Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  yuli 2016

Paati a bun nyunsu taki Gadu e soi bun-ati gi sama

Paati a bun nyunsu taki Gadu e soi bun-ati gi sama

„Paati a bun nyunsu finifini taki Gadu e soi bun-ati gi sama.”TOLI 20:24.

SINGI: 101, 84

1, 2. Fa apostel Pawlesi be soi taki ai bigi gi en taki Yehofa soi bun-ati gi en?

APOSTEL Pawlesi be taki: „A bun-ati di a soi mi á be de fu soso.” (Leisi 1 Korentesama 15:9, 10.) Pawlesi be sabi taki a Gadu seefi be wani soi bun-ati gi en. A á be fiti a bun-ati fu Gadu, bika a be e du ogii anga den Kelesten.

2 Di Pawlesi be de fu dede, a sikiifi wan biifi gi Timotiyesi. A taigi en taki: „Mi e gi Kelestesi Yesesi, u Masaa daa. Neen gi mi kaakiti, di a si taki mi e aliki Gadu ala yuu. Neen meke a gi mi wan wooko fu du” (1 Timotiyesi 1:12-14). Sowtu wooko a be gi en? Pawlesi be taigi den owluman fu Efeise taki: „Mi ná abi toobi fu dede seefi. A wan enkii sani di mi wani du, a fu lon a sitee lon te na a kaba. Mi wani kaba a wooko di Masaa Yesesi gi mi tu. A wooko di a gi mi a fu paati a bun nyunsu finifini taki Gadu e soi bun-ati gi sama.”Toli 20:24.

3. Sowtu pelensipali wooko Yesesi be gi Pawlesi? (Luku a fowtow na a bigin.)

 3 Sowtu „bun nyunsu” Pawlesi be e paati? Fa a sani ya e soi taki Yehofa soi bun-ati gi libisama? Pawlesi be taigi den Kelesten fu Efeise taki: „U musu yee taki Gadu gi mi a faantiwowtu fu yeepi u, fu a sa soi bun-ati gi u” (Efeisesama 3:1, 2). Yesesi taigi Pawlesi taki a mu paati a bun nyunsu gi den taa kondee sama, sama di á be de Dyu. Den sama di á be de Dyu be abi a okasi fu tii enke kownu makandaa anga Yesesi tu. (Leisi Efeisesama 3:5-8.) Den Kelesten fu a ten ya sa waka a Pawlesi baka, bika a be e du ala san a poi fu paati a bun nyunsu. Den sani di a du soi taki „a bun-ati di Gadu soi en á be de fu soso”.

SAN A BUN-ATI FU GADU E GI I TAANGA-SIKIN FU DU?

4, 5. Saide u sa taki „a bun nyunsu fu Gadu Kownukondee anga a bun nyunsu di e taki fa „Gadu e soi bun-ati gi sama” na aseefi?

4 Aini a ten ya Yehofa gi en foluku a wooko fu paati a „bun nyunsu fu a Kownukondee . . . na a hii goontapu meke ala sama yee”, fosi a kaba kon (Mateyesi 24:14). A bun nyunsu fu Gadu Kownukondee anga a bun nyunsu di e taki fa „Gadu e soi bun-ati gi sama” na aseefi. Saide? Efu Gadu á soi bun-ati gi u, u ná o fende den belesi fu a Kownukondee (Efeisesama 1:3). Pawlesi soi taki ai bigi gi en taki Yehofa soi bun-ati gi en, neen meke a du ala san a man fu paati a bun nyunsu. Wi e meke moiti fu de enke Pawlesi?Leisi Romesama 1:14-16.

5 Aini den artikel di pasa, u si omen fasi fa wi enke sondu sama sa fende wini fu a bun-ati fu Yehofa. Fu di wi e fende den somen wini ya meke wi abi a faantiwowtu fu soi taawan fa Yehofa lobi u. U mu soi den san den mu du fu fende wini fu a lobi fu Yehofa tu. Fa u sa gi taawan taanga-sikin fu du sani di e soi taki ai bigi gi den taki Yehofa soi bun-ati gi den?

PAATI A NYUNSU TAKI GADU SENDE EN MANPIKIN KON DEDE GI U

6, 7. Te wi e yeepi sama fu fusutan san a dede fu Yesesi wani taki, da na a bun nyunsu di e soi taki Gadu abi bun-ati wi e paati. Saide u sa taki a sani de?

6 A omen sama e si den sondu fu den enke lawlaw sani aini a ten ya. Den kosensi nai fon den te den du wan sani di á fiti, neen meke den nai si a paiman di Yesesi pai gi wi fu wan sani. Ma moo anga moo den e kon si taki den nai piisii anga a fasi fa den e libi. A omen sama á sabi san a sondu. Den á sabi san sondu e du anga wi. Den á sabi san u sa du fu fii fu sondu tu. A te den taki anga den Yehofa Kotoigi fosi, da den e kon sabi den sani ya. Ma te den kiin ati sama kon sabi san a sondu, den e piisii fu yee taki Yehofa sende en manpikin kon dede gi u, fu puu sondu gi u. Yehofa lobi u. A abi bun-ati, neen meke a du a sani ya.1 Yohanisi 4:9, 10.

7 Luku san Pawlesi taki fu a manpikin fu Gadu di a lobi. A taki: „A meke Yesesi fii wi. A pai gi wi anga en buulu. Neen meke u fende paadon fu den sondu fu u, bika Gadu soi u a bun-ati fi en pasa maiki” (Efeisesama 1:7). A dede  di Gadu meke en manpikin dede gi u na a moo bun fasi fa Gadu soi taki a lobi u. A sani ya na a moo gaan sani tu di e soi taki Gadu abi bun-ati. U piisii di u sabi taki Gadu o gi u paadon fu den sondu fu u. Boiti dati, efu wi e biibi taki a dede fu Yesesi e tyai wini gi u, wi o abi wan kiin kosensi! (Hebrewsama 9:14) Moo so bun nyunsu á de fu paati gi taawan!

YEEPI TAAWAN FU TOON GADU MATI

8. Saide u mu biibi a manpikin fu Gadu?

8 Gadu e si den sama di nai biibi taki den o fende wini fu a dede di Yesesi dede gi u, enke en feyanti. Neen meke wi abi a okasi fu leli den sama ya taki den sa toon Gadu mati. A apostel Yohanisi sikiifi taki: „A sama di e biibi a manpikin fu Gadu, o libi fu teego. A sama di nai aliki a manpikin ná o fende a libi, ma Gadu o puu ati boon neen” (Yohanisi 3:36). U mu piisii taki Yesesi dede gi u fu u sa toon Gadu mati. Pawlesi be taki: „Wan ten be de di wi á be sabi Gadu. Wi anga en a be feyanti, bika a soso ogii u be e pakisei. Ma di Yesesi gi en sikin enke wan ofaandi di a dede gi u, neen wi anga Gadu toon mati baka.”Kolosesama 1:21, 22.

9, 10. (a) Sowtu faantiwowtu Kelestesi gi den salufu Kelesten? (b) Fa den „taa sikapu” e yeepi den?

9 Kelestesi gi den salufu baala di de a goontapu ya a wooko fu taigi sama taki den sa „toon Gadu mati”. Pawlesi taigi den taki: „Kelestesi dede gi u fu u sa toon [Gadu] mati. A gi wi a wooko fu taigi sama taki den poi toon en mati. Wi e taigi den sama taki den poi toon Gadu mati, bika a meke Kelestesi kon dede gi u. A nai pakisei den sondu fu u moo. A gi wi a wooko fu taigi den sama san den mu du fu toon en mati. Wi na basiya di e holi peesi gi Kelestesi. Da a bosikopu di wi e paati ya, a ná wi abi en. A mofu a fu wi, ma a masaa Gadu abi a taki: ’Wi e begi u baa, u meke moiti toon Gadu mati.’” 2 Korentesama 5:18-20.

10 A wan gaandi den „taa sikapu” abi fu yeepi den salufu Kelesten paati a bosikopu ya (Yohanisi 10:16). Enke sama di Kelestesi poti a wooko, da den „taa sikapu” e du gaanse fu a peleikiwooko. Den e yeepi sama fu toon Yehofa mati tu. A sani ya a wan fu den pelensipali fasi fa den e paati a bun nyunsu taki Gadu soi bun-ati gi u.

LELI SAMA TAKI GADU E ALIKI DEN BEGI FU U

11, 12. Te wi e leli sama taki den sa begi Yehofa, a bun nyunsu wi e paati. Saide u sa taki a sani ya?

11 A omen sama e begi, bika den e fii bun te den e begi. Ma den nai biibi taki Gadu e aliki den tuutuu. A de fanowdu taki den sama ya sabi taki a Gadu na „a sama di e aliki begi”. A Psalm sikiifiman David be taki: „A yu na a sama di e aliki begi. A yu ala sowtu sama o kon suku yeepi. Den fowtu di mi meke ipi te mi á poi tyai den. A yu o tapu den sondu fu u.”Psalm 65:2, 3.

12 Yesesi be taigi den disipel fi en taki: „Mi o du ala san wi akisi aini mi nen” (Yohanisi 14:14). A sani ya wani taki u  sa begi fu ala sani di e kai anga san Yehofa wani. Yohanisi be sikiifi taki: „Winsi san wi e akisi en, a o aliki wi, solanga ai kai anga a wani fi en” (1 Yohanisi 5:14). A bun te wi e yeepi sama fu fusutan taki begi a ná wan sani di e meke den fii bun namo. Ma te den e begi, den e go a ’Gadu kownusutuu fesi di e soi wi bun-ati’ (Hebrewsama 4:16). Te wi e leli sama fa den mu begi, sama den mu begi, efuso fu san den mu begi, da wi e yeepi den fu toon Yehofa mati. A so den e fende toosutu te sani e moo den.Psalm 4:1; 145:18.

A BUN-ATI DI GADU O SOI U AINI A NYUN GOONTAPU

13, 14. (a) Sowtu gaandi den salufu Kelesten o fende aini a ten di e kon? (b) San den o du gi libisama?

13 Aini a nyun goontapu, wi o moo si a bun-ati fu Gadu. Saide? A o gi den 144.000 sama di o tii anga Yesesi a hemel wan gaandi. Pawlesi be soi san na a gaandi de, di a taki: „Ma Gadu abi tyali-ati anga wi. A lobi u tuutuu. Neen meke u kon a libi makandii anga Yesesi, anga ala fa den fowtu fu u meke u be de enke sama di dede. Na a bun di Gadu du gi u meke u kon fii. Boiti dati, a meke u kon a libi baka tu, neen a meke u go sidon aini hemel, fu di wi anga Kelestesi Yesesi toon wan. „A o du moo bun gi u aini a ten di e kon, fu di a abi tyali-ati anga wi di de wan anga Kelestesi Yesesi.”Efeisesama 2:4-7.

14 Wi á sabi ala den bun sani di Yehofa o du gi den salufu Kelesten te den o tii anga Yesesi aini hemel (Lukasi 22:28-30; Filipisama 3:20, 21; 1 Yohanisi 3:2). Yehofa o du moo bun gi den salufu Kelesten. Den o toon „a Nyun Yelusalem” efuso „a toow-uman fu Kelestesi” (Openbaring 3:12; 17:14; 21:2,  9, 10). Den o wooko anga Yesesi fu ’deesi den foluku’. Den o yeepi sama fu den kon fii fu sondu anga dede. Den sama di den o yeepi ná o abi sondu moo.Leisi Openbaring 22:1, 2, 17.

15, 16. Fa Yehofa o soi bun-ati gi „den taa sikapu” aini a ten di e kon?

15 Efeisesama 2:7 taki, Gadu o soi bun-ati gi libisama ’aini a ten di e kon’. A ten de ala sama o si den bun di Gadu o du gi den (Lukasi 18:29, 30). Wan fu den moo gaan sani di Gadu o du fu soi wi a bun-ati fi en, na a weki di a o weki sama puu a „geebi” (Yopu 14:13-15; Yohanisi 5:28, 29). Sama a o weki? Uman anga man di be e dini Yehofa, fosi Yesesi be kon dede gi u. Den „taa sikapu” di dede aini den lasiti dei o weki baka tu. Ala den sama ya o kon a libi baka fu dini Yehofa go doo.

16 A omen miliyun sama di á be sabi Gadu o kon a libi baka tu. Yohanisi be sikiifi taki: „Neen mi si den dedesama, den bigiman anga den pootiman, e taampu na a kownusutuu fesi. Bukulolo be e opo. Ma wan taa bukulolo be e opo tu. A wan ya na a buku fu libi. Den be e kuutu den dedesama fu den sani di den du. Anga den sani di sikiifi aini den bukulolo den kuutu den. Neen a se puu den dedesama di be de aini en. Dede anga Geebi puu den dedesama di be de aini den. Neen a kuutu ala den dedesama fu den sani di den du” (Openbaring 20:12, 13). Den sama di kon a libi baka o abi a okasi fu kon sabi Yehofa. Den o abi a okasi fu libi enke fa a wani. Den o abi a okasi fu wooko anga den sani di sikiifi aini Beibel anga den nyun „bukulolo”. Den nyun leli di o de aini den bukulolo ya a wan taa fasi fa Yehofa o soi wi a bun-ati fi en.

NÁ WELI FU PELEIKI A BUN NYUNSU

17. San u mu holi a pakisei te wi e peleiki a bun nyunsu?

17 Nownow a de moo taanga fanowdu fu paati a bun nyunsu fu a Kownukondee, bika a kaba de koosube! (Malikisi 13:10) U mu holi a pakisei taki a Yehofa u wani gi gaandi te wi e peleiki. Fa u sa du a sani ya? U mu taigi sama taki a di Yehofa soi bun-ati gi u, meke u sa fende ala den belesi aini a ten di e kon.

Dini Yehofa anga i hii ati enke „futuboi di Gadu soi bun-ati”.1 Peitilisi 4:10 (Luku paragraaf 17-19)

18, 19. Fa wi e soi sama taki Yehofa abi bun-ati?

18 Te wi e peleiki gi sama, u mu soi den taki a te Yesesi o tii enke Kownu fosi, wi o moo fende wini fu a dede di a dede gi u. U mu soi den taki u ná o abi sondu moo. Beibel taki ’den sani di Gadu meke fii fu a sikin di e dede. Den o fii a wan foondoo fasi enke pikin fu Gadu’ (Romesama 8:21). A di Gadu soi bun-ati gi u meke a sani ya o pasa.

19 Wi abi a gaandi fu soi sama san Gadu paamisi u aini Openbaring 21:4, 5: „[Gadu] o dee den wataa ain fu den. Da dede, tyali, kee anga pen ná o de moo. Bika den fositen sani pasa gwe kaba.” Yehofa, a sama di sidon na a kownusutuu taki: „U luku! Mi e meke ala sani kon nyun.” A taki tu taki: „Sikiifi den sani ya, bika den sani ya, a ná lei. I sa fitoow den.” Te wi e paati a bun nyunsu anga u hii ati gi taawan, wi e soi den taki Yehofa abi bun-ati!