Turus sid izon

Turus sid menu 2

Turus sid sinarai dot izon

Sasi di Yehovah

Momogun

Habal do Kovosihan Antad sid Kinoringan!

 PALAJARAN 14

Nokuro Tu Minomili Kinoringan Iso Umpug Dot Ulun?

Nokuro Tu Minomili Kinoringan Iso Umpug Dot Ulun?

1. Nokuro tu hinatul di Kinoringan it Israil kodori?

Hinatul di Kinoringan it koturunan di Abraham jumadi iso umpug om tinakahan Dau yoti do ongo hoturan. Pinungaranan Dau bansa dino dot “Israil.” Engin Yosido it ugama dit otopot om it boros Dau ontupat maza di bansa diti. (Zabul 147:19, 20) Manjadi, ulun antad sokoviai bansa kadapat munsopot antad bansa dot Israil.Basaon Kinotimpuunan 22:18.

Pinili di Kinoringan it bansa dot Israil jumadi sasi Dau. It koposizan dioti digulu popemot nunu ounsopot dit ongoulun dit sumuhut do hoturan do Kinoringan. (Kinembulitan 4:6) Manjadi, maza dit bansa Israil, it vokon nga kadapat tumutun dit Kinoringan do tabanal.Basaon Yesaya 43:10, 12.

2. Nokuro tu engin i Kinoringan it ongoulun Dau, miiso?

Gima tu, amu no sinumuhut it ongoulun Israil dit hoturan do Kinoringan, minangamu no i Kinoringan dioti om ginontizan no bansa dino dot sidang do Kristian. (Matius 21:43; 23:37, 38) Biano no, ulun Kristian totopot minangaganti dit bansa dot Israil, ino no roiton dot sasi di Yehovah.Basaon Usuran 15:14, 17.

Hinatul di Yesus it ongoulun dit mozo dau do pahabal om monuduk dit ongoulun tazon om sumuhut dau. (Matius 10:7, 11; 24:14; 28:19, 20) Kakalno kumansang yoti papanau it habal diti it amuno alaid orikot no pongovian. Biano, i Yehovah pinopiiso jinutaan ulun antad sid sokoviai bansa sid ugama dot otopot. (Kentalangan 7:9, 10) Kristian dit otopot misusungkod om miatatabang. Sid pentongkop pomogunan, enirad it tudukan do Kitab adapat dioti hiza sid piumpugan.Basaon Ibrani 10:24, 25.

 3. Kuranka kinotimpuunan di Sasi di Yehovah biano?

Sid toun 1870-an, varo iso umpug topodok dit minarajal do Kitab nokemumui vagu dit tudukan totopot do Kitab. Nohorotizan dioti dot nokoponuhu i Yesus dit umpug do Kristian dot pahabal habal do kovosihan, manjadi minonimpuun yoti dot kempen pahabal habal kanangan ko Karajaan do Kinoringan sid pentongkop pomogunan. Sid toun 1931, notutunan yoti, Sasi di Yehovah.Basaon Usuran 1:8; 2:1, 4; 5:42.

4. Kuranka it gagamaon do Sasi di Yehovah?

Sid timpuun po, it ongosidang do Kristian hinatul dot iso umpug do mangahatul it minangakun dot i Yesus no ot Ulu do sidang. (Usuran 16:4, 5) Yadnoko ino it biano, Sasi di Yehovah hinatul dot iso Umpug do Mangahatul inono it ongo penatua osukup ot keloo. Umpug diti mangahatul dit pejabat cawangan Sasi di Yehovah, ino no papanau dit gagamaon padalin boros, momirin om potikid babasaon kanangan ko Kitab sid labaan 600 ot boros. Manjadi, kadapat it Umpug do Mangahatul manahak tudukan om boros dit ponginggazo do ginavo antad sid Kitab sid labaan 100,000 sidang sid pentongkop pomogunan. Sid ipat-ipat sidang, it kusai dit alayak kadapat jumadi do penatua, antawa penyelia. Yoti diti miampai do samod manaud dit bahanan dit domba do Kinoringan.Basaon 1 Petrus 5:2, 3.

Sasi di Yehovah papanau habal do kovosihan om monuduk tongoulun sumuhut di Yesus. Yadko it ongorasul, tumikid okoi valai pahabal habal do kovosihan. (Usuran 20:20) Toliban poko ino, ohigak okoi mangajal do Kitab sid ongoulun it ozi do kabanaran. Sasi di Yehovah okonko baiko iso umpug. Inoinga madko it iso suvang ongkob it ki Ama dit asamod. Yokoi diti songobpinai kusai om ondu dit miasasamod. (2 Tesalonika 1:3) Gima tu, Sasi di Yehovah diti andang kumosog posinang ginavo do Kinoringan om monulung tongoulun vokon, manjadi, yoti no diti it suvang ongkob banalko ohigak sid pomogunan.Basaon Zabul 33:12; Usuran 20:35.