Turus sid izon

Sasi di Yehovah

Pomili boros Momogun

Engin Ko ka Mongining Kabanaran?

Engin Ko ka Mongining Kabanaran?

KABANARAN kanangan ko nunu? Kanangan ko pongoduatan dit openting, it duduaton kinogumuan tulun. Kopinsan ko ka mongoduat i pongoduatan yadko nokosurat sid siba?

  • Banalka ko ataud i Kinoringan ditokou?

  • Mompuska iti mipaparang om kosusaan?

  • Nunu ajadi sid ulun do minatai?

  • Varoka harapan it ulun do minatai?

  • Kuran gamaku mintadua om iningon do Kinoringan?

  • Kuranku mogihim kohigakan sid koposizan?

Siombo ka pogihiman panarangan it pongoduatan diti? Ong mongimot ko sid laibri antawa sid kadai do buuk, kemot ko dot ogumu buuk mad varo panarangan. Topot tasantanid-tanid o panarangan. Timpuun po, madko mionong nga sid tohudi taddau amu no mionong om sinimbanan no vagu.

Topot, varo iso buuk kadapat manahak panarangan it adapat osipon. Suvang buuk diti aso vokon baiko kabanaran. Boros di Yesus i hiza minintadua yosido sid Kinoringan, “I boros Nu soumul abanal.” (Yohanes 17:17) Biano, elaan ditokou i Boros it rinait di Yesus inono Kitab Osusi. Sid nalad sumusuhut, emot tokou it atalahas om miuma osipon ot panarangan antad sid Kitab kanangan ko i pongoduatan it nokosurat sid savat.

 Banalka ko Ataud i Kinoringan Ditokou?

SABAP MONGODUAT: Pentoron tokou sid pomogunan it noponuan do karaatan om amu adil ogama. Ogumu ot ugama mangajal dot it karaatan it ahajangan ditokou takdir no do Kinoringan.

NUNUKA TUDUKAN KITAB: Karaatan okonko antad sid Kinoringan. Sabap pogi, ka di boros sid Ayub 34:10 “Minangagama ka dot amu nokonong i Kinoringan i Kikuasa?” Varo avantang potujuvan di Kinoringan kumaa sid riniba. Sabap pogi, minonuduk i Yesus gama mintadua: “Ot Ama dahai sid soruga . . . Ikau no Raja dahai. Ikau no momorinta di putanaon [pomogunan], om yadko i sid soruga, i kenginan nu o suhuton.” (Matius 6:9, 10) Banalko ataud i Kinoringan ditokou, sampai Yosido no kondiri mongusaha posunu dit kenginan Dau bahagi ditokou.—Yohanes 3:16.

Imatan Kinotimpuunan 1:26-28; Yakubus 1:13; om 1 Petrus 5:6, 7.

Mompuska Iti Mipaparang om Kosusaan?

SABAP MONGODUAT: Amu no ezap-ezap kogumu tulun minatai gima tu mipaparang. Sokoviai tokou kopipurimon dot kosusaan.

NUNUKA TUDUKAN KITAB: Nokentahan no laid di Kinoringan dot irikot Dau kopiondusan sid pentongkop pomogunan. Sid sahau Karajaan Dau, pomorintaan do soruga, it riniba “amu no mingat mongorumpak [miparang].” Agamko “It ongosapadang silihon dioti do radu.” (Yesaya 2:4) Tonuson di Kinoringan sokoviai it kosusaan om it amu adil ogama. Boros do Kitab: “Pihidon Dau [Kinoringan] i romou dioti dino. Aso no kapatazan, aso no kolunguzan, aso no mogihad om aso korualan. Tu nunu nopo i dang gulu [termasuk it kosusaan om amu adil ogama] nga natanus no.”—Kentalangan 21:3, 4.

Imatan Zabul 37:10, 11; 46:10; om Mika 4:1-4.

Nunu Ajadi sid Ulun do Minatai?

SABAP MONGODUAT: Kinogumuan ugama sid pentongkop pomogunan, retan ko varo hatod dilo tulun minatai. Varo kasip dot it minatai kadapat monimpus antawa mongindorosi dit ulun dot mizau om varo no ong kasip dot ong it araat koulun hukumon di Kinoringan sansaraon sampai penlaid sid naraka kiapui.

NUNUKA TUDUKAN KITAB: It minatai, natanus no. “It ulun do minatai aso not elelaan,” ka sid I Moonuduk 9:5. Pagka tu amu no karahati, kopurimon, antawa monguro-kuro, manjadi amu kadapat yoti momunovot—antawa monulung—dit ulun mizau i.—Zabul 146:3, 4.

Imatan Kinotimpuunan 3:19 om I Moonuduk 9:6, 10.

 Varoka Harapan it Ulun do Minatai?

SABAP MONGODUAT: Engin tokou apasi, om engin tokou soumul-umul miurug-urug dit sinamadan ditokou. Engin tokou kopisamung vagu dit ongo kovovorisan antawa kinoruhangan it nokogulu no minatai.

NUNUKA TUDUKAN KITAB: Kinogumuan it ulun minatai varo kogulianan. Nakajanji i Yesus dot “ulun minatai . . . lumabus antad sid lobong.” (Yohanes 5:28, 29) Yadko it kenginan laid do Kinoringan, sokoviai it nogulian varo kounsapatan apasi penlaid sid pomogunan kavavagu. (Yesaya 65:21-25) Toliban poko ino, it sinumuhut boros do Kinoringan kadapat kosihatan dot tavatang om koposizan penlaid. Boros do Kitab: “It ulun dot elin [abanal] o kasanganu di pomogunan.”—Zabul 37:29.

Imatan Ayub 14:14, 15; Lukas 7:11-17; om Usuran dit Ongorasul 24:15.

Kuran Gamaku Mintadua om Iningon do Kinoringan?

SABAP MONGODUAT: Kinogumuan it ulun kiugama mintadua. Topot ogumu kopurimon dot amu iningon di Kinoringan it pomintaduaan dioti.

NUNUKA TUDUKAN KITAB: Ka di Yesus kadan no pingguli-gulian o boros sid pomintaduaan. Boros di Yesus “Kagi po ong mintaduwa kou, okonko ohulot [pingguli-gulian] o boros yadko it ulun it amu kotutun do Kinoringan.” (Matius 6:7) Ong engin tokou iningon di Kinoringan ot pomintadua ditokou, suvaiko mintadua mozo it kenginan Dau. Manjadi operlu tokou marajal nunu kenginan di Kinoringan tazon om kadapat tokou mintadua sumuhut i kenginan Dau. Nakatarang sid 1 Yohanes 5:14: “Ong mindamo tokou sid Dau do nunu nopo, tumbozoon tokou Dau, ong sukul mionong di kenginan [Kinoringan] it indomoon tokou.”

Imatan Zabul 65:3; Yohanes 14:6, 14; om 1 Yohanes 3:22.

Kuranku Mogihim Kohigakan sid Koposizan?

SABAP MONGODUAT: Ogumu tulun mongogusa dot siin, pangkat antawa kovosiho tu indoson ong inono mongovit kohigakan. Topot, magavi poma yoti mongogusa, aso i kinohigakan.

NUNUKA TUDUKAN KITAB: Minonuduk i Yesus nunu ralan kohigakan hiza minomoros yosido, “Abarakatan no it ulun di kopurimon do monongkogunaan yoti do Kinoringan.” (Matius 5:3) Kadapat tokou kohigakan totopot ong sumoon tokou nunu it banalko operlu, inono it kotuliohon dot kabanaran kanangan ko Kinoringan om nunu kenginan di Kinoringan bahagi ditokou. It kabanaran dino nokosurat sid Kitab. It kabanaran kapanabang ditokou mangaharati it nunu ot banalko openting antawa amu. Ong mokitunda tokou do kabanaran do Kitab hiza manganu koputusan om sid gagamaon ditokou, kadapat tokou koposizan dit lobipo avantang.—Lukas 11:28.

Imatan Sambatan 3:5, 6, 13-18 om 1 Timotius 6:9, 10.

 Iti diti baiko akopiro panarangan antad sid Kitab kanangan ko it 6 pongoduatan. Engin ko ka posurut pongilaan? Mimang ko mongoho ko ong ‘monongkogunaan ko do Kinoringan.’ Varo dati pongoduatan nu vokon, yadko: ‘Ong ataud i Kinoringan ditokou, nokuro tu posimozoon Dau ogumu karaatan om kosusaan do riniba antad di gulu? Kuran ku mangatag dit koposizan suvang ongkob ku?I Kitab kadapat monodia osukup om alangkap ot panarangan kanangan ko pongoduatan diti om pongoduatan vokon.

Topot, biano no ogumu tulun avagat o ginavo mongimot do Kitab. Ka dioti it Kitab banalko akapal om varo ot apagon mangaharati. Mokitabang ko ka mogihim panarangan antad sid Kitab? Varo 2 gama Sasi di Yehovah kapanabang ditokou.

Keso, it buuk tonipis Habal do Kovosihan Antad sid Kinoringan! ginama andang ko dang monunda dit ongoulun mogihim panarangan dit pongoduatan kanangan ko Kitab. It koduvo program marajal do Kitab sid valai it aso barazan. Iso Sasi di Yehovah, dit alayak mangajal do Kitab rumikot sid valai nu antawa tampat do vokon sumuhut di kenginan nu om insan sominggu motibang mibinsang do Kitab. Jinutaan tulun sid pentongkop pomogunan kadapat munsopot program diti. Ogumu dioti minomoros, “Nokemot oku no kabanaran!”

Itino tinungkusan it banalko kihorogo inono Kitab. Iti kabanaran do Kitab palabus ditokou sid kosipan do labus, kogulivong, om it amu apatut ikorosi. It kabanaran do Kitab manahak ditokou harapan, tujuvon do koposizan, om kohigakan. Yadko i noboros di Yesus, “Elaan dikou i kabanaran kananganko Kinoringan, om i kabanaran dino o pavazau [palabus] dikou.”Yohanes 8:32.