Tolibai kumaa id suang

Tolibai hilo’d table of contents

Sasi-Sasi'd Yohuwah

Pilio boros Dusun

 PALAJARAN 4

Isai i Yesus Kristus?

Isai i Yesus Kristus?

1. Poingkukuro o kopooposion di Yesus di timpuun i’?

Nokuro tu’ asanangan o tongoulun minsomok di Yesus?​—MATIUS 11:29; MARKUS 10:​13-16.

A’ miagal dati’ i Yesus tu’ i nopo it a’ po iyau nokorikot hiti’d pomogunan nga’ poingiyon no iyau hilo’d surga id kowoowoyoon di don rusod. (Yohanis 8:23) Iyau no o gulu winorun di Yohuwah om minonguhup’ddi iyau Dau do momorun di koinsanai do nunu nopo. Iyau noo o winonsoi sondiri di Yohuwah, om iri no o koroitan dau do ‘tanak dit iso’ noo.’ (Yohanis 1:​14, 18) Roitan nogi iyau dot “i Boros” tu’ popinsunud iyau bagi’ do Kinorohingan.​—Basao’ Boros dot Aralom 8:​22, 23, 30; Kolosi 1:​15, 16.

2. Nokuro tu’ ruminikot i Yesus hiti’d pomogunan?

Pinaatod di Yohuwah o Tanak Dau hiti’d pomogunan. Pinawaliu Dau koposion di Yesus dot id tian di Maria, songulun sumandak do Yahudi om aiso’ddi tapa’ di Yesus di don tulun. (Lukas 1:​30-35) Ruminikot i Yesus hiti’d pomogunan do (1) monuduk dati’ katapatan pasal Kinorohingan, (2) sumiliu’d omitanan toko’ poingkukuro momonsoi ponuhuan di Yohuwah mulong piya do kikosusaan toko’, om (3) papatahak koposion dau dit aiso’ o bohiton sabaagi do pambayar.​—Basao’ Matius 20:28.

3. Nokuro tu’ mositi do haro o pambayar toko’?

Pambayar nopo nga’ gatang do popoidu sosongulun mantad id kapatayon. (Kinosoliwanan 21:​29, 30) Otopot nopo daa kopio nga’ okon ko’ winonsoi di Yohuwah o tulun do lumohing om matai. Poingkuro toko’ do mongilo’ddi? Sinunudan di Yohuwah i tulun do koiso’, i’ Adam, do nung momonsoi iyau di komoyon do Baibol do “dusa,” nga’ apatai nondo iyau. Sokiro daa dot a’ minomonsoi i Adam do dusa, nga’ a’ indo  apatai iyau. (Kinawansayan 2:​16, 17; 5:5) Boros ka do Baibol, suminuang o kapatayon dot id pomogunan minaya’ di Adam. Pinotungkus di Adam o dusa om kapatayon, i ponuli’ do dusa kumaa koinsanai sinakagon dau. Mositi’ddi do haro o pambayar do popoidu dati’ mantad kapatayon i notungkus toko’ mantad di Adam.​—Basao’ Rum 5:12; 6:23.

Isai o kapambayar do popoidu dati’ mantad kapatayon? Soira’ dot apatai toko’, dusa dati’ sondiri noo ot abayaran dati’. Aiso’ o tulun di kibohiton do kapambayar dusa do tulun suwai.​—Basao’ Sinding 49:​8-10.

4. Nokuro tu’ napatai i Yesus?

A’ miagal i Yesus dati’ tu’ aiso’ o bohiton dau. A’ddi daa minog do matai iyau tu’ aiso’ o dusa dau. Nga’ minatai i Yesus montok dusa do tulun suwai. Osianan kopio i Yohuwah do tongoulun gisom pinaatod Dau o tanak Dau do matai bagi’ dati’. I Yesus nga’ osianan nogi kopio dati’ tu’ minumboyo’ iyau di Tapa’ dau om minanahak do koposion dau bagi’ dusa dati.’​—Basao’ Yohanis 3:16; Rum 5:​18, 19.

Intangai video diti Nokuro Tu Napatai I Yesus?

5. Nunu maan di Yesus do dinondo?

Maso id pomogunan, minomolingos i Yesus tulun di kisakit, minamasi iyau tulun di napatai, om minonginsasamod iyau tongoulun dit oinggorit. Pinopokito iyau nunu o maan dau dot id dabantalan kumaa koinsanai tulun dit otorodok. (Matius 15:​30, 31; Yohanis 5:28) Pinasi kawagu’d Kinorohingan i Yesus mantad kapatayon dot id kowoowoyoon di don rusod. (1 Pitrus 3:18) Minandad i Yesus id dawananan do Kinorohingan gisom do pinatahak di Yohuwah dau o kuasa’ do momorinta sabaagi raja’ do pomogunan. (Ibrani 10:​12, 13) Momorinta noddi i Yesus sabaagi do raja’ id surga, om popinsusui no o tumatanud dau diti habar dot osonong id pointongkop do pomogunan.​—Basao’ Daniol 7:​13, 14; Matius 24:14.

Oruhai no do pakayon di Yesus i kuasa’ dau di don raja’ do momunso koinsanai’d koinggoritan om tulun di momonsoi’ddi. Tulun di mumboyo’ om popokito’d kotumbayaan kumaa dau nga’ kaanu nondo koposion di poingompus hiti’d pomogunan.​—Basao’ Sinding 37:​9-11.