Tolibai kumaa id suang

Tolibai hilo’d table of contents

Sasi-Sasi'd Yohuwah

Pilio boros Dusun

 BOOGIAN 7

Poingkuro’d Monuduk do Tanak Nu

Poingkuro’d Monuduk do Tanak Nu

“Kada’ no kopio dokoyu kolihuai iti ponuhuan di pinatahak ku dot id dokoyu di tadau baino’. Potudukon noti do id tanganak dokoyu.”—Ponugutan 6:6, 7

Dit minonimpuun dot sampaganakan, minanahak i Yohuwah tonggungan kumaa’d molohing do tumamong dot tangaanak. (Kolosi 3:20) Molohing noh o’t monuduk do tanak diyolo’d mupus di Yohuwah om poposiliu diyolo’d tulun dit kitonggungan dot soira’d osukod. (2 Timotius 1:5; 3:15) Apatut do minsingilo ko’d nunu o’t id suang do ginawo’d tangaanak dokoyu. Om yokoyu noh o poomitanan dot osonong. Posuango noh id ginawo dokoyu i’t boros do Kinorohingan om iti nondo o’t kouhup dot monuduk do tangaanak dokoyu.—Sinding 40:9.

1 KOROHIAI NO’D ROPOHON DI TANGAANAK DOKOYU

NUNU KA’D BIBLE: “Oining do mokinongou nga kada kolomus dot moro-boros.” (Yakub 1:19) Asanangan ko’d orohian o tangaanak dot monongkiboros diya. Pokitono noh yolo’d poinsodia ko no’d mokinongou soira’d haro o poboroson diyolo. Pokitanai nogi’d haro o maso nu’d dit osimbayan dot monongkiboros om kolombus nondo i’t tosorou diyolo. (Yakub 3:18) Ondung kopuriman nopo yolo’d akasar ko, om amu nondo yolo monongkiboros diya. Polonuto noh kowoyo-woyoon nu, om pokitono noh tangaanak nu dot oupus ko kopio diyolo.—Matius 3:17; 1 Korintus 8:1.

NUNU WONSOIYON:

  • Paganu no’d kosiwatan soira nopo’d haro poboroson do tangaanak dokoyu

  • Ponongkiboros kou no’d tangaanak dokoyu mulong piya’d aiso o’t kobolingkangan

 2 ROTIO NOH I KOBORO-BOROSON DIYOLO

NUNU KA’D BIBLE: “Podulon no i ponudukan do nokotuduk dot id diya’, om koundar ko i’.” (Boros Dot Aralom 16:20) Haro o maso, apatut ko’d koilo’d komoyon di koboro-boroson do tanak nu om nunu i tosorou diyolo. Dau-dau i’d tangaanak, dit akawas kopio koboro-boroso. “Mokinongou pod gulu om sumimbar nogi’. Tu ondung amu’ . . . basug.” (Boros Dot Aralom 18:13) Kada kobintogod.—Boros Dot Aralom 19:11.

NUNU WONSOIYON:

  • Pogiroto noh kopurimanan nu dot a’ sumurilog om mangalai’d katagadan dit koboro-boroson do tangaanak

  • Umbalai’d momusorou i’t opurimanan dit miagal nogi diyolo o tumur nu

 3 PITORUNUNG NOH ID TOGUANG DO TANGAANAK

NUNU KA’D BIBLE: “Oi tangaanak ku, pokinongohon noh kopio i poboroson dot tapa om tina nu.” (Boros Dot Aralom 1:8) Tinahak di Yohuwah o’t kuasa’d montok molohing kumaa’d tangaanak. Tudukan noh yolo’d mamantang om obintumboyo diya. (Iposus 6:1-3) Kopuriman i’ o tangaanak dokoyu’d ondung a’kou noh mogiuulud. (1 Korintus 1:10) Haro nopo’t a’ kopiuludan dokoyu, kada pokitono id toguang dot tangaanak tu iti noh koidu dot kapamantangan diyolo dokoyu.

NUNU WONSOIYON:

  • Pibarasai om piokunai no poingkuro’d popoundar dot tangaanak dokoyu

  • Kopinsansala nopo tosorou dokoyu’d monuduk dot tangaanak, rotio no i’t tosorou’d koruhang nu

4 PAMPANGO NOH RALAN

NUNU KA’D BIBLE: “Tudukan noh tanak do kowoyo-woyoo do koposi-posion di korohian do Kinorohingan.” (Boros Dot Aralom 22:6) Monuduk nopo’d tanak nga okon ko monoroinsan noh. Pampango no’t ralan pinsingubasan dot tanak nu dit kohompit do popoundar diyolo. (Sinding 127:4; Boros Dot Aralom 29:17) Popoundar nopo nga okon ko sikoton nopo, tu kohompit nogi ot monguhup dit tangaanak dot mamarati’d oturan di pinatahak. (Boros Dot Aralom 28:7) Om tudukan noh kopio iyolo’d oupus dot Boros di Yohuwah om mamarati dit prinsip-prinsip dau. (Sinding 1:2) Iti no o kouhup diyolo’d poposuni id ginawo diyolo i’t kaanu’d popoundar dot kopomusarahan.—Ibrani 5:14.

NUNU WONSOIYON:

  • Rotio noh dot kotutun kopio tangaanak nu’d Kinorohingan sobaagi’d pointopot dot haro om milo’d tumboyoon

  • Uhupai no tangaanak nu’d mongintutun dit kowoyo-woyoon dot araat om i’haro hilo’d Internet toi ko id suang dot rangkaian sosial. Tudukai no yolo’d mongintutun dit tulun dot bonduon

“Tudukai no tanak do ralan dit koposion totopot”