Tolibai kumaa id suang

Tolibai hilo’d table of contents

Sasi-Sasi'd Yohuwah

Pilio boros Dusun

Sinuratan id Tohuri

Sinuratan id Tohuri

1 YOHUWAH

Ngaran nopo’d Kinorohingan nga i Yohuwah om norotian o komoyon dot “Yau no i Poposiliu.” Yohuwah nopo nga Kinorohingan dit agayo kopio kuasa, om Yau no minomonsoi do nunu nopo tumanud do korohian Dau.

Id boros do Ibrani, sinurat o ngaran do Kinorohingan miampai apat hurup. Ngaran nopodti id boros do Inggeris nga YHWH toi JHVH. Aga-aga inturu noribu koimbulai o ngaran do Kinorohingan id boros sandad do Ibrani id Baibol. Tulun id pointongkop do pomogunan momoguno mogisuaian o woyo do mamarait ngaran di Yohuwah, tumanud do koubasanan do boros diyolo.

Kotob 1, por. 15

2 BAIBOL NOPO NGA “PINOTUDUK I DO KINOROHINGAN”

Sanganu nopo do Baibol nga Kinorohingan, nga sinuhu Dau o tulun do monurat do Baibol. Iti miagal songulun tapa minonuhu tanak dau do monurat iso surat dit kisuang do pomusarahan dau. Minomoguno i Kinorohingan do kuasa tolidang Dau do monguhup tongomonunurat do Baibol do monurat pomusarahan Dau. Mogisuaian o ralan do kuasa do Kinorohingan do monguhup diyolo, om somoonu popokito diyolo maya’d kointalangan toi nipi om suraton nondo diyolo.

Kotob 2, por. 5

3 PONONTUDUKAN (PRINSIP)

Iti nopo nga ponudukan id Baibol dit kouhup dati do momonsoi kootuson dit osonong. Sobaagi’d suntu,  ponontudukan do “monokiambalut dit angaraat o karaag do kowoyo-woyoon dit osonong” monuduk dati do kaanu toko do kasanangan toi karaaton maya isai o tambalut toko. (1 Korintus 15:33) Om ponontudukan do “nunu nopo i potonomon, om iri no o tomoton” monuduk dati dot a toko kaanu do sumoliwan mantad kootuson dit nowonsoi toko.​—Galatia 6:7.

Kotob 2, por. 12

4 NUBUAT

Iti nopo nga pason mantad do Kinorohingan. Iti kointalangan do hontolon do Kinorohingan, ponudukan do moral, ponuhuan, toi pomutusan. Milo nogi iti do komoyon do pason kokomoi’d nunu it osiliu do abantalan. Kogumuan nubuat do Baibol nokootus no.

Kotob 2, por. 13

5 NUBUAT KOKOMOI’D MOSIAS

Yesus no i pinopootus do kogumuan nubuat do Baibol kokomoi’d Mosias. Intangai kutak “ Nubuat kokomoi’d Mosias.”

Kotob 2, por. 17, sinuratan id siriba.

6 HONTOLON DO KINOROHINGAN MONTOK TANA

Winonsoi di Yohuwah o tana do sumiliu do iso paradais montok tongoulun dit oupus Dau. A nokosimban o hontolon Dau. A no alaid, tonuson nondo do Kinorohingan o karaaton om manahak do koposion poingompus kumaa tulun Dau.

Kotob 3, por. 1

 7 ROGON I GAMPAMALID

Rogon nopo nga moloikat dit minonimpuun do suminaap do Kinorohingan. Roitan yau do Rogon, komoyon “Sumasaap,” sabap suminaap yau di Yohuwah. Roitan nogi yau i Gampamalid, komoyon “Goudut.” Nonuan yau do ngaran diti sabap minongudut yau kokomoi’d Kinorohingan om minamalid do tulun.

Kotob 3, por. 4

8 MOLOIKAT

Alaid no’d nowonsoi di Yohuwah o moloikat pogulu id winonsoi Dau o pomogunan. Winonsoi iyolo do masi id surga. Haro lobi ko hatus noriong o moloikat. (Daniol 7:10) Haro ngaran diyolo om mogisuaian o kowoyo-woyoon, om mada iyolo do sambaon do tulun. Haro mogisuaian o pangkat om karaja diyolo. Piipiro karaja diti poinghompit do kumaraja id toguang di Yohuwah, papaatod pason Dau, mongintirung om monuduk tumatanud Dau id pomogunan, papapanau do pomohukuman, om sumokodung do karaja popinhabaran. (Sinding 34:7; Pinointalang 14:6; 22:8, 9) Id maso’d abantalan, tumanud nondo iyolo di Yesus id pisangadan do Harmagidon.​—Pinointalang 16:14, 16; 19:14, 15.

Kotob 3, por. 5; Kotob 10, por. 1

9 DUSA

Nunu nopo topurimanan, kasarahan, toi momonsoi nunu it a pointanud do hontolon di Yohuwah nga dusa. Sabap do dusa, naraag o piromutan toko do Kinorohingan. I pogi’d pinatahak dau dati o toturan om ponontudukan do monguhup dati do mongilag  dusa dit tomodon. Id timpuuni, winonsoi di Yohuwah o nunu nopo it aiso bohiton, nga soira minomili i Adam om i Hawa do suminaap di Yohuwah, minomidusa om kibohiton dii yolo. Luminohing om minatai yolo, om sabap notungkusan toko do dusa di Adam, yati nga lumohing om matai dii.

Kotob 3, por. 7; Kotob 5, por. 3

10 HARMAGIDON

Iti nopo nga pisangadan di Yohuwah do momunso pomogunan do Rogon om koinsanai karaaton.

Kotob 3, por. 13; Kotob 8, por. 18

11 POMORINTAAN DO KINOROHINGAN

Pomorintaan do Kinorohingan nopo nga iso pomorintaan do winonsoi di Yohuwah id surga. Momorinta i Yesus Kristus sobaagi’d Raja do pomorintaan diti. Id maso’d abantalan, momoguno nondo i Yohuwah do Pomorintaan diti do momunso koinsanai karaaton. Momorinta nondo o Pomorintaan do Kinorohingan id pointongkop do pomogunan.

Kotob 3, por. 14

12 YESUS KRISTUS

Winonsoi do Kinorohingan i Yesus pogulu id nunu nopo. Pinaatod di Yohuwah i Yesus do hiti’d pomogunan do matai montok koinsanai tulun. Soira’d pinatai i Yesus, tungago nodi di Yohuwah yau. Momorinta i Yesus do hilo’d surga do baino sobaagi’d Raja do Pomorintaan do Kinorohingan.

Kotob 4, por. 2

 13 NUBUAT DO 70 MINGGU

Minonubuat o Baibol do soira korikatan do Mosias. Osiliu iti id maso’d kolimpupuson it roitan do 69 minggu, nokotimpuun iti id toun 455 SM om nolimpupusan id toun 29 M.

Poingkuro toko’d koilo dot nolimpupusan iti id toun 29 M? Nokotimpuun o 69 minggu id toun 455 SM  soira nokorikot i Nohomia id Yorusalim om minimpuun do momonsoi kakadaian dilo. (Daniol 9:25, NW; Nohomia 2:1, 5-8) Soira korongou toko do boros “minggu,” kosorou toko do numbur 7. Minggu do pinoboros o nubuat diti okon ko minggu do turu tadau nga minggu do turu toun, iti tumanud do kooturan nubuat montok “sontoun o pomogontok do sangadau.” (Pongintaban 14:34; Yohoskiol 4:6) Komoyon diti monikid minggu nopo nga turu toun do linaid. I pogi’d 69 minggu nopo nga 483 toun (69 x 7). Nung intobon toko 483 toun mantad 455 SM, korikot toko id toun 29 M. Iti koontok tomod di toun do soira nobotisan i Yesus om nosiliu do Mosias!​—Lukas 3:1, 2, 21, 22.

Pinosunud nogi o minggu dit suai id nubuat diti, i turu toun do suai. Id maso diti, di toun 33 M, pinatai i Yesus, om tumimpuun di toun 36 M, pinopinhabar nodi o habar do osonong pasal Pomorintaan do Kinorohingan kumaa’d koinsanai bansa om okon ko tulun do Yohudi noo.​—Daniol 9:24-27, NW.

Kotob 4, por. 7

14 PONUDUKAN DIT A OTOPOT KOKOMOI’D TOLU POSUNA (TRITUNGGAL)

Minonuduk o Baibol dot i Yohuwah no o Gompomonsoi om winonsoi Dau i Yesus pogulu id koinsanai do nunu nopo. (Kolosi 1:15, 16) Yesus nopo nga okon ko Kinorohingan dit Agayo Kopio o Kuasa. A yau insan momusorou dot miagal yau do Kinorohingan. Ka dau: “I Tapa nopo om agayo i ko iyoho.” (Yohanis 14:28; 1 Korintus 15:28) Piipiro tugama monuduk dot Kinorohingan nopo nga tolu o koisaan do Kinorohingan: Tapa, Tanak, om rusod  tolidang. Aiso boros “Tolu Posuna” id suang do Baibol. Iti nopo nga ponudukan dit a otopot.

Rusod do Kinorohingan nopo nga kuasa Dau dit a okito dit gunaon di Yohuwah do momonsoi’d hontolon Dau. Iti okon ko sosongulun. Ponokosuntu, Kristian dit timpuuni nopo nga “noponu do Rusod do Kinorohingan,” om ka’d Yohuwah: “Potuntugon ku nondo o Rusod ku dot id koinsanai’d tulun.”​—Winonsoi 2:1-4, NW17.

Kotob 4, por. 12; Kotob 15, por. 17

15 SALIB

Soira sumamba do Kinorohingan o Kristian totopot, a yolo momoguno salib. Nokuro tu amu?

  1.  Alaid no’d gunaon o salib id tugama dit a otopot. Id gulu po, gunaon o salib id sambaan di don kapir. Tontok di timpuunon do 300 toun mantad kinapataiyon di Yesus, a momoguno o tulun Kristian do salib id sambaan diyolo. Nga a alaid mantad dii, minomoguno i Maharaja Rum Konstantin do salib sobaagi’d ponokolambang do Kristian. Minomoguno yau do lambang diti moi dot lobi’d popointutun do Kristian. Nga salib nopo nga aiso i o piantakan miampai di Yesus Kristus. Pinointalang The New Catholic Encyclopedia dot: “Haro no koubasanan do momoguno salib id di maso do a po nokorikot i Yesus om it okon ko Kristian.”

  2.  A i Yesus napatai id salib. “Salib” id boros do Yunani nopo nga komoyon dot “torigi dit poturidong,” “iso o kayu,” toi “iso o guas kayu.” Pinointalang The Companion Bible dot: “Aiso id nokoboros do Boros Yunani [Tumpongo Wagu] popokito do duo o kayu.” Napatai i Yesus id torigi dit poturidong.

  3.    Mada i Yohuwah dati do momoguno tininganak toi lambang id sambaan toko.​—Kinosoliwanan 20:4, 5; 1 Korintus 10:14.

Kotob 5, por. 12

16 POMUHANDAMAN

Minonuhu i Yesus do tumatanud dau do papaharo do Pomuhandaman do kinapataiyon dau. Wonsoiyon diyolo iti monikid toun id 14 Nisan, om kopihondot do tadau do mamaramai o tulun Israil do Tadau Paska. Roti om waig dot anggur it ponokolambang do tinan om raha di Yesus, pinotikid kumaa’d koinsanai tulun id Pomuhandaman. Iyolo it momorinta miampai di Yesus id surga, mangakan do roti om monginum do waig dot anggur. Om yolo i kikalansanan do masi sogigisom hiti’d tana rumikot id Pomuhandaman nga a mangakan do roti om monginum do waig dot anggur.

Kotob 5, por. 21

17 KODUDUWO (BOOGIAN DIT A OKITO DIT ATAMPASI SOIRA’D APATAI)

Ogumu tulun otumbayaan dot haro boogian dit a okito dot atampasi soira apatai o tulun om moi yolo sugku di taki-aki dit nangapatai. Piipiro otumbayaan nogi id kowoyo-woyoon diti, tulun napatai kaanu monguhup toi pokoruol do tulun dit poimpasi.

A minoboros o Baibol dot haro boogian dit a okito dot atampasi soira apatai toko. Nga atarang kopio do pinoboros dot soira apatai o tulun, aiso no nunu-nunu o topurimanan dau. Minomisunud o Baibol dati dot: ‘Tu iri nopo i tulun do poimpasi om koilo i do poingandad dau o kapatayon, nga iri nopondo i tulun do napatai om aiso noo o toila-ilaan dau. Aiso no  ot isomuli dau, om ngaran dau nga nolihuan no. I kopurimanan dot osianan, om araatan om i korohian do tinan dau, nga nokotonggoi ngai no dau’d napatai, om a no iyau kokuro-kuro do nunu nopo it ongosiliu do hiti’d pomogunan. Tumotos nod momonsoi do koinsanai di karaja nu. Tu koimbagu nopondo om aiso no ot osorou om aiso o karaja. Aiso i o toilaan om pomusarahan dot atarom do hilo’d kalabangan.’ (Gomponuduk 9:5, 6, 10) Minoboros nogi o Baibol dot soira apatai o sosongulun, ‘gumuli yau do hilo’d tana om tontok do tadau dii, opupusan ngai nondo o koinsanai dit osorou dau,’ om a no yau hino. (Sinding 146:4; Kinawansayan 3:19)

Atarang kopio dot a minonuduk o Baibol dot haro boogian dit a okito dot atampasi soira apatai o tulun. Soira’d apatai, a no yolo poimpasi id hombo nopo. I pogi, a no iyolo kaanu monguhup toi pokoruol do tulun dit poimpasi.

Kotob 6, por. 5; Kotob 15, por. 17

18 RUSOD

Ogumu o rati do “rusod” dit pinadalin mantad boros Ibrani om Yunani kumaa’d boros Inggeris id New World Translation. Kosoruan do rusod diti komoyon it a okito do tulun, miagal ko tongus toi pinohobo do tulun om nintorusan. Boros diti komoyon nogi doti do tulun di don rusod om rusod tolidang, i kuasa do Kinorohingan. A monuduk o Baibol dot haro boogian do suai do tulun dit poimpasi kasai soira apatai yau.​—Kinosoliwanan 35:21; Sinding 104:29; Matius 12:43; Lukas 11:13.

Kotob 6, por. 5; Kotob 15, por. 17

 19 GEHENA

Gehena nopo nga ngaran dot iso rantai id somok do Yorusalim it panaraban om pomunsaan do rinomos. Aiso kointalangan do maan inggorito toi tutudai o tulun toi nintorusan dit poimpasi id rantai diti id maso di Yesus. I pogi’d okon ko pinokolambang o Gehena dot iso kinoiyonon dit a okito do monginggorit om monutud tulun dit napatai do sogigisom. Soira minoboros i Yesus kokomoi do tulun dit pinaatam hilo’d Gehena, moboros yau kokomoi kopunsaan poimponu. Id Baibol Dusun, “Gehena” pinodalin sobaagi’d “naraka.”​—Matius 5:22; 10:28.

Kotob 7, por. 20

20 SAMBAYANG DO TUAN

Iti no sambayang do pinatahak di Yesus soira monuduk do tumatanud dau do poingkuro’d sumambayang. Roitan nogi iti dot sambayang Tapa Dahai. Sobaagi’d suntu, minonuduk i Yesus dati do sumambayang do poingkaa:

  • “Lidangan no daa o ngaran nu”

    Sumambayang toko montok di Yohuwah do momolidang ngaran Dau mantad koinsanai tudut. Iti moi dot koinsanai hilo’d surga om hiti’d tana mamantang do ngaran do Kinorohingan.

  • “Korikot no daa o pomorintaan nu”

    Sumambayang toko montok do pomorintaan do Kinorohingan do momunso pomogunan do Rogon dit araat, momorinta id pointongkop do pomogunan, om poposiliu diti pomogunan do paradais.

  • “Atanud no daa korohian nu . . . hiti’d pomogunan”

    Sumambayang toko montok kootus o hontolon do Kinorohingan do hiti’d tana moi dot tulun dit  obintumboyo kaanu do masi poingompus miampai aiso bohiton id Paradais, miagal dit pokioonuan di Yohuwah soira nowonsoi Dau o tulun.

Kotob 8, por. 2

21 TOBUSAN

Pinosodia di Yohuwah o tobusan moi dot atampasi o tongoulun mantad dusa om kapataiyon. Tobusan nopo nga gatang do pomoli kaagu do koposion do tulun dit aiso bohiton dit pinatagak di Adam, om poposonong piromutan miampai di Yohuwah dit rinaag do tulun. Pinaatod di Yohuwah i Yesus hiti’d pomogunan moi dot kaanu yau matai montok koinsanai tulun dit kidusa. Sabap do kapataiyon di Yesus, koinsanai tulun kikosiwatan do masi sogigisom om sumiliu tulun dit aiso bohiton.

Kotob 8, por. 21; Kotob 9, por. 13

22 NOKURO TU OPONTING KOPIO O TOUN 1914?

Nubuat id Daniol kotob 4 monuduk dati dot pinoingkakat do Kinorohingan o Pomorintaan Dau di toun 1914.

Nubuat: Nonuan di Yohuwah i Raja Nobukadnisar do iso nipi kokomoi’d songguas o kayu dot agayo dit tinagad. Id nipi dii, kinagasan i tuod kayu do basi om tambaga moi’d popotingkod do sumuni montok ‘turu toun’ do timpu. Katalib iri, sumuni kaagu nondo i kayu.​—Daniol 4:1, 10-16.

Nunu komoyon do nubuat montok dati: Kayu diti mongobi do pomorintaan do Kinorohingan. Montok piipiro toun, minomoguna i Yohuwah do raja id Yorusalim do momorinta id pointongkop do bansa  do Israil. (1 Susui 29:23) Nga kogumuan do raja dilo suminiliu’d a obintumboyo, om nopupusan dii o pomorintaan diyolo. Pinunsoo o Yorusalim id toun 607 SM. Ilo no kinotimpuunon do ‘turu toun.’ (2 Raja 25:1, 8-10; Yohoskiol 21:25-27) Soira minoboros i Yesus: “Ulak-ulakan nondo di tulun dit a kotutun do Kinorohingan o Yorusalim do gisom dot aayi i maso di natantu,” komoyon nopo dau nga pasal do ‘turu toun.’ (Lukas 21:24) I pogi’d a po nopupusan o ‘turu toun’ soira di hiti po’d tana i Yesus. Minamatos i Yohuwah do popoingkakat do iso raja id kolimpupuson do ‘turu toun.’ Mogowit nondo i Raja do wagu diti, i Yesus, do barakat dit agayo montok tulun do Kinorohingan id pointongkop do pomogunan do sogigisom.​—Lukas 1:30-33.

Linaid do ‘turu toun’: ‘Turu tounopupusan solinaid 2,520 toun. Nung intobon toko 2,520 toun mantad toun 607 SM, opupusan toko iti id toun 1914. Iti nopo nga soira pinoingkakat di Yohuwah i Yesus, i Mosias do Raja do Pomorintaan do Kinorohingan id surga.

Poingkuro toko kaanu’d numbur 2,520? Minoboros o Baibol dot tolu toun om satanga miagal dot 1,260 tadau. (Pinointalang 12:6, 14) I pogi, ‘turu toun’ nopo nga induo o numbur dilo, toi 2520 tadau. Om 2520 tadau miagal nogi do 2520 toun sabap kooturan do nubuat nopo om “sontoun o pomogontok do sangadau.”​—Pongintaban 14:34; Yohoskiol 4:6.

Kotob 8, por. 23

23 MIKAIL, BOYOON DO MOLOIKAT

Pinointalang do Baibol dot iso no o boyoon do moloikat, ngaran nopo dau nga i Mikail.​—Daniol 12:1; Yudas 9.

 Mikail nopo nga Boyoon do soudor i tongomoloikat dit obintumboyo di Yohuwah. Ka’d Pinointalang 12:7: “Monokisangod i Mikail om i piro-piro i moloikat dau do sumaap di naga’ddi . . . om uhupan i naga di piro-piro o moloikat dau.” Id buuk do Pinointalang minoboros dot Boyoon nopo do soudor di Yohuwah nga i Yesus, i pogi’d Mikail nopo nga ngaran do suai montok di Yesus.​—Pinointalang 19:14-16.

Kotob 9, por. 4

24 TADAU DO KOLIMPUPUSON

Komoyon nopo’d boros diti nga timpu maso’d soira ogumu kaantakan dit agayo osiliu hiti’d pomogunan pogulu id punsoon do Pomorintaan do Kinorohingan o pomogunan do Rogon. Boros diti miagal nogi do “kopupuson diti pomogunan” om ‘korikatan do Tanak do Tulun,’ i noguno id nubuat do Baibol it popokito timpu maso’d miagal. (Matius 24:3, 27, 37) Nokotimpuun o “tadau do kolimpupuson” diti soira’d nokotimpuun do momorinta o Pomorintaan do Kinorohingan hilo’d surga di toun 1914 om olimpupusan soira’d opunso o pomogunan do Rogon id Harmagidon.​—2 Timotius 3:1; 2 Pitrus 3:3.

Kotob 9, por. 5

25 KOTUNGAGAN

Soira posion kaagu do Kinorohingan o tulun dit napatai, iti komoyon dot kotungagan. Siam o kotungagan do noroitan id Baibol. Ilia, Ilisa, Yesus, Pitrus, om i Paulus no it nokoponungag do tulun. Owonsoi o koimayaan diti sabap no do kuasa do Kinorohingan. Minamatos i Yohuwah do tungagon dau “i tulun dit ongosonong om i tulun dit angaraat”  do masi hiti’d pomogunan. (Winonsoi 24:15) Noroitan nogi do Baibol o kotungagan kumaa hilo’d surga. Aantakan iti soira tungagon iyolo i nopili do Kinorohingan do masi hilo’d surga miampai di Yesus.​—Yohanis 5:28, 29; 11:25; Pilipi 3:11; Pinointalang 20:5, 6.

Kotob 9, por. 13

26 DEMONISME (SPIRITISME)

Demonisme toi spiritisme nopo nga koubasanan dit araat do mongumbal do potilombus do monongkiromut miampai rusod dit araat toi maya sosongulun, miagal ko i bobolian om i mogogontong. Momonsoi o tulun do spiritisme sabap otumbayaan iyolo do ponudukan dit poinsala dot haro rusod do tulun dit atampasi soira apatai om sumiliu do tombiruo dit kikuasa. Mongumbal nogi i rusod do araat do mongimbayat do tulun dot a mumboyo do Kinorohingan. Astrologi, mogogontong, poninduan, om toilaan di don rogon nopo nga soboogian do demonisme. Ogumu o buuk, majala, horoskop, filem, gambar, om nogi sinding dit kisuang toilaan di don rogon, rusod dit araat toi it haro kuasa taraat dit a okito, kokitanan miagal ko papasanang toi a pokoruol. Ogumu tadat do pamalabangan, miagal ko porsombahan montok do nangapatai, mamaramai’d pamalabangan, kinoulitan tadau do pamalabangan, om madtamong rata do tulun napatai nopo nga poinghompit nogi rumomut miampai di rusod taraat. Asaru o tulun momoguno dadah soira mongumbal do momoguno kuasa di rusod taraat.​—Galatia 5:20; Pinointalang 21:8.

Kotob 10, por. 10; Kotob 16, por. 4

 27 KOBONTUGAN DI YOHUWAH

Yohuwah nopo nga Kinorohingan dit Agayo Kopio o Kuasa, om winonsoi Dau o koinsanai tawan om tana. (Pinointalang 15:3) Ilo no komoyon dot Yau no o Sanganu do nunu nopo om kikobontugan toi kikuasa do momorinta kumaa di winonsoi Dau. (Sinding 24:1; Yosaya 40:21-23; Pinointalang 4:11) Minomonsoi Yau do toturan montok koinsanai di winonsoi Dau. Kikuasa nogi i Yohuwah do momili’d tulun suai do sumiliu do pomorinta. Monokodung toko kobontugan do Kinorohingan soira oupus om mumboyo toko Dau.​—1 Susui 29:11.

Kotob 11, por. 10

28 MONGIDU TANAK ID PONONTIANON

Mongidu tanak id ponontianon nopo nga monomod do mamatai tanak dit a po nosusu. Iti okon ko noligaganan toi haro kobolingkangan naantakan dot tinan do tulun. Id maso’d ponontianon, songulun tanak okon ko boogian do tinan do tina dau. Tanak nopodti nga songulun dit poinsuai.

Kotob 13, por. 5

29 KOPOUNDALIHAN RAHA

Iti nopo nga ralan do pongubatan dit koinsanai raha toi iso ko mantad dit apat o boogian toponting do raha dit poundolihon id tinan do sosongulun mantad do suai tulun, toi ko mantad raha dit pinoopi. Apat boogian toponting do raha diti nopo nga plasma, sel raha taragang, sel raha topurak, om platlet.

Kotob 13, por. 13

 30 PONONSUNUDAN (DISIPLIN)

Id suang do Baibol, boros montok “pononsunudan” nopo nga okon ko boros suai montok hukuman. Soira nosunudan toko, komoyon nosuhu, notudukan, om noinsanangan toko. A insan i Yohuwah do monginggorit toi araat kumaa tulun dit nonuan Dau do pononsunudan. (Boros dot Aralom 4:1, 2) Pinosodia di Yohuwah o suntu dit osonong montok do molohing. Koontok kopio o pononsunudan dit pinatahak Dau gisom oupus kopio o tulun do pononsunudan. (Boros dot Aralom 12:1) Oupus i Yohuwah do tulun Dau, om tudukan Dau yolo. Manahak Yau do ponuhuan dot popoinsonong do pomusarahan dit a otopot om monguhup diyolo do minsingilo do momusorou om momonsoi tumanud di korohian Dau. Montok do tongomolohing, pononsunudan poinghompit nogi do monguhup tangaanak diyolo do mamarati do sabap nokuro tu apatut do obintumboyo yolo. Iti komoyon nogi do monuduk diyolo do mupus di Yohuwah, om nogi Boros Dau id Baibol, om mamarati do ponontudukan Dau.

Kotob 14, por. 13

31 RUSOD DIT ARAAT

Rusod dit araat nopo nga moloikat dit araat dit kikuasa poinlolobi om a iyolo okito. Nosoliu yolo’d taraat soira suminiliu yolo sangod do Kinorohingan dot a tuminumboyo Dau. (Kinawansayan 6:2; Yudas 6) Tuminanud yolo’d Rogon do suminaap di Yohuwah.​—Ponugutan 32:17; Lukas 8:30; Winonsoi 16:16; Yakub 2:19.

Kotob 16, por. 4