Tolibai kumaa id suang

Tolibai hilo’d table of contents

Sasi-Sasi'd Yohuwah

Pilio boros Dusun

 KOTOB 3

Nunu o Hontolon do Kinorohingan Montok Tulun?

Nunu o Hontolon do Kinorohingan Montok Tulun?

1. Nunu o hontolon do Kinorohingan montok tulun?

HONTOLON nopo’d Kinorohingan montok tulun nga iso o koimayaan. Winonsoi Dau o kusai om tondu di koiso, i Adam om i Hawa, do miyon id kabun tolumis. Hontolon nopo’d Kinorohingan montok diyolo nga maganak, popotongkop do paradais hiti’d tana om madtamong do nintorusan.​—Kinawansayan 1:28; 2:8, 9, 15; intangai Sinuratan id Tohuri 6.

2. (a) Poingkuro’d oilaan toko dot pootuson do Kinorohingan o hontolon Dau? (b) Nunu pinoboros do Baibol pasal koposion do poingompus?

2 Kaanu toko toi miyon id paradais? Ka’d Yohuwah: “Iyo noddi o boros ku, om atantu no dot abayaan iri.” (Yosaya 46:9-11; 55:11) Oo, pinootus Dau o nunu nopo hontolon Dau om aiso i o kaanu mangantob Dau. Ka Dau: “Winonsoi dau iti do poiyanan do tulun, om okon i ko iso o kinoiyonon di poinsuwai-suwai kopio.” (Yosaya 45:18) Manu Yau’d mogigiyon o tulun id pointongkop do pomogunan. Nunu kowoyo-woyoon do tulun dit korohian do Kinorohingan miyon hiti’d tana, om piro linaid? Ka’d Baibol: “Om kasanganu indo di pomogunan i tulun dit ongotopot om koiyon do hiri do gisom dot alaid.”​—Sinding 37:29; Pinointalang 21:3, 4.

3. Nunu o tuhoton kokomoi sumakit om apatai o tulun?

 3 Baino sumakit om apatai o tulun. Id ogumu kinoiyonon, mogisasaap om mogipapatai yolo. Otopot, nga iti okon ko hontolon do Kinorohingan. Nunu o naantakan om nokuro? Baibol no kaanu’d popointalang pasal diti.

SANGOD DO KINOROHINGAN

4, 5. (a) Isai minoboros kumaa di Hawa maya iso tulanut hiri’d kabun dot Idon? (b) Poingkuro tulun dit otulid kosiliu’d mananakau?

4 Minomisunud o Baibol dati dot haro o sangod do Kinorohingan “i roitan do Rogon.” Rogon diti minomoguno’d tulanut do moboros kumaa di Hawa id kabun dot Idon. (Pinointalang 12:9; Kinawansayan 3:1) Winonsoi di Rogon iti miagal ko i tulanut o moro-boros.​—Intangai Sinuratan id Tohuri 7.

5 Winonsoi nangku’d Kinorohingan o Rogon? Amu! Soira winonsoi’d Kinorohingan iti tana montok di Adam om i Hawa, iso moloikat i poingiyon hilo’d surga suminimban om suminiliu’d Rogon. (Ayub 38:4, 7) Poingkuro? Baino, poingkuro tulun dit otulid sumimban om sumiliu songulun mananakau? A yau nosusu sobaagi’d songulun mananakau. Nga manu yau do nunu it okon ko dau. Tilombuson dau’d momusorou pasal diti, om guminirot di i korohian dau dit araat. Om soira kikosiwatan, pinanakau dau iri om siminiliu dii yau do mananakau.​—Basao Yakub 1:13-15; intangai Sinuratan id Tohuri 8.

6. Poingkuro iso o moloikat suminiliu sangod do Kinorohingan?

6 Iti no kinaantakan di moloikat diti. Soira’d nowonsoi’d Yohuwah i Adam om i Hawa, sinunudan  Dau yolo’d sumakag om tumongkop diti tana. (Kinawansayan 1:27, 28) Minomusorou doti i moloikat, “Koinsanai tulun apatut tumuku doho, okon ko Kinorohingan!” Mumu-gumu tosorou dau pasal diti, mumu-gumu nogi o kosioonuan dau mantad di Yohuwah. Moloikat diti manu’d tumuku o tulun kumaa dau. I pogi’d, minongudut om minongimbayat yau di Hawa. (Basao Kinawansayan 3:1-5.) Mantad dii, suminiliu yau’d Rogon i Gampamalid, om sangod do Kinorohingan.

7. (a) Nokuro tu matai i Adam om i Hawa? (b) Nokuro tu lumohing om matai toko?

7 A minumboyo i Adam om i Hawa do Kinorohingan om minangakan di tua. (Kinawansayan 2:17; 3:6) Minomidusa om apatai di yolo miagal di noboros di Yohuwah. (Kinawansayan 3:17-19) Koinsanai sinakagon diyolo nga kidusa om apatai dii. (Basao Rum 5:12.) Soroho pogi iso suntu di kouhup dati mamarati poingkuro’d kidusa nogi o sinakagon di Adam om i Hawa. Nung momonsoi tindalam miampai’d poiyanan dit nokumpit, tantu no haro bagas nokumpit di tindalam miagal dit poiyanan. Soira’d a minumboyo i Adam do Kinorohingan, kidusa di yau. Sabap yati nopo nga sinakagon di Adam, koinsanai dati kidusa, toi haro “bagas nokumpit” miagal dau. Iti no sabap nokuro tu lumohing om matai toko.​—Rum 3:23; intangai Sinuratan id Tohuri 9.

8, 9. (a) Nunu pokioonuan di Rogon dot tumboyoon di Adam om i Hawa? (b) Nokuro tu a tinilombusan di Yohuwah do mamatai i sumasaap?

8 Suminaap i Rogon di Yohuwah soira minongimbayat  yau di Adam om i Hawa dot a minumboyo’d Kinorohingan. Manu iyau otumbayaan yolo dot i Yohuwah nopo nga goudut, pomorinta dit araat om a manahak kasanangan. Moboros iyau dot a tagal do tulun do haro o Kinorohingan do momisunud diyolo nunu apatut do wonsoiyon om monontu nunu it osonong om araat montok diyolo. Iyo nopodi, nunu wonsoiyon di Yohuwah? Kaanu Yau mamatai om momunso dit sumasaap. Nga milo nangku’d popointalang iti dot Rogon nopo nga goudut? Amu.

9 I pogi, a di Yohuwah tinilombusan do mamatai i sumasaap Dau. Nga, pinologos Dau o maso montok tulun do momorinta sondiri. Iti popointalang dot i Rogon nopo nga goudut om koilo i Yohuwah do nunu o tosonong montok tulun. Kopinsingilo toko lobi’d ogumu kokomoi dilo id Kotob 11. Nga nunu pomusarahan nu pasal kootusan di pinili di Adam om i Hawa? Apatut nangku iyolo dot otumbayaan di Rogon om a mumboyo do Kinorohingan? Nonuan di Yohuwah iyolo do nunu nopo. Nonuan Dau iyolo do koposion dit aiso o bohiton, koiyonon dit olumis om karaja dit kaandasan diyolo. Nga a insan di Rogon do momonsoi nunu nopo ot osonong montok diyolo. Nung hilo ko, nunu o wonsoiyon nu?

10. Nunu ot pilion toponting dit kiharo monikid dati?

10 Baino, koinsanai dati haro o pomilian miagal diti om koposion toko poinghontol do pomilian diti. Kaanu toko momili’d mumboyo di Yohuwah  sobaagi’d Pomorinta toko om monguhup popokito dot Rogon nopo nga goudut. Toi kaanu momili’d Rogon sobaagi’d pomorinta toko. (Sinding 73:28; basao Boros dot Aralom 27:11.) Okuri kopio o tulun do mumboyo’d Kinorohingan hiti’d pomogunan.  Otopot, okon ko Yau o pomorinta’d pomogunan diti. Nga nung okon ko i Kinorohingan, isai?

ISAI MOMORINTA DO POMOGUNAN?

Nung okon ko Rogon o sanganu’d koinsanai pomorintaan do pomogunan, kaanu toi yau papatahak dilo kumaa di Yesus?

11, 12. (a) Nunu nopinsingilaan toko mantad panahakan di Rogon kumaa di Yesus? (b) Nunu boros Baibol i popokito dot Rogon o momorinta’d pomogunan?

11 Noilaan di Yesus dot isai kopio o momorinta’d pomogunan. Id iso naantakan, “potuduko no di Rogon dot id dau o koinsanai’d pomorintaan do hiti’d pomogunan om koinsanai di kakayaan do hiri.” Om pamatos no i Rogon di Yesus dot: “Patahakon ngai ku nopo daa iti dot id diya, ondung motud ko no do tumuku doho.” (Matius 4:8, 9; Lukas 4:5, 6) Uhot pogi, “Nung okon ko Rogon o sanganu’d koinsanai pomorintaan dilo, kaanu toi yau papatahak di Yesus?” Amu. Rogon o sanganu’d koinsanai pomorintaan.

12 Kosorou ko doti: “Poingkuro’d nosoliu i Rogon do pomorinta’d pomogunan? Okon toi ko i Yohuwah i Kinorohingan dit Agayo Kopio Kuasa o minomonsoi tawan om tana?” (Pinointalang 4:11) Oo, Iyau no, nga rinoitan kopio di Yesus dot i Rogon o “boyoon diti pomogunan.” (Yohanis 12:31; 14:30; 16:11) Rinoitan di Paulus i Rogon dot “ponokokinorohingan dit araat i momorinta diti pomogunan.” (2 Korintus 4:3, 4) Om sinurat nogi di Yohanis dot “suang ngai do pomorintaan di Yaraat o pointongkop diti pomogunan.”​—1 Yohanis 5:19.

 POINGKURO DO PUNSOON O POMOGUNAN DO ROGON?

13. Nokuro tu manu toko’d pomogunan wagu?

13 Maid-laid, mumu-gumu o kobolingkangan hiti’d pomogunan. Okito toko pisangadan, suap, oudut, om korongitan id posorili toko. A milo o tulun do popoidu’d koinsanai kobolingkangan diti, mulong piya monotos iyolo’d mogumbal. Nga a no alaid maan do Kinorohingan punsoo pomogunan dit araat id pisangadan Dau it roitan do Harmagidon om alanan nondo Dau dot pomogunan wagu dit otulid.​—Pinointalang 16:14-16; intangai Sinuratan id Tohuri 10.

14. Isai o pinili’d Kinorohingan do sumiliu’d Raja montok Pomorintaan Dau? Nunu pinoboros do Baibol pasal di Yesus?

14 Pinili di Yohuwah i Yesus sobaagi’d Raja do Pomorintaan Dau hilo’d surga. Rinibuan toun di gulu po, nokoboros o Baibol dot momorinta i Yesus sobaagi’d “Raja do Kouludan” om pomorintaan dau aiso kopupuson. (Yosaya 9:6, 7) Minonuduk i Yesus do tumatanud dau do sumambayang montok pomorintaan diti soira minoboros: “Pokionuon dahai dot iya o momorinta do hiti’d pomogunan; om atanud o korohian nu’d hiti do miagal dot atanud do hino’d surga.” (Matius 6:10) Id Kotob 8, kopinsingilo toko’d poingkuro Pomorintaan do Kinorohingan mongolon do koinsanai pomorintaan do pomogunan. (Basao Daniol 2:44.) Om, posilihon nondo’d Pomorintaan do Kinorohingan iti pomogunan dot paradais.—Intangai Sinuratan id Tohuri 11.

 ORUHAI NO KORIKATAN DO POMOGUNAN WAGU!

15. Nunu o “pomogunan wagu”?

15 Minamatos o Baibol: “Nga iyati nopo om magandad i di pinabatos do Kinorohingan, iri no i tawan di wagu om i pomogunan do wagu, i kinoiyonon dit otulid o wonsoyon.” (2 Pitrus 3:13; Yosaya 65:17) Soira moboros o Baibol kokomoi’d “pomogunan,” rati nopo nga tulun dit miyon hiti’d pomogunan. (Ponugutan 32:1) Iyo nopoddi, “pomogunan do wagu” nopo nga tulun ginumuan dit mumboyo om nabarakatan do Kinorohingan.

16. Nunu titahak tosonong do Kinorohingan kumaa’d tulun di koiyon id pomogunan wagu Dau, om nunu mositi’d wonsoiyon toko moi dot kaanu’d titahak diti?

16 Minamatos i Yesus dot tulun dit koiyon id pomogunan wagu oonuan dot “koposion . . . poingompus.” (Markus 10:30) Nunu mositi’d wonsoiyon toko moi dot kaanu’d titahak diti? Basao Yohanis 3:16 om 17:3 do mogihum sisimbar. Kaino intangai toko nunu boros do Baibol kokomoi’d poingkuro koposion id pomogunan do Paradais.

17, 18. Poingkuro toko’d koilo dot haro kosimbayanan do hombo nopo do hiti’d tana om atampasi toko nondo?

17 Aiso nondo karaaton, pisangadan, tangaraat, om korongitan. Aiso tiso piya’d tulun taraat poimpasi hiti tana. (Sinding 37:10, 11) Tiningkod do Kinorohingan “o pisangadan do pointongkop diti pomogunan.” (Sinding 46:10; Yosaya 2:4) Oponu nondo iti pomogunan do tulun dit oupus om  mumboyo do Kinorohingan. Haro nondo kosimbayanan sogigisom.​—Sinding 72:7.

18 Kopuriman nondo’d atampasi o tulun di Yohuwah. Id maso’d Baibol, soira’d tumumboyo o tulun Israil do Kinorohingan, atampasi dii yolo sabap nintirungan Dau. (Oturan 25:18, 19) Id Paradais, a toko nondo orosian do nunu nopo toi isai nopo. Atampasi toko kasai!​—Basao Yosaya 32:18; Mika 4:4.

19. Nokuro tu otumbayaan toko dot ogumu takanon id pomogunan wagu’d Kinorohingan?

19 Osima nondo o takanon. “Maha daa om osima do gandum o hiti’d pomogunan, maha daa om otongkop do tanom-tanom o hilo’d konulu-nuluan.” (Sinding 72:16) “Nabarakatan toko nod Kinorohingan” i Yohuwah om “haro no o hasil do nokoimbulai diti tana.”​—Sinding 67:7.

20. Poingkuro toko’d koilo dot kosiliu nondo’d paradais o pomogunan?

20 Osiliu nondo’d paradais id pointongkop do pomogunan. Kiwalai om kikabun do olumis nondo o tulun. (Basao Yosaya 65:21-24; Pinointalang 11:18.) Olumis nondo o pointongkop do pomogunan miagal di kabun do Idon. Kabagal nondo kasai o titahak di Yohuwah kumaa dati. Ka’d Baibol pasal Dau: “Kabagal i diyolo i patahakon nu diyolo, om onuan nu iyolo do koinsanai di pokionuon diyolo.”​—Sinding 145:16.

21. Poingkuro toko’d koilo dot haro kosimbayanan do tulun om nintorusan?

21 Haro nondo kosimbayanan do tulun om  nintorusan. A nondo koligogon o nintorusan do tongoulun. I tanak tokoro nga atampasi mulong piya osorilian do nintoruson dit koligogon do baino.​—Basao Yosaya 11:6-9; 65:25.

22. Nunu nondo maan di Yesus montok tulun dit kitoruol?

22 Aiso nondo o kitoruol. Di hiti po i Yesus id tana, ogumu tulun do liningasan dau. (Matius 9:35; Markus 1:40-42; Yohanis 5:5-9) Sobaagi’d Raja do Pomorintaan do Kinorohingan, lingasan nondo dau o koinsanai tulun. Aiso nondo momoros do “kitoruol iyau.”​—Yosaya 33:24; 35:5, 6.

23. Nunu maan do Kinorohingan montok tulun di napatai?

23 Apasi nondo i tulun do napatai. Minamatos o Kinorohingan dot tungagon Dau o riniangan tulun dit napatai. “Posion kawagu’d Kinorohingan o koinsanai di tulun di napatai—dot i tulun dit ongosonong om i tulun dit angaraat!”​—Basao Yohanis 5:28, 29; Winonsoi 24:15.

24. Poingkuro topurimanan nu pasal koposion id Paradais?

24 Koinsanai dati haro pomilian. Kaanu toko’d momili minsingilo pasal di Yohuwah om kumaraja montok Dau, toi momonsoi nunu nopo it korohian toko. Nung momili toko’d kumaraja montok di Yohuwah, kaanu toko’d koposion tosonong id maso’d abantalan. Minamatos i Yesus kumaa songulun kusai dit hinukuman id sampaping dau: ‘Kosugku ko doho do hilo’d Paradais.’ (Lukas 23:43) Pinsingilo toko no’d ogumu po pasal di Yesus Kristus om poingkuro yau’d popootus do batos-batos tosonong mantad Kinorohingan.