Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  yuli 2016

Saide u mu „de na ain”?

Saide u mu „de na ain”?

„Wi á sabi on dei a Masaa fu wi e kon.” MATEYESI 24:42.

SINGI: 136, 129

1. Gi wan ageisitoli di e soi san sa pasa efu u nai poti pakisei na a yuu efuso den sani di e pasa na a pisi pe u de. (Luku a fowtow na a bigin.)

A KONKELESI o bigin. A fesiman kon na a podium, neen a bali wadaa gi ala sama. Ala yuu a yuu fu a poku bigin. Den sama di de ape sabi taki a yuu doo fu sidon aliki den moin poku di den baala o pee. Den de kabakaba fu aliki den lezing tu. Ma kande wantu sama á poti pakisei na a fesiman. Kande den á yee seefi taki a poku e pee kaba. Neen meke den á sabi taki a konkelesi bigin, bika den e waka lontu efuso e gi toli anga den mati ete. A sani ya e soi san sa pasa te u nai poti pakisei na a yuu efuso den sani di e pasa na a pisi pe u de. A sani ya e leli u wan pelensipali sani, bika dyonson, wan moo gaan sani o pasa. U mu de kabakaba gi a sani ya. San o pasa dyonson?

2. Saide Yesesi taigi den disipel fi en taki den mu „de na ain”?

2 Yesesi be gi den bakaman fi en taanga-sikin fu de na ain anga fu seeka gi den „kiiboi dei fu goontapu”. A taigi den taki: „U mu tan luku, u mu de na ain, bika wi á sabi on ten den sani ya o pasa.” Baka dati a taigi den omen leisi taki:  „De na ain.” (Mateyesi 24:3; leisi Malikisi 13:32-37.) A buku Mateyesi e soi tu taki Yesesi wasikoi den bakaman fi en fu den á siibi. A taigi den taki: „U mu de na ain, bika wi á sabi on dei a Masaa fu wi e kon.” Baka dati a taki: „U mu de seekaseeka bika a manpikin fu libisama o kon a wan yuu di wi á poti pakisei.” A taigi den ete wan leisi taki: „U mu de na ain, bika wi á sabi a dei anga a yuu.”Mateyesi 24:42-44; 25:13.

3. Saide a foluku fu Yehofa e poti pakisei a den sani di Yesesi taki?

3 Wi enke Yehofa Kotoigi e si a wasikoi di Yesesi wasikoi den disipel fi en enke wan pelensipali sani. U sabi taki na „a ten fu a kaba” wi e libi. Dyonson a „gaan banowtu” o bigin (Daniyeli 12:4; Mateyesi 24:21). Leti enke fa Yesesi be taki, a foluku fu Yehofa e paati a bun nyunsu na a hii goontapu. Na aseefi yuu feti e feti, sama e siki, doti e seke, angii de a omen peesi a goontapu. Boiti dati a omen keliki e buuya sama aini a ten ya. Ogii á be e pasa so enke fa ai pasa nownow (Mateyesi 24:7, 11, 12, 14; Lukasi 21:11). Nownow na a yuu wi e luku fu a doo, te Yesesi o kon du san en Dda wani.Malikisi 13:26, 27.

A DEI E KOOSUBE NAMO!

4. (a) Saide meke u sa taki nownow Yesesi sabi on ten Alimakedon o kon? (b) San u sabi fu a gaan banowtu winsi wi á sabi on ten a o bigin?

4 Te u go a wan konkelesi, wi e sabi on lati ala den pisi e bigin. Ma wi á poi sabi pilisisi on yuu a gaan banowtu o bigin. Di Yesesi be de a goontapu a be taki: „Nawan sama sabi a dei anga a yuu. Den engel a hemel anga a Manpikin seefi á sabi. Ma na a Dda wawan sabi” (Mateyesi 24:36). Yehofa poti Yesesi fu teke fesi fu poli a goontapu fu Saatan na Alimakedon, neen meke u sa taki nownow a sabi on ten Alimakedon o kon (Openbaring 19:11-16). Ma wi á sabi a yuu anga a dei di a kaba o kon. Neen meke a de taanga fanowdu fu de na ain, bika Yehofa poti a dei kaba di a gaan banowtu o bigin. Ala dei ai koosube namo. „A ná o kon lati!” (Leisi Habakuk 2:1-3.) Saide u sa biibi taki a ná o kon lati?

5. Sowtu toli e soi taki te Yehofa taki wan sani, ai pasa na yuu di a taki a o pasa?

5 Ala yuu den sani di Yehofa taki, e pasa na a yuu di a taki den o pasa. Pakisei a dei di a puu en foluku a Egepte. A 14 Nisan fu a yali 1513 fosi Kelestesi, a fii den. Mosesi sikiifi san be pasa a dei de. A taki: „Di den 430 yali kaba, neen a foluku fu Yehofa komoto a Egepte na aseefi dei” (Ekisodesi 12:40-42). Den 430 yali ya be bigin aini a yali 1943 fosi Kelestesi, di a kuudei di Yehofa be meke anga Abalaham bigin wooko (Galasiyasama 3:17, 18). Bakaten Yehofa taigi Abalaham taki: „Mi wani i sabi taki den bakapikin fi i o tan a wan kondee di ná fu den. Den o toon saafu. Sama o pina den 400 yali langa” (Genesesi 15:13; Toli 7:6). Den 400 yali bigin aini a yali 1913 fosi Kelestesi di Ismayeli be bigin pina Isaki. Di Yehofa puu den Islayelisama a Egepte, neen a 400 yali doo (Genesesi 21:8-10; Galasiyasama 4:22-29). A sani ya e soi taki, a omen ondoo yali a fesi Yehofa be poti a dei di a be o fii en foluku!

6. Saide wi e biibi taki Yehofa o kibii en foluku?

6 Yowsuwa, a wan fu den Islayelisama di be fii a dei de. Baka omen yali, a taigi a foluku taki: „Ma u sabi taki Yehofa a  Gadu fu u, du ala den bun sani di a be paamisi u. Useefi si fa ala den sani ya pasa. A du ala san a be paamisi” (Yowsuwa 23:2, 14). Yehofa paamisi en foluku taki a o kibii den na a ten fu a gaan banowtu. A taki a o gi den teego libi aini wan nyun goontapu. Yehofa o du san a paamisi u. A ná abi misi. Neen meke efu u wani doo a nyun goontapu, u mu de na ain.

DE NA AIN, DA YU O TAN A LIBI

7, 8. (a) San den wakitiman fu fositen be mu du? San wi e leli fu a wooko fu den? (b) Gi wan toli di e soi san sa pasa te wan wakitiman e siibi?

7 U sa leli wan sani fu den wakitiman fu fositen. Somen fu den foto di den be e koti wakiti gi, be lontu anga hei sikotu fu den feyanti á be man kon aini a foto. Wan fu den foto ya, a Yelusalem. Den wakitiman be e taampu na a sikotu, a so den be man si efu sama be e kon na a foto. Wakitiman be de na a gaan doo fu a foto tu. A dei anga neti den man ya be mu koti wakiti. Te den be si feyanti e kon, den be mu wasikoi den sama di de aini a foto (Yesaya 62:6). Den be sabi taki a be de taanga fanowdu fu de na ain, fu luku san e go anga san e kon. Efu den be siibi, a omen sama be sa dede.Eseikiyeli 33:6.

8 Josephus a wan man di be e ondoosuku fa den Dyu fu fositen be e libi. A man ya taki, aini a yali 70 baka Kelestesi, den man di be e holi wakiti a son pisi fu a foto, be e siibi. Neen meke den Rome suudati booko go aini Yelusalem. Di den go aini a foto neen den gi a tempel faya. Baka dati den poli a foto. Na a sani de, a be a lasiti pisi fu a gaan banowtu di be miti den Dyu.

9. San omen sama fu a ten ya á sabi?

9 Gaanse tiiman fu a ten ya, e poti suudati fu holi wakiti, den e poti kamera anga alarm a den peesi pe sama sa kon aini a kondee. Den mu solugu taki feyanti á kon aini a kondee, fu du ogii anga den sama di de aini a kondee. Ma den tiiman ya á sabi taki wan moo taanga tiiman de a hemel. Dyonson Yesesi o feti anga ala den tiiman fu a goontapu ya (Yesaya 9:6, 7; 56:10; Daniyeli 2:44). Na a dei de wi e wakiti. U wani de kabakaba di a o doo. Neen meke wi e poti pakisei a den polofeititoli. Boiti dati wi e dini Yehofa anga u hii ati.Psalm 130:6.

NÁ MEKE SANI PUU I PAKISEI

10, 11. (a) Anga san u mu luku bun? Saide u mu luku bun anga a sani ya? (b) Saide yu e biibi taki a Saatan e koli den sama fu den á biibi san Beibel e taki?

10 Pakisei wan wakitiman di koti wakiti wan hii neti. Den lasiti yuu di a mu koti wakiti moo taanga, bika a weli. Useefi e libi aini den lasiti dei fu a goontapu ya. O moo a kaba koosube, o moo ai taanga fu de na ain. A o de wan tyali sani efu u siibi. Meke u luku dii sani di sa meke u siibi.

11 Didibii e koli sama. Neen na a „tiiman fu a goontapu ya”. Fosi Yesesi dede, a dii toon a taigi den disipel fi en a sani ya (Yohanisi 12:31; 14:30; 16:11). Didibii e meke den falisi keliki koli sama. Neen meke omen sama nai biibi taki a goontapu ya o poli dyonson (Sefanya 1:14). Saatan „beendi a fusutan fu den sama di nai biibi” (2 Korentesama 4:3-6). Neen meke te wi e meke moiti fu taigi den taki wi e libi a den kiiboi dei fu a goontapu efuso te wi e leli den taki Yesesi e tii  nownow, somen nai wani aliki. Son wan e taki: „Mi ná abi ten.”

12. Saide wi á mu meke Didibii koli u?

12 Winsi omen sama nai poti pakisei a den sani di Beibel be taki a fesi, tokuso a sani de á mu meke u lasi-ati. U sabi saide u mu de na ain. Pawlesi be taigi den baala fi en taki: „U sabi bunbun taki a dei fu Yehofa o kon.” Fa a dei ya o kon? Pawlesi taki a o kon „enke wan fufuuman a neti”. (Leisi 1 Tesalonikasama 5:1-6.) Yesesi be taki: „U mu de seekaseeka, bika a Manpikin fu libisama o kon na a yuu di wi á poti pakisei” (Lukasi 12:39, 40). Dyonson Saatan o koli sama fu biibi taki „freide de, ala sani e go bun” a goontapu. Da a dei fu Yehofa o kon wanboowanboo. Den o dyombo. Ma fa a de anga wi? Efu u wani de seekaseeka gi a dei de, fu Saatan á fende u koli enke fa a o koli den goontapu sama, u mu de na ain da u poti pakisei. Neen meke u mu leisi a Wowtu fu Gadu ala dei, da u sidon pakisei san Yehofa taigi u.

13. Fa den sama fu a goontapu ya e tyai denseefi? San u mu du fu wi á denki enke den?

13 A yeye fu a goontapu sa meke wi á de na ain. A omen sama fende taki a á de fanowdu fu sabi Gadu (Mateyesi 5:3). Pe fu den meke moiti fu sabi Gadu, den e koboloiki den ten anga den kaakiti fu fende goontapu gudu (1 Yohanisi 2:16). Boiti dati, aini a ten ya omen sowtu fasi de fu piisii. Den sani ya e gi sama taanga-sikin fu lobi piisii. Den e gi den taanga-sikin fu du ala san den wani (2 Timotiyesi 3:4). Den sani ya e puu den sama pakisei a den sani di de fanowdu tuutuu. Boiti dati, den nai meke moiti fu dini Gadu. Neen meke Pawlesi be taigi den Kelesten taki den mu de na ain. A sani di be o yeepi den fu weki, a te den á be o poti den pakisei, a gudu anga den taa sani di den be wani.Romesama 13:11-14.

14. San sikiifi a Lukasi 21:34, 35?

14 A den sani di a yeye fu Gadu wani u mu poti pakisei, ná den sani fu a goontapu. Yehofa e koboloiki a yeye fi en fu yeepi u fu fusutan san o pasa dyonson (1 Korentesama 2:12) [1] (Luku a pisi: Ete wan pelensipali sani.) Neen meke u mu de na ain. Son leisi den sani di wi e du ala dei, sa puu u pakisei na a dini di wi e dini Yehofa. (Leisi Lukasi 21:34, 35.) Taawan sa taigi u taki te wi e biibi taki wi e libi aini den lasiti dei, a soso wi e soso useefi (2 Peitilisi 3:3-7). Ma wi á mu meke den swaki u biibi. Bika a omen sani e soi kiin taki a kaba e kon. Efu u wani poti pakisei a den sani di a yeye fu Gadu wani, da u mu e kon a makandaa anga u baala anga sisa.

Yu e du ala san i man fu „de na ain”? (Luku paragraaf 11-16)

15. San miti Peitilisi, Yakowbesi anga Yohanisi? Saide a sani de sa miti u tu?

 15 Den fowtu di wi e meke sa meke a taanga gi u fu de na ain. Yesesi be sabi taki libisama e meke fowtu fu di den abi sondu. Pakisei san pasa a neti fosi a dede. Yesesi á be abi sondu, tokuso a be sabi taki efu a be wani holidoo, a be mu begi en Dda fu a yeepi en. Yesesi taigi Peitilisi, Yakowbesi anga Yohanisi taki den mu de ain te ai begi. Ma den apostel á be sabi taki a de taanga fanowdu fu de na ain. Den be weli, neen ede den be e siibi. Yesesi be weli tu, ma tokuso a tan na ai begi en Dda. Den apostel be mu begi tu.Malikisi 14:32-41.

16. Fa Yesesi gi u taanga-sikin fu „de na ain” enke fa Lukasi 21:36 e taki?

16 San o yeepi u fu „de na ain” anga fu de seekaseeka gi a dei fu Yehofa? U mu lobi du bun. Ma a sani de á sai. Wantu dei fosi Yesesi dede, a taigi den bakaman fi en taki den mu e begi Yehofa naamo fu a yeepi den. (Leisi Lukasi 21:36.) Efu u wani de na ain aini den lasiti dei ya, u mu e begi Yehofa ala yuu.1 Peitilisi 4:7.

DE NA AIN

17. San o yeepi u fu de seekaseeka gi a dei fu Yehofa?

17 Yesesi taki a kaba „o kon a wan yuu di wi á poti pakisei” (Mateyesi 24:44). Neen meke u mu de kabakaba ala yuu. Nownow a ná a ten fu suku a libi di a goontapu fu Saatan e kai bun libi. A bun libi de, a wan deen. Yehofa anga Yesesi soi wi aini a Beibel san o yeepi u fu de na ain. U mu poti pakisei a den sani di Beibel be taki a fesi, da wi o si fa den sani de e pasa nownow. U mu meke moiti fu wi anga Yehofa toon bun mati. U mu poti en Kownukondee a fesi tu. Den sani ya o yeepi u fu de seekaseeka te a dei fu Yehofa doo (Openbaring 22:20). A den sani ya o yeepi u fu tan a libi!

^ [1] (paragraaf 14) Luku kapitel 21 fu a buku Gado Kownukondre e tiri!