Nunu pinotuduk di Yohuwah dati id tadau kolimpupuson?

12 Minoboros o Baibol dot id tadau kolimpupuson, oponu nondo korualan om koinggoritan iti pomogunan. Nga minoboros nogi o Baibol dot haro kaantakan dit osonong.

“Om popinsunudon nondo dot id pointongkop do pomogunan i Habar dot Osonong do pasal do Pomorintaan do Kinorohingan.”​—Matius 24:14

13 Mamarati do Baibol. Minonurat i ponubuat Daniol pasal tadau kolimpupuson. Ka dau: “Kogumu nondo toilaan pasal katapatan.” (Daniol 12:4, NW) Onuan nondo do Kinorohingan o tulun dot toilaan do mamarati do Baibol dot lobi’d atalang mantad ko i gulu po. Nowonsoi di Yohuwah iti di toun 1914 po. Sobaagi’d suntu, minonuduk Yau dati dot kopontingan do ngaran Dau om hontolon Dau montok pomogunan, om nogi katapatan pasal tobusan, nunu aantakan soira’d apatai toko, om kotungagan. Nokopinsingilo toko dot Pomorintaan do Kinorohingan noo o kaanu manalasai’d koinsanai kobolingkangan toko. Nokopinsingilo toko nogi dot poingkuro toko’d oondos om poingkuro’d masi tumanud do korohian di Yohuwah. Nga nunu wonsoiyon do tumatanud do Kinorohingan miampai nunu it nopinsingilaan diyolo? Haro nubuat do suai dit manahak dati’d sisimbar.​—Intangai Sinuratan id Tohuri 21 om 25.

14. Hombo popinhabaran do habar dot osonong do Pomorintaan do Kinorohingan, om isai o popinhabar?

 14 Karaja popinhabaran sompomogunan. Moboros pasal tadau kolimpupuson, ka’d Yesus: “Popinsunudon nondo dot id pointongkop do pomogunan i Habar dot Osonong do pasal do Pomorintaan do Kinorohingan.” (Matius 24:3, 14) Habar dot osonong do Pomorintaan do Kinorohingan diti pinahabar id lobi’d 230 pogun om lobi’d 700 boros. Oo, Sasi-Sasi’d Yohuwah id pointongkop do pomogunan mantad “pointikid-tikid do bansa om payat” monguhup do tulun do mamarati’d nunu o Pomorintaan do Kinorohingan om nunu o wonsoiyon Dau montok tongoulun. (Pinointalang 7:9) Om wonsoiyon diyolo iti miampai aiso baraian. Mulong piya’d indaraaton iyolo’d tulun nga aiso i kaanu’d popotingkod do karaja popinhabaran, miagal di nokonubuat di Yesus.​—Lukas 21:17.

NUNU MAAN NU?

15. (a) Otumbayaan ko toi’d poimpasi toko no id tadau do kolimpupuson, om nokuro? (b) Nunu o aantakan do tulun dit mumboyo do Kinorohingan om it amu?

15 Otumbayaan ko toi’d poimpasi toko no id tadau do kolimpupuson? Ogumu no nubuat do Baibol do nokootus kokomoi’d tadau do kolimpupuson. A no alaid do tontuon di Yohuwah do moningkod o popinhabaran do habar dot osonong, om rumikot nondo “o kopupuson.” (Matius 24:14) Nunu o kopupuson? Iti nopo nga Harmagidon i maso’d poiduon di Yohuwah o koinsanai’d  karaaton. Gunaon di Yohuwah i Yesus om tongomoloikat Dau dit kikuasa do momunso isai nopo it a mumboyo Dau om Tanak Dau. (2 Tosolunika 1:6-9) Katalib iri, a nondo kapamalid do tulun i Rogon om tumatanud dau. Om kokito nondo do kootus o koinsanai batos do Kinorohingan i tulun dit mumboyo om mamaramit do Pomorintaan Dau.​—Pinointalang 20:1-3; 21:3-5.

16. Sabap osomok no o kopupuson, nunu apatut do wonsoiyon nu?

16 A no alaid om opupusan nondo o pomorintaan do Rogon hiti’d pomogunan. I pogi, oponting kopio dot monguhot toko’d tinan sondiri, “Nunu o apatut do wonsoiyon ku?” Manu i Yohuwah do minsingilo ko’d ogumu mantad Baibol. Sorohon no kopio o pinsingilaan nu. (Yohanis 17:3) Haro pitimungan dot Sasi-Sasi’d Yohuwah monikid minggu do monguhup tongoulun do mamarati’d Baibol. Mumbal no do rumikot kasai id pitimungan diti. (Basao Ibrani 10:24, 25.) Nung nokopinsingilo ko dot minog ko’d sumimban, kada korosiai do sumimban. Soira’d owonsoi nu iri, kogirot nondo o piombolutan nu miampai di Yohuwah.​—Yakub 4:8.

17. Nokuro tu kotigowo o kogumuan do tulun soira’d korikot o kolimpupuson?

17 Pinointalang di Paulus dot monigowo o korikatan do kopunsoon di tangaraat, “miagal di manakau di rumikot do dongotuong.” (1 Tosolunika 5:2) Nokoboros i Yesus dot ogumu o momili dot a monongkuyaan do kinointalangan dot poimpasi toko no id tadau do kolimpupuson. Ka dau:  “Rumikot nopondo i Tanak do Tulun, om kowoyo-woyoo nopo do korikatan dau om iyo do kowoyo-woyoo di poimpasi po i Nuu di gulu po. Tontok di piro-piro po o tadau do mantad do korikatan di sakob dot agayo, om mangakan-ngakan nopo om monginum-nginum om mogikakawin i tulun. Om iyo nopo kasai’ddi do gisom do norikot i tadau di suminuang i Nuu di kapal do rahat. Om korikatai poddi iyolo di sakob om kopurimanai nogi daa’ddi diyolo i nosiliu’ddi. Om iyo noddi o kowoyo-woyoo do rumikot o Tanak do Tulun do koimbagu.”​—Matius 24:37-39.

18. Nunu pononsunudan dit pinatahak di Yesus dati?

18 Minomisunud i Yesus dati dot amu adalaan do ‘moginakan, moginum om momusorou do koposi-posion.’ Minoboros yau dot monigowo o korikatan do kolimpupuson, “miagal do kasip.” Minoboros nogi yau dot iti no “kosulungon ngai’d tulun do hiti’d pomogunan.” Om nogi “mumbangan-bangan kou no, om sumambayang no kasai om okoris kou indo do sumaap do koinsanai dit ongosiliu do koimbagu om milo kou do rumuba di Tanak do Tulun.” (Lukas 21:34-36) Nokuro tu oponting kopio do mokinongou pononsunudan di Yesus? Sabap a no alaid dot punsoon nondo o pomogunan taraat do Rogon. Tulun dit korohian di Yohuwah om i Yesus noo o atampasi id kolimpupuson om miyon sogigisom id pomogunan do kawawagu.​—Yohanis 3:16; 2 Pitrus 3:13.

^ per. 4 Mikail nopo nga ngaran suai di Yesus Kristus. Montok kopoilaan togumu, intangai Sinuratan id Tohuri 23.