1. Nokuro tu it avantang gama minisavo mongovit sid kohigakan songongkob?

It habal do kovosihan antad sid Kinoringan it ohigak, i Yehovah, engin dot sokoviai it suvang ongkob nga ohigak. (1 Timotius 1:11) Yosido no minonimpuun pinisavaan. Pinisavaan dit nakadaftar banalko openting sid kohigakan songongkob tu kadapat monodia it avantang kaadaan monukod tangaanak. Ulun Kristian apatut sumuhut dit undang-undang kanangan ko it padaftar do pinisavaan.Basaon Lukas 2:1, 4, 5.

Nunu kopurimanan di Kinoringan kanangan ko pinisavaan? Engin i Yehovah ong i pinisavaan dit kusai om ondu dino sampai penlaid. Engin i Yehovah ong it kusai om ondu opihot sid pinisavaan. (Ibrani 13:4) Asana Kinoringan ong miada. (Maliaki 2:16) Nga koho i Kinoringan miada om musavo vagu ong it savo dioti kinumiagai.Basaon Matius 19:3-6, 9.

2. Kuran gama it kusai om it ondu sid savo?

Inurug di Yehovah it kusai om ondu banalko kopianggol. Manjadi, it minisavo ipat-ipat dioti varo tanggungjawab. (Kinotimpuunan 2:18) It kusai tu ulu do suvang ongkob, apatut yosido monodia kosukupan do suvang ongkob dau om sid gama mangajal kanangan ko Kinoringan. Apatut it kusai manamod dit savo dau om amu mongitung dau kondiri. It kusai om it ondu apatut miasamod om mihorumat. Sokoviai tulun nga kagama do kasalaan, manjadi it minisavo suvai ko miaampun tu iti no iso ralan kohigakan songongkob.Basaon Episus 4:31, 32; 5:22-25, 33; 1 Petrus 3:7.

 3. Apatut ka mongiduan do savo ong amu ohigak ot pinisavaan?

Ong varo amu mionong sid pinisavaan, apatut no dot it minisavo kumosog palanta do samod. (1 Korintus 13:4, 5) It Kitab amu monukung do mitongkizad it minisavo dot baiko ongosampit koubasan sid pinisavaan.Basaon Markus 10:9.

4. Angaanak, nunu kenginan di Kinoringan sidi kou?

Engin i Yehovah humigak kou. Tinahakan tokou dot imuhun dit banalko avantang kuran gama humigak sid umur dikou. Engin Yosido ong munsopot kou di keloo om pangalaman dit molohing dikou. (Kolosi 3:20) Engin i Yehovah ohigak kou mangagama di nunu nopo it bahagi Dau om it Anak Dau, i Yesus.Basaon I Moonuduk 11:9–12:1; Matius 19:13-15; 21:15, 16.

5. It ongomolohing, kuran gama manabang dit angaanak humigak?

Apatut tokou kumosog monodia dot kakanan, intoronon, om ongopakazan bahagi angaanak ditokou. (1 Timotius 5:8) Nga, tazon om kadapat mogihim kohigakan it angaanak, apatut tokou mangajal tangaanak ditokou manamod do Kinoringan om marajal antad sid Dau. (Episus 6:4) It gama ditokou popemot samod sid Kinoringan, katanom sid ginavo dit angaanak. Ong mozo dit Boros do Kinoringan, it imuhun ditokou kadapat mangagazad dit angaanak mongitung dot avantang.Basaon Kinembulitan 6:4-7; Sambatan 22:6.

Kiunsopot sid angaanak ong sukungon om indozohon ditokou yoti. Om yoti diti apatut potolunungon om iraon. Iti gama diti kadapat mamapad dioti antad dit gagamaon it korungoi kohigakan dioti. (Sambatan 22:15) Topot, it ira suvaiko amu oholian kokodou ogama.Basaon Kolosi 3:21.

Sasi di Yehovah nokoponodia akopiro buuk it sinurat andang manabang dit ongomolohing om it angaanak. Ongobuuk diti ginama sumuhut di Kitab.Basaon Zabul 19:8, 12.